އައްޑޫން ހައްޔަރުކުރި ހަ މީހެއްގެ ބަންދަށް ހަފުތާއެއް

ފާތުމަތު މަލްހާ

28 މާޗް 2022 - 13:05

0 comments

ޓެރަރިޒަމްގެ އަމަލެއް ހިންގަން އުޅުނުކަމުގެ ތުހުމަތުގައި އައްޑޫން ހައްޔަރުކުރި ހަ މީހެއްގެ ބަންދުގެ މުއްދަތު އިތުރުކޮށްފި އެވެ.

ފުލުހުން ބުނީ ހަ މީހެއްގެ ބަންދުގެ މުއްދަތަށް ހިތަދޫ މެޖިސްޓްރޭޓް ކޯޓުން ހަފުތާއެއްގެ މުއްދަތު ޖަހައި ދީފައިވާ ކަމަށެވެ. ނަމަވެސް އަނެއް ތިން މީހުންގެ މައްސަލަ އަދި ކޯޓަށް ނުފޮނުވާ ކަމަށް ފުލުހުން ބުންޏެވެ.

ޓެރަރިޒަމްގެ އަމަލެއް ހިންގަން އުޅުނުކަމުގެ ތުހުމަތުގައި ބަޔަކު ހައްޔަރުކުރި ނަމަވެސް އެ މީހުންނާ ބެހޭ އިތުރު އެއްވެސް ތަފުސީލެއް ފުލުހުން މިހާތަނަށް ހާމަކޮށްފައެއް ނުވެ އެވެ. އެކަމަކު އެކަން ތަހުގީގުކުރަމުން އަންނަ ކަމަށް ބުންޏެވެ.

އެނގިފައިވާ ގޮތުގައި ހައްޔަރުކުރި މީހުންގެ ތެރޭގައި އެފަދަ ތުހުމަތުތަކެއް ކުރިން ވެސް ކުރެވުނު ބަޔަކާއި 18 އަހަރުން ދަށުގެ ކުދިންތަކެއް ވެސް ހިމެނެ އެވެ.

ޓެރަރިޒަމްގެ ތުހުމަތުގައި އައްޑޫން ބަޔަކު ހައްޔަރުކުރިއިރު، ރައީސް އިބްރާހިމް މުހައްމަދު ސޯލިހު ގެންދަވަނީ އެ ސިޓީގެ ހުރިހާ ރަށަކަށް ދަތުރު ކުރައްވަމުންނެވެ.