ވަޒީފާގެ ބާޒާރާ ގުޅޭ ސާވޭއެއް ފަށައިފި

އިސްމާއިލް ރިޒާ

15 ޑިސެމްބަރ 2024 - 14:26

0 comments

ރާއްޖޭގެ ވަޒީފާގެ ބާޒާރާ ގުޅޭ ސާވޭއެއް މޯލްޑިވްސް ބިއުރޯ އޮފް ސްޓެޓިސްޓިކްސް އިން މިއަދު ފަށައިފި އެވެ.

މި ސަރވޭ ކުރިއަށްދާނީ ޑިސެމްބަރ 15 އިން 21 އަށެވެ.

މި ސާވޭ ކުރިއަށްގެންދާނީ މާލެ، ވިލިމާލެ އަދި ހުޅުމާލޭގައި ރޭންޑަމްކޮށް ހޮވާލެވޭ ގޭބީސީތަކަށެވެ. މި ސާވޭއަކީ ރާއްޖޭގެ ވަޒީފާގެ ބާޒާރާއި ގުޅޭ މުހިންމު ތަފާސްހިސާބު އެއްކުރުމަށްޓަކައި ކުރެވޭ މުހިންމު ސާވޭއެކެވެ. މި ސަރވޭއިން އެއްކުރެވޭ މައުލޫމާތުން މަސައްކަތް ލިބިފައިވާ އާބާދީގެ ނިސްބަތް، މަސައްކަތް ލިބިފައި ނުވާ އާބާދީގެ ނިސްބަތް ފަދަ ވަޒީފާގެ ބާޒާރާއި ގުޅޭ މުހިންމު މައުލޫމާތުތައް ދެނެގަނެވޭނެއެވެ.

ސާވޭގައި މައުލޫމާތު ނަގާނެ މައިގަނޑު ބައިތައް:

* މީހުންގެ އާންމު މައުލޫމާތު
* ހިޖުރަކުރުން
* ވަޒީފާއާއި އާމްދަނީ ހޯދުމުގެ މަސައްކަތްކުރާ އާބާދީގެ ތަފްސީލް
* އާމްދަނީ ލިބޭ މަސައްކަތް ހޯދާ އަދި ލިބިފައި ނުވާ އާބާދީގެ ތަފްސީލް
* އާމްދަނީ ލިބޭ އަދި ނުލިބޭގޮތުން ކުރާ މަސައްކަތާއި، ގޭތެރޭގެ މަސައްކަތުގައި ވަގުތުހޭދަކުރާ މިންވަރު
* ހިލޭސާބަހަށް ކުރާ މަސައްކަތުގެ ތަފްސީލް

ސްޓެޓިސްޓިކް ބިއުރޯއިން ބުނީ މި ސާވޭގެ ބޭނުމަށް އެއްކުރާނީ މީހުންގެ ތައުލީމީ ފެންވަރާއި އާމްދަނީގެ ތަފުސީލާއި ހިޖުރަކުރުމާއި ގޭތެރޭގެ މަސައްކަތްތަކުގައި ހޭދަކުރާ ވަގުތާއި މީހުންގެ އާންމު މައުލޫމާތާއި ވަޒީފާ އާއި އާމްދަނީ ހޯދުމުގެ މަސައްކަތްކުރާ އާބާދީ އަދި ހިލޭސާބަހަށް މަސައްކަތްކުރާ އާބާދީއާ ގުޅޭ މައުލޫމާތު ކަމަށެވެ.

މިއީ އާންމުންގެ އަގުހުރި ވަގުތާއި އެއްބާރުލުން ވަރަށް ބޮޑަށް ބޭނުންވާ ސާވޭއަކަށް ވާތީ، މި ސާވޭއަށް އެއްބާރުލުން ދިނުމަށް އާންމުން ހޭދަކުރާ ވަގުތަކީ ރާއްޖޭގެ ތަފާސްހިސާބުގެ ނިޒާމު ހަރުދަނާކުރުމަށް ދެވޭ އަގުހުރި ގައުމީ ހިދުމަތެއް ކަމަށް ދެކޭ ކަމަށް ވެސް އެ ބިއުރޯއިން ބުންޏެވެ.