ޗެލްސީ މޮޅުވުމުން، ސިޓީގެ އިންތިޒާރު ދިގުވެއްޖެ

ހަސަން ހަލީމް

09 މެއި 2021 - 02:07

0 comments

އިނގިރޭސި ޕްރިމިއާ ލީގުގައި މިރޭ ޗެލްސީ އަތުން 2-1 އިން ބަލިވެ، ލީގު ޗެމްޕިއަންކަން ހޯދަން މެންޗެސްޓާ ސިޓީން ކުރާ އިންތިޒާރު ދިގުވެއްޖެ އެވެ.

މިރޭގެ މެޗުން މޮޅުވެގެން ސިޓީ އަށް ލީގު ޗެމްޕިއަންކަން ލިބެން އޮތްއިރު، ލީގުގެ އެއްވަނައިގައި އެޓީމު މިހާރު އޮތީ 80 ޕޮއިންޓާ އެކުއެވެ. ދެވަނައިގައި 67 ޕޮއިންޓާ އެކު މެންޗެސްޓަރ ޔުނައިޓެޑް އޮތްއިރު މިރޭގެ މޮޅާއެކު 64 ޕޮއިންޓާ އެކު ޗެލްސީ ވަނީ ލީގުގެ ތިންވަނަ އަށް އަރާފައެވެ.

ދެ ޓީމުން ވެސް ގިނަ ބަދަލުތަކާއެކު މި މެޗަށް ނިކުތްއިރު، މެޗުގެ 44 ވަނަ މިނެޓްގައި ރަހީމް ސްޓާލިން ވަނީ ސިޓީ އަށް ލީޑު ނަގާދީފައެވެ. އަދި ފުރަތަމަ ހާފް ނިމުމުގެ ކުރިން ސިޓީ އަށް ޕެނަލްޓީއެއް ލިބުނު ނަމަވެސް ސާޖިއޯ އަގުއެރޯ ފޮނުވާލި ޕެނަލްޓީ ޗެލްސީގެ ކީޕަރު މެންޑީ ވަނީ ދިފާއުކޮށްފައެވެ.

ދެވަނަ ހާފްގައި ޗެލްސީން ކުޅުން ވަރަށް ބޮޑަށް ރަނގަޅު ކުރިއިރު މެޗުގެ 63 ވަނަ މިނެޓްގައި ހާކިމް ޒިޔެކް ވަނީ އެޓީމަށް ނަތީޖާ އެއްވަރުކޮށްދީފައެވެ. އޭނާ މި ގޯލު ކާމިޔާބުކުރީ ސިޓީގެ ޕެނަލްޓީއޭރިއާގެ ބޭރުގައި ހުރެ ފޮނުވާލި ހަމަލާއަކުންނެވެ.

މި ގޯލަށްފަހު ވެސް ޗެލްސީން ދިޔައީ ސިޓީގެ ގޯލަށް ނުރައްކާ ކުރަމުންނެވެ. ނަތީޖާއެއްގެ ގޮތުން މެޗުގެ ފަހު ވަގުތުކޮޅުތެރޭ ވާނާ ދިން ޕާހަކުން ޑިފެންޑަރު މާކޮސް އޮލޮންސޯ ވަނީ ޗެލްސީގެ ދެވަނަ ގޯލު ކާމިޔާބުކޮށްދީ އެޓީމަށް މި މެޗުން ތިން ޕޮއިންޓު ކަށަވަރުކޮށްދީފައެވެ.

މި ނަތީޖާއާ އެކު ޗެލްސީގެ ކޯޗު ޓުޗެލް ހަވާލުވި ފަހުން ރަށުންބޭރުގައި އެ ޓީމުން ބަލިނުވެ ދަމަހައްޓަމުން އަންނަ ރެކޯޑް ވަނީ 12 މެޗަށް ވެފަ އެވެ. ޓުޗެލް ބުނީ ފުރަތަމަ ހާފުގައި ބޭނުންވި ގޮތަށް ނުދިޔަ ނަމަވެސް ދެ ވަނަ ހާފް ފެށިގެން ބޭނުންވި ގޮތަށް ޗެލްސީން ކުޅުނު ކަމަށެވެ.

"ހަގީގަތުގައި އަހަންނަށް ފުރަތަމަ ހާފު ދިޔައީ 0-0 ކަހަލަ ގޮތަކަށް. ހެދުނީ އެންމެ ގޯހެއް ސިޓީން އޭގެ ބޭނުންހިފައި ލަނޑުޖެހީ. އެކަމަކު ދެ ވަނަ ހާފްގެ ކޮންމެ މިނިޓަކަށް ފަހު ދެން ފެނުނީ އަހަރެމެންގެ ކޮންފިޑެންސް ރަނގަޅުވަމުން އައިތަން. އޭގެ ނަތީޖާ އަކީ އިތުރު ވަގުތުގައި ގޯލެއް ޖަހައިގެން މޮޅުވުން،" ޓުޗެލް ބުންޏެވެ.

ސިޓީގެ ކޯޗު ޕެޕް ގާޑިއޯލާ ބުނީ ރެފްރީންގެ ނިންމުންތަކުގެ ވާހަކަ ދައްކަން ބޭނުންނުވާ ކަމަށާއި ސްޓާލިން އަށް ކުރި ފައުލަކީ އޭނާގެ ނަޒަރުގައި ޕެނަލްޓީއެއް ކަމަށެވެ. އެކަމަކު މިއީ ބަލިވި ނަމަވެސް ސިޓީގެ ފަރާތުން ދަށް ކުޅުމެއް ފެނިގެން ދިޔަ މެޗެއް ނޫން ކަމަށް ގާޑިއޯލާ ބުންޏެވެ.

"އަހަރެމެންނަށް އަދިވެސް ޗެމްޕިއަންކަން ހޯދޭނެ ފުރުސަތު އެބައޮތް. އެހެންވީމަ އެއީ ހިތްހަަމަޖެހުމެއް،" ހަތަރު އަހަރު ތެރޭ ތިން ވަނަ ފަަހަރަށް ލީގުގެ ޗެމްޕިއަންކަން ހޯދުމާ ގާތުގައި އޮތް ސިޓީގެ ކޯޗު ގާޑިއޯލާ ބުންޏެވެ.

ތާވަލުގެ އެއްވަނައިގައި ސިޓީ އޮތީ ކުޅުނު 35 މެޗުން ލިބުނު 80 ޕޮއިންޓާއެކު އެވެ. ދެވަނައިގައި ޔުނައިޓެޑް އޮތީ 33 މެޗުން 67 ޕޮއިންޓާއެކު އެވެ. މި މޮޅާއެކު ޗެލްސީ ތިންވަނައަށް ޖެހިލިއިރު އެ ޓީމު އޮތީ 35 މެޗުން 64 ޕޮއިންޓާއެކު އެވެ.

ޗެލްސީއާއި ސިޓީ ވަނީ ޔުއެފާ ޗެމްޕިއަންސް ލީގުގެ ފައިނަލުންވެސް ޖާގަ ހޯދާފައެވެ. މިމަހުގެ 29 ގައި މި ދެ ޓީމު ބައްދަލުކުރާނީ ތުރުކީގެ އިސްތަމްބުލް އިންނެވެ.