ރަޝިޔާއިން އެމެރިކާގެ ރައީސަށް ދަތިކޮށްފި

ހަސަން ހަލީމް

15 މާޗް 2022 - 23:34

0 comments

އެމެރިކާގެ ރައީސް ޖޯ ބައިޑަން އާއި އެ ގައުމުގެ ސީނިއާ އޮފިޝަލުންތަކަކާ ދެކޮޅަށް ރަޝިޔާ އިން ފިޔަވަޅު އަޅައި ބައިޑަން ރަޝިޔާ އަށް އެތެރެވުން މަނާކޮށްފި އެވެ.

މީޑިއާ ރިޕޯޓްތައް ބުނާގޮތުގައި، ރަޝިޔާއިން ވަނީ މިއަދު މެންދުރުފަހު ޖޯ ބައިޑަން އާއި އެމެރިކާގެ ޚާރިޖީ ވަޒީރު އެންތަނީ ބްލިންކެންއާ ދެކޮޅަށް ދަތިކުރުމުގެ ފިޔަވަޅު އަޅާފައެވެ.

އެދެބޭފުޅުން ހިމެނޭހެން އެމެރިކާ ސަރުކާރުގެ އިސް 13 މީހެއްގެ މައްޗަށް މިއަދު ރަޝިއާ އިން ވަނީ ދަތިކުރުމުގެ ފިޔަވަޅުތައް އަޅާފައެވެ. އޭގެތެރޭގައި ޖޮއިންޓް ޗީފް އޮފް ސްޓާފްގެ ޗެއާމަން ޖެނެރަލް މާކް މިލޭ އާއި ނޭޝަނަލް ސެކިއުރިޓީ އެޑްވައިޒަރ ޖޭކް ސަލިވަން އާއި ސީއައިއޭގެ ޑިރެކްޓަރ ވިލިއަމް ބާންސް އާއި ވައިޓްސް ހައުސްގެ ޕްރެސް ސެކްރެޓަރީ ޖެން ޕްސާކީ ވެސް ހިމެނެއެވެ.

ރަޝިޔާގެ ފޮރިން މިނިސްޓްރީން ބުނީ ބައިޑަންއާ ދެކޮޅަށް ފިޔަވަޅު އެޅީ ރަޝިޔާއާ ދެކޮޅަށް އެމެރިކާ އިން އެޅި ދަތިކުރުމުގެ ފިޔަވަޅުތަކަށް ބަދަލު ހިފުމުގެ ގޮތުން ކަމަށެވެ.

"މިއީ އެމެރިކާ އިން ރަޝިޔާއާ ދެކޮޅަށް ގެންގުޅޭ ރަޝިޔާފޯބިކް ސިޔާސަތުގެ ނަތީޖާ،" ފޮރިން މިނިސްޓްރީގެ ބަޔާނުގައި ބުނެފައިވެ އެވެ.

ރަޝިޔާ އިން ޔޫކްރޭނާ ދެކޮޅަށް ހަނގުރާމަ ފެށުމާ އެކު އެމެރިކާ އާއި ވިލާތުގެ ގައުމުތަކުން ވަނީ އިގްތިސާދީ ގޮތުން ރަޝިޔާ އަށް ދަތިކުރުމަށް ގިނަ ފިޔަވަޅުތަކެއް އަޅައިފަ އެވެ. އެ ގޮތުން ވިލާތުގެ ގައުމުތަކުގައި ހުރި ރަޝިޔާގެ ފައިސާތައް ހިފަހައްޓައި ރަޝިޔާގެ ބޭންކުތަކާ އެކު މާލީ މުއާމަލާތްތައް ހިންގުން މިހާރު ވަނީ މެދުކަނޑާލައިފަ އެވެ.

އޭގެ އިތުރުން ބައިނަލްއަގުވާމީ ބޮޑެތި ވިޔަފާރި ކުންފުނިތަކުން ރަޝިޔާގައި ކުރަމުން އައި ވިޔަފާރިތައް ހުއްޓާލައި، ރަޝިޔާގައި އިންވެސްޓުކުރުން ވެސް ވަނީ ހުއްޓާލައިފަ އެވެ. އަދި ހުޅަނގުގެ ގައުމުތަކުގައި މިހާރު ތިބި ރަޝިޔާގެ މަހުޖަނުންގެ އަގުބޮޑު މުދާތައް ހިފެހެއްޓުން ފަދަ ފިޔަވަޅުތައް ވެސް، ވިލާތުގެ ގައުމުތަކުން އަންނަނީ އަޅަމުންނެވެ.

ފެބްރުއަރީ މަހުގެ 24ވަނަ ދުވަހު ވައިގެމަގުންނާއި ކަނޑުމަގުންނާއި އެއްގަމުން ޔޫކްރެއިނަށް ވަރުގަދަ ޙަމަލާތަކެއް ދޭން ރަޝިޔާއިންވަނީ ފަށައިފައެވެ. އަދި ހަނގުރާމައިގެ ފުރަތަމަ ދެތިން ގަޑިއިރުގެ ތެރޭގައި ރަޝިޔާގެ ފައުޖުތަކުންވަނީ ޔޫކްރެއިނުގެ ވައިގެ ސިފައިންގެ ބާރު އެއްކޮށް ކަނޑުވާލައިފައެވެ. އޭގެ ފަހުން ފާއިތުވި ތިން ހަފުތާގެ ތެރޭގައި ރަޝިޔާގެ އަސްކަރިއްޔާއިން ދެމުންދާ ޙަމަލާތަކުގައި ޔޫކްރެއިނުގެ 1،300 ޓޭންކަރާއި 600 މިސައިލް ލޯންޗަރާއި 145 އަސްކަރީ ޑުރޯންވަނީ ނައްތާލައިފައެވެ. އޭގެ އިތުރުން ޔޫކްރެއިނުން ބޭނުންކުރަމުންދިޔަ ގިނަ ޢަދަދެއްގެ އަސްކަރީ ރާޑަރުތަކާއި ހަތިޔާރު ގުދަންތަކަށްވެސްވަނީ ރަޝިޔާގެ ޙަމަލާތަކުގައި ބޮޑެތި ގެއްލުންތަކެއް ލިބިފައެވެ. އަދި ރަޝިޔާގެ ފައުޖުތަކާ ދެކޮޅަށް ބަދަލުކުރި ޙަމަލާތަކުގައި ޔޫކްރެއިނުގެ 1،300 ސިފައިންވަނީ މަރުވެފައެވެ.

