ފެނަކައިން ކަރަންޓް މީޓަރ ޓެސްޓް ކުރުމުގެ ޚިދުމަތް މިމަސް ނިމުމުގެ ކުރިން ފޯރުކޮށްދެނީ

ހުސެން ރަޝީދު

16 ޖޫން 2022 - 00:29

0 comments

ރައްޔިތުންނަށް ކަރަންޓްގެ ޚިދުމަތް ފޯރުކޮށްދިނުމަށް ބޭނުންކުރާ ކަރަންޓް މީޓަރ ޓެސްޓް ކުރުން މުޅި ރާއްޖޭގައި އެންމެ ފަރާތަކަށް ބަރޯސާވެފައި އޮތް އޮތުން ނިމުމަކަށް ގެނައުމަށް ފެނަކައިގެ ފަރާތުން މީޓަރ ޓެސްޓިން ބެންޗެއް ގެނެސް އިންސްޓޯލް ކުރުމުގެ މަސައްކަތް ފަށައިފި އެވެ.

ފެނަކައިން މިއަދު ބުނީ، ރައްޔިތުންނަށް ކަރަންޓްގެ ހިދުމަތް ފޯރުކޮށްދިނުމަށް ބޭނުންކުރާ ކަރަންޓް މީޓަރ ޓެސްޓް ކުރުން، މުޅި ރާއްޖޭގައި، އެންމެ ފަރާތަކަށް ބަރޯސާވެފައި އޮތް އޮތުން ނިމުމަކަށް ގެނެސް، މިހާރަށްވުރެ އަވަސް މަގުން މީޓަރ ޓެސްޓްކޮށް ރައްޔިތުންނަށް އެކަށީގެންވާ އަވަސް މިނުގައި ދެމެހެއްޓެނިވި ހިދުމަތެއް ދެވޭނެ އިންތިޒާމް ހަމަޖެއްސުމުގެ ގޮތުން، އެ ކުންފުނިން މިހާރުވަނީ މީޓަރ ޓެސްޓިން ބެންޗެއް ގެނެސް އިންސްޓޯލް ކުރުމުގެ މަސައްކަތް ފަށާފައިވާ ކަމަށެވެ.

އެ ކުންފުނިން ވިދާޅުވީ މީޓަރ ޓެސްޓް ކުރުމުގެ ޚިދުމަތް ތަޢާރަފް ކުރުމުން، މިހާރު ރައްޔިތުންނަށް އެ ޚިދުމަތް ލިބޭ އަގަށްވުރެ އެތައް ގުނައެއް އަގު ހެޔޮވެގެންދާނެކަމަށެވެ. އަދި މިހާރު ޚިދުމަތަށް ނަގާ މުއްދަތަށް ވުރެ އަވަސްކޮށް ޚިދުމަތް ލިބި، ރައްޔިތުންނަށް ހުރިހާ ގޮތަކުން ލުއި ފަސޭހަ ވެގެންދާނެކަމަށްވެސް އެ ކުންފުނިން ވިދާޅުވެއެވެ.

ފެނަކައިގެ އަމާޒަކީ ކުރިއަށް އޮތް ތަނުގައިވެސް، ޔުޓިލިޓީ ޚިދުމަތްތަކުގެ ދާއިރާގައި ރައްޔިތުންނަށް ތަކްލީފަކަށް ވެފައި ހުރި ކަންކަމަށް ލުއިފަސޭހަ ގޮތެއްގައި ޙައްލު ހޯދައިދެވޭނެ މަގު ފަހި ކޮށްދީ، ރައްޔިތުންނަށް އިތުބާރުހުރި ދެމެހެއްޓެނިވި ޚިދުމަތްތަކެއް ފޯރުކޮށްދިނުންކަމަށް އެ ކުންފުނިން ވިދާޅުވެއެވެ.

އަތޮޅުތެރޭގެ ރަށްތަކަށް ކަރަންޓު ފޯރުކޮށްދިނުމަށް ކުރީގައި ޚިދުމަތްދެމުން އައި ޔުޓިލިޓީ ކުންފުނިތައް އުވާލާ ފެނަކަ ކޯޕަރޭޝަން އުފައްދާފައިވަނީ 2012 ވަނަ އަހަރުއެވެ. އެކުންފުނިން އަންނަނީ އަތޮޅުތެރޭގެ 160އަށްވުރެ ގިނަ ރަށްރަށުގައި ކަރަންޓުގެ ޚިދުމަތް ފޯރުކޮށްދެމުންނެވެ.