މޯލްޑިވްސް ބްރޯޑުކާސްޓިން ކޮމިޝަން (ބްރޯޑުކޮމް)އަށް ލިބެންޖެހޭ 24 މިލިއަނަށް ވުރެ ގިނަ ރުފިޔާ ހޯދުމަށް އެކަށީގެންވާ މަސައްކަތްތަކެއް ކޮށްފައި ނުވާ ކަމަށް އޮޑިޓު އޮފީހުން ޢާންމުކުރި އެ ކޮމިޝަނުގެ 2021 ވަނަ އަހަރުގެ ކޮމްޕްލަޔަންސް އޮޑިޓު ރިޕޯޓުގައި ފާހަގަކޮށްފިއެވެ.

އޮޑިޓާ ޖެނެރަލްގެ އޮފީހުން އާންމުކުރި ބްރޯޑްކޮމްގެ 2021 ވަނަ އަހަރުގެ ކޮމްޕްލަޔަންސް އޮޑިޓު ރިޕޯޓުގައި އެ ކޮމިޝަނަށް ލިބެންޖެހޭ ގިނަ އަދަދެއްގެ ފައިސާ ނުލިބި ގިނަ ދުވަސްވެފައިވާކަން ވަނީ ފާހަގަކޮށްފަ އެވެ.

މި ގޮތުން 2021 ވަނަ އަހަރުގެ ނިޔަލަށް 24.73 މިލިއަން ރުފިޔާ ނުލިބި ހުރިކަން ފާހަގަކޮށްފައިވެ އެވެ.

ބްރޯޑްކޮމްއަށް ނުލިބި ހުރި ފައިސާގެ ތެރޭގައި ހިމެނެނީ ރީބްރޯޑްކާސްޓިން ލައިސަންސް ފީ އާއި ބްރޯޑްކާސްޓިން ލައިސަންސް ފީގެ އިތުރުން ފުރީކުއެންސީ ފީ އާއި އެ ފީތަކުގެ ޖޫރިމަނާ އެވެ. 

ކޮމިޝަނުން އެ ފައިސާތައް ހޯދުމަށް އެކަށީގެންވާ މަސައްކަތްތަކެއް ނުކުރުމުގެ ސަބަބުން ނުވަތަ އެ ފައިސާ ލިބުން ލަސްވުމަކީ އޭގެ ސަބަބުން ސަރުކާރަށް ބޮޑު މާލީ ގެއްލުމަކާ ކުރިމަތިލާން ޖެހޭނެ ކަމެއް ކަމުގައި ވެސް އެ ރިޕޯޓުގައި ބަޔާންކޮށްފައިވެއެވެ.

ބްރޯޑުކާސްޓިން ކޮމިޝަންއަށް ލިބެން ޖެހޭ ފައިސާގެ ތަފްސީލު:

• 2017: 11،853،501 ރުފިޔާ
• 2018: 2,236,819 ރުފިޔާ
• 2019: 1,245,291 ރުފިޔާ
• 2020: 4,593,431 ރުފިޔާ
• 2021: 4,804,955 ރުފިޔާ
  ޖުމްލަ: 24،733،997 ރުފިޔާ

މީގެ އިތުރުން، އެ ކޮމިޝަނުގެ އަހަރީ މާލީ ހިސާބުތައް އޮޑިޓާ ޖެނެރަލްއަށް ހުށަހަޅާފައި ނުވާ ކަމަށް ވެސް އެ ރިޕޯޓުގައި ފާހަގަކޮށްފައިވެއެވެ.

އެގޮތުން ކޮންމެ މީލާދީ އަހަރެއް ނިމޭތާ ތިން މަސް ދުވަހުގެ ތެރޭގައި އަހަރީ ރިޕޯޓެއް އޮޑިޓާ ޖެނެރަލްއަށް ހުށަހެޅުމަށް ދައުލަތުގެ މާލިއްޔަތު ޤާނޫނުގެ 35 ވަނަ މާއްދާގައި ބަޔާންކޮށްފައިވީ ނަމަވެސް، 2021 ވަނަ އަހަރުގެ މާލީ ހިސާބުތައް ނިމިދިޔަ އަހަރުގެ މާރިޗު މަހުގެ 31 ގެ ކުރިން ހުށަހަޅާފައިނުވާކަން އެ ރިޕޯޓުގައި ފާހަގަކޮށްފައިވެއެވެ.

މިކަން ރަނގަޅުކޮށް، ކޮންމެ މީލާދީ އަހަރެއް ނިމުމުގެ ތިން މަސް ދުވަހުގެ ތެރޭގައި އަހަރީ ރިޕޯޓެއް އޮޑިޓާ ޖެނެރަލްގެ އޮފީހަށް ހުށަހެޅުމަށް އޮޑިޓް ރިޕޯޓުގައި އިލްތިމާސްކޮށްފައިވެއެވެ.