މަސްތުވާތަކެއްޗާއެކު ބިލެތްދޫ އިން މީހަކު ހައްޔަރުކޮށްފި

މަރިޔަމް އަނާ

06 ނޮވެމްބަރ 2022 - 10:42

0 comments

ފޮޓޯ؛ ޕޮލިސް

މަސްތުވާތަކެއްޗާ ދެކޮޅަށް ދިވެހި ފުލުހުން ހިދުމަތުން ކުރަމުންދާ މަސައްކަތުގެ ތެރެއިން ފ. ބިލެތްދޫ ޕޮލިސް ސްޓޭޝަނާއި، ނިލަންދޫ ޕޮލިސް ސްޓޭޝަން ގުޅިގެން ހިންގި އޮޕަރޭޝަންގައި މަސްތުވާތަކެއްޗާއެކު ފ.ބިލެތްދޫއިން 34 އަހަރުގެ ދިވެހި ފިރިހެނަކު ހއްޔަރުކޮށްފި އެވެ.

ފުލުހުން ވިދާޅުވީ، ބިލެތްދޫއަށް މަސްތުވާތަކެތި އެތެރެކޮށް އެ ތަކެތީގެ ވިޔަފާރިކުރާކަމަށް ފުލުހުންނަށް ލިބުނު މައުލޫމާތަކާއި ގުޅިގެން ނޮވެމްބަރު 4 ވަނަ ދުވަހު ހިންގި އެ އޮޕަރޭޝަނުގައި އޭނާ ހައްޔަރުކޮށް ބަލައިފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 80 ރަބަރު ޕެކެޓުފެނިފައިވާކަމަށެވެ.

މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ބިލެތްދޫ މެޖިސްޓްރޭޓް ކޯޓަށް ހާޒިރުކުރުމުން މިނިސްޓްރީ އޮފް ހޯމް އެފެއާޒުން ކަނޑައަޅާތަނެއްގައި ބަންދުގައި ބެހެއްޓުމަށް 10 ދުވަހުގެ މުއްދަތު ދީފައިވާކަމަށް ފުލުހުން ވިދާޅުވިއެވެ.

މި މައްސަލަ ނިލަންދޫ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.

ރާއްޖޭގައި މަސްތުވުމުގެ ވަބާ ބޮޑުވެ، މިދިޔަ މަހު ވެސް ޕްރޮސެކިއުޓާ ޖެނެރަލްގެ އޮފީހުން އެންމެ ގިނައިން ދައުވާ ކޮށްފައި ވަނީ މަސްތުވާތަކެތީގެ މައްސަލަތަކުގައި ކަން ތަފާސްހިސާބުތަކުން ދައްކަ އެވެ.