އުފަލާއި ހިތާމައިގައި ވެސް ދިވެހިން އިސްކުރާނީ ދީން: އިމްރާން

މަރިޔަމް އަނާ

26 ޑިސެމްބަރ 2020 - 17:37

0 comments

އުފަލާއި ހިތާމައިގައިވެސް ރާއްޖެއަކީ ބަދަހި ގައުމެއް ކަމަށާއި ދިވެހިން އިސްކުރަނީ އިސްލާމް ދީނާއި ގައުމިއްޔަތު ކަމަށް ހޯމް މިނިސްޓަރު އިމްރާން އަބުދުﷲ ވިދާޅުވެއްޖެއެވެ.

އިމްރާން މިހެން ވިދާޅުވީ މީގެ 16 އަހަރު ކުރިން ރާއްޖެއާއެކު ދުނިޔޭގެ ގިނަ ގައުމުތަކަށް ކުރިމަތިވި ސުނާމީ ކާރިސާއާ ގުޅިގެން މިއަދު ފާހަގަކުރާ، ގައުމީ އެއްބައިވަންތަކަމުގެ ދުވަހުގެ މުނާސަބަތުގައި ކުރެއްވި ޓްވީޓެއްގައެވެ.

އިމްރާންގެ ޓުވީޓުގައި ވިދާޅުވީ އުފަލާއި ހިތާމައިގައިވެސް ދިވެހިރާއްޖެއަކީ ބަދަހި ގައުމެއް ކަމަށާއި ދިވެހިން އިސްކުރަނީ އިސްލާމް ދީނާއި ގައުމިއްޔަތު ކަމަށެވެ.

"އަހަރެމެންގެ ޖަޒީރާތައް ގުޅުވާލަނީ އެއްބައިވަންތަކަމުގެ ފާލަމުން. ގައުމީ އެއްބައިވަންތަކަމުގެ ދުވަހުގެ ތަހުނިޔާ އެންމެހާ ރައްޔިތުންނަށް އަރިސްކުރަން،" އިމްރާން ވިދާޅުވިއެވެ.

އެއްބައިވަންތަކަމުގެ ދުވަސް ދިވެހިން ފާހަގަކުރަނީ 2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު ރާއްޖެއަށް ކުރިމަތިވި ސުނާމީ ކާރިސާގައި ދިވެހިންގެ ފަރާތުން ފެނިގެންދިޔަ އެއްބައިވަންތަކަން ފާހަގަކުރުމުގެ ގޮތުންނެވެ.

ދެހާސް ހަތަރު ވަނަ އަހަރުގެ ސުނާމީ ކާރިސާގައި 82 ދިވެހިން މަރުވެ، 26 މީހަކު ވަނީ ވީނުވީއެއް ނޭނގި ގެއްލިފައެވެ. އަދި 190 ރަށަކަށް އެކި ވަރުގެ ގެއްލުން ލިބުނެވެ. އޭގެ ތެރެއިން ފަސް ރަށަކަށް ވަރަށް ބޮޑެތި ގެއްލުންތަކެއް ލިބި، އެރަށްރަށުގެ ރައްޔިތުން ވަނީ އެހެން ރަށްތަކަށް ބަދަލުކޮށްފައެވެ. އަދި 15،000 މީހުން ގެދޮރު ގެއްލި ވަގުތީ ހިޔާވަހިކަމުގައި އެތައް އަހަރެއް ވަންދެން ދިރިއުޅެން ޖެހުނެވެ.