ގައުމުން ބޭރުގައި ދިރިއުޅޭ ދިވެހިންގެ މައުލޫމާތު އެއްކުރަނީ

އައިމިނަތު ޝިޔާޒާ

03 ނޮވެމްބަރ 2022 - 18:04

0 comments

ބޯހިމެނުމަށްޓަކައި ރާއްޖެއިން ބޭރުގައި ދިރިއުޅޭ ދިވެހިންގެ މައުލޫމާތު އެއްކުރުމުގެ މަސައްކަތް މޯލްޑިވްސް ބިއުރޯ އޮފް ސްޓެޓިސްޓިކްސް އިން ފަށައިފި އެވެ.

އެ ބިއުރޯ އިން އިއްޔެ ސޯޝަލް މީޑިއާގައި ކުރި ޕޯސްޓެއްގައި ބުނީ، ރާއްޖެ އިން ބޭރުގައި ދިރިއުޅޭ ދިވެހިންގެ ސާވޭ ހެދުން މިހާރު ފަށާފައިވާ ކަމަށެވެ. މިދިޔަ އަންގާރަ ދުވަހުން ފެށިގެން މި މަހު 30ގެ ނިޔަލަށް އެ މަސައްކަތް ކުރިއަށް ގެންދާނެ ކަމަށް ވެސް ބުންޏެވެ.

އެ މުއްދަތުގެ ތެރޭގައި، ރާއްޖެއިން ބޭރުގައި ދިރިއުޅޭ ދިވެހިން އެ ބިއުރޯގެ ވެބްސައިޓްގައިވާ ފޯމު މެދުވެރިކޮށް، މައުލޫމާތު ފުރިހަމުކުރުމަށް އެ ބިއުރޯއިން އެދެ އެވެ.

ރާއްޖެއިން ބޭރުގައި ދިރިއުޅޭ ދިވެހި ހުރިހާ ރައްޔިތުން ވެސް ބިއުރޯގެ ވެބްސައިޓްގައިވާ ފޯމު މެދުވެރިކޮށް ވީ އެންމެ އަވަހަކަށް މައުލޫމާތުތައް ފުރިހަމަ ކޮށްދިނުމަށް އެ އިދާރާއިން ވަނީ އެދިފަ އެވެ.

މި ސާވޭ މެދުވެރިކޮށް ލިބޭ މައުލޫމާތަކީ ދިވެހިރާއްޖޭގެ ޖުމުލަ އާބާދީގެ އަންދާޒާކޮށް އެކުލަވާލުމުގައި ބޭނުންކުރެވޭނެ މައުލޫމާތުތަކެއް ކަމަށާއި މައުލޫމާތުގެ ސިއްރު ހިފަހައްޓާނެ ކަމަށް އެ ބިއުރޯއިން ވަނީ ބުނެފަ އެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް އިން މިއަހަރުގެ ސެޕްޓެމްބަރު މަހު ކުރިއަށް ގެންދިޔަ ބޯހިމެނުމުގެ ނަތީޖާ ރިޕޯޓްގައިވާ ގޮތުން ރާއްޖޭގައި ދިރިއުޅެނީ 452،495 މީހުން ނެވެ. މީގެ ތެރެއިން 355،331 މީހުންނަކީ ދިވެހިން ނެވެ. ބިދޭސީންގެ އާބާދީއަކީ 97،164 މީހުން ނެވެ.

މިހާތަނަށް ބޯހިމެނިފައި ނުވާ ނަމަ ހޮޓްލައިން 1423 އަށްް ނުވަތަ ފޯން ނަންބަރު 3008400 އަށް ގުޅުމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން އެދެ އެވެ. އެ ކަމަށް އެދޭ ފޯމު އޮންލައިންކޮށް ހުށަހަޅައިގެން ވިޔަސް ބޯހިމެނުމުގައި ބައިވެރިވާން ބުންޏެވެ.