ރަޝިޔާގެ ދިފާޢީ ވުޒާރާއިން ބުނެފައިވާ ގޮތުގައި ޔޫކްރެއިނުގައި ކުރަމުންދާ ހަނގުރާމާގައި ރަޝިޔާގެ 498 ސިފައިން މަރުވެ 1،600 ސިފައިންވަނީ ޒަޚަމުވެފައެވެ. އަދި ޒަޚަމުވި 1،400އަށްވުރެ ގިނަ ސިފައިންވަނީ ފަރުވާއަށްފަހު ދޫކޮށްލައިފައެވެ. ނަމަވެސް އެ ޢަދަދުތައް އެ ވުޒާރާއިން ޢާއްމުކޮށްފައިވަނީ ހަނގުރާމައިގެ ފުރަތަމަ ހަފުތާގެ ތެރޭގައެވެ. ޔޫކްރެއިނުގެ ސަރުކާރުން ބުނެފައިވާ ގޮތުގައި ހަނގުރާމައިގައި ރަޝިޔާގެ އެތައް ހާސް ސިފައިންނެއްވަނީ މަރުވެފައެވެ.

އެމެރިކާގެ ދިފާއީ ވުޒާރާ އިން އިއްޔެ ބުނި ގޮތުގައި ހުސްވި ފެބްރުއަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރޭނަށް ހަމަލާ ދޭން ފެށި ފަހުން، ރަޝިޔާގެ ލަޝްކަރުތަކުން ޔޫކްރޭންގެ ތެރެއަށް އިއްޔެގެ ނިޔަލަށް 900 މިސައިލް ފޮނުވާލައިފި އެވެ. މީގެ ތެރެއިން ޔޫކްރޭންގެ ވައިގެ ދިފާއީ ނިޒާމުގެ މިސައިލްތަކުން ހުރަސްއަޅައި ވައްޓާލެވިފައި ވަނީ ވަރަށް މަދު މިސައިލެކެވެ.

ޔޫކްރޭން ހަނގުރާމަ ތިން ވަނަ ހަފުތާ އަށް ފެށިގެން ދާއިރު، ހަނގުރާމަ ހުއްޓުމާ ބެހޭ ގޮތުން ރަޝިޔާ ސަރުކާރުގެ މަންދޫބުންނާއި ޔޫކްރޭން ސަރުކާރުގެ މަންދޫބުންނާ ދެމެދު ކުރަމުން އަންނަ މަޝްވަރާތައް މިއަދު ވެސް އޮންނާނެ ކަމަށް ޔޫކްރޭން ސަރުކާރުން ބުނެ އެވެ. އިއްޔެގެ ބައްދަލުވުން ވެސް ވީޑިއޯ ލިންކް މެދުވެރިކޮށް ކުރިއަށް ގެންދިޔަ އިރު، މިއަދުގެ ބައްދަލުވުން ވެސް ކުރިއަށް ދާނީ ވީޑިއޯ ލިންކް މެދުވެރިކޮށެވެ.

ރަޝިއާ ބުނާ ގޮތުން ޔުކްރޭންގައި ރަޝިއާ ސިފައިން ހިންގަމުން ގެންދާ އަސްކަރީ ހަރަކާތްތައް ކުރިއަށް ދަނީ ކުރިން ރާވާފައި އޮތް ގޮތަށެވެ. އަދި ބުނީ ވިސްނުމަކީ ބާރު ގަދަ ހަތިޔާރު އެއްފަހަރާ ބޭނުން ކުރުން ނޫން ކަމަށާއި ޔުކްރޭން ސިފައިން ދޭ ހަމަލާތަކަށް ބަލައިގެން ރައްދު ހަމަލާ ދިނުން ކަމަށެވެ.

ކްރެމްލިންގެ ތަރުޖަމަން ދިމިތުރީ ޕެސްކޯފް ނޫސްވެރިންނަށް ވިދާޅުވި ގޮތުގައި ބޮޑެތި އަވަށްތަކަށް ހަމަލާ ދިނުމުގައި އާންމުންނަށް ގެއްލުން އެންމެ ކުޑަވާނެ ގޮތް ބަލައިގެން ކުރިއަށް ދާން ރައީސް ޕޫޓިން އޮތީ އަމުރު ކުރައްވާފަ އެވެ.

އޭނާ ވިދާޅުވީ ލަޝްކަރުތައް މަޑުޖެހެން މެދުވެރިވާ ސަބަބަކީ އާންމުންނަށް ބަލަން ޖެހޭތީ ކަމަށެވެ.

ރަޝިޔާ އިން މިހާރު ދޭ ހަމަލާތަކުން ދިފާއުވުމަށް ނޭޓޯގެ ގައުމުތަކުން އަސްކަރީ އެހީ ނުލިބޭތީ ޔުކްރޭނުގެ ރައީސް ވޮލްޑޮމީރް ޒެލެންސްކީ ވަނީ ތަކުރާރުކޮށް ނުރުހުން ފާޅުކުރައްވައިފަ އެވެ.