ބޭހުގައި ނުރައްކާތެރި ކެމިކަލް ހުރިކަން ފުރަތަމަ ހޯދީ ރާއްޖެއިން: ޑަބްލިއުއެޗްއޯ

އަލީ ރާޒީ

15 ޑިސެމްބަރ 2023 - 15:35

0 comments

މޯލްޑިވްސް ފުޑް އެންޑް ޑްރަގް އޮތޯރިޓީގެ ބޭފުޅަކު އެއްޗެއް ތަހުލީލުކުރައްވަނީ - ފޮޓޯ: ޑަބްލިއުއެޗްއޯ

ނުރައްކާތެރި ކެމިކަލް އެކުލެވޭތީ ރާއްޖޭގައި މިދިޔަ ނޮވެމްބަރު މަހު މަނާކުރި ބޭހުގައި އެ ކެމިކަލްތައް އެކުލެވޭކަން އިސްވެ ދެނެގަތީ ރާއްޖޭން ކަމަށް ވާތީ ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން ރާއްޖެއަށް ވަރަށް ބޮޑަށް ތައުރީފުކޮށްފި އެވެ.

ނުރައްކާތެރި އެ ދެ ކެމިކަލް ބޭހުގައި ހުރެގެން އެ ބޭސްތައް ރާއްޖޭގައި މަނާކުރީ މިދިޔަ މަހު 30ގައެވެ.

އެ އެޖެންސީގެ ވެބްސައިޓުގައި ބުނީ ޕާކިސްތާނުގެ ފާމިކްސް ލެބޯޓްރީސްގައި އުފައްދާ ސިރަޕްތަކުން "ޑައިއެތިލީން ގްލައިކޯލް" އަދި "އެތިލީން ގްލައިކޯލް" ދެނެގަންނަން އެމްއެފްޑީއޭއިން މަސައްކަތްކޮށް، ސިއްހަތު ހިމާޔަތް ކުރުމުގައި ނަމޫނާ ދައްކާފައިވާ ކަމަށެވެ.

ރާއްޖެއިން އެ ބާވަތުގެ ސިރަޕް ފުޅިތަކެއް އޮސްޓްރޭލިއާއަށް ފޮނުވައިގެން ހެދި ޓެސްޓުން ވަނީ ފާމިކްސް ލެބޯޓްރީސްގައި އުފައްދާ އެލާގޯ ބްރޭންޑުގެ ސިޓްރިޒެން ސިރަޕުގައި ނުރައްކާތެރި ދެ ކެމިކަލް ހުރިކަން ޔަގީން ކުރެވިފަ އެވެ. އޭގެ އިތުރުން ހޮޑު މަނާކުރަން އުފައްދާ އެމިޑޮން ސަސްޕެންޝަން ކިޔާ ބޭހުގައި ވެސް އޭގެ ކެމިކަލް ހުރިކަން އެމްއެފްޑީއޭއަށް ދެނެގަނެވުމުން، ޑަބްލިއުއެޗްއޯ އަދި ޕާކިސްތާނުގެ ޑްރަގް ރެގިއުލޭޓްރީ އޮތޯރިޓީން ވަނީ އެކަން ޔަގީންކުރަން ޓެސްޓު ހަދައިފަ އެވެ.

ޑަބްލިއުއެޗްއޯއިން ބުނީ ބޭހުގެ އެ ބާވަތުގައި ނުރައްކާތެރި އެ ކެމިކަލްތައް އެކުލެވޭކަން ދެނެގަތީ އެމްއެފްޑީއޭއިން ހިންގާ ވަސީލަތްތައް މަދު ، ނެޝަނަލް ކޮލިޓީ ކޮންޓްރޯލް ލެބޯޓްރީން ކަމަށެވެ. ރާއްޖޭން އެކަން ދެނެގަނެ ޑަބްލިއުއެޗްއޯގެ ސަމާލުކަމަށް ގެނައުމުން އެޖަމިއްޔާއިން އެކަން އިތުރަށް ކަށަވަރުކޮށް، އެހެން ގައުމުތަކަށް އެކަން އެންގި އެވެ.

"[އެމްއެފްޑީއޭގެ] އެ ހޯދުންތައް ވީ ހަމަ އެކަނި ގައުމީ ކަންބޮޑުވުމަކަށް އެކަންޏެއް ނޫނެވެ. އެހެނީ އެ އުފެއްދުންތައް، [ނުރައްކާތެރި ކެމިކަލް އެކުލެވޭ ބޭސްތައް] އެހެން ހަތަރުގައުމެއްގައި ވެސް އައީ މާކެޓްކުރަމުންނެވެ. އެހެންކަމުން އެކަން ވެގެން ދިޔައީ ދުނިޔޭގެ ފެންވަރުގައި، ސިއްހަތު ސަލާމަތްކުރަން ކުރެވުނު މަސައްކަތަކަށެވެ،" ޑަބްލިއުއެޗްއޯ ގެ ވެބްސައިޓްގައި މިއަދު ޝާއިއުކުރި ބަޔާނުގައި ބުންޏެވެ.

ބޭސް ގިނަ ދުވަހު ދަމަހައްޓައި އަގުހެޔޮކުރުމަށް މި ކެމިކަލް އަޅައިގެން ބޭސް އުފެއްދީ ޕާކިސްތާނުގެ ފާމިކްސް ލެބޯޓްރީޒް ޕްރައިވެޓް ލިމިޓެޑުންނެވެ.

ރާއްޖެއިން ދިން އެލާޓާއެކު ޕާކިސްތާނުގެ ޑްރަގް ރެގިއުލޭޓަރީ އޮތޯރިޓީއިންވަނީ އެ ކުންފުނިން އުފައްދާ ހުރިހާ ދިޔާ ބޭސްތަކެއް އުފެއްދުން މަޑުޖައްސައިލުމަށް އަންގައިފައެވެ.

ޑަބްލިއުއެޗްއޯއިންވަނީ މިއީ އެކި ގައުމުތަކުގެ ސިއްހީ އިދާރާތައް ގުޅިގެން އާންމު ސިއްހަތުގެ ރައްކާތެރިކަމަށް ބައިނަލްއަގްވާމީ ފެންވަރުގައި މަސައްކަތްކުރުމުން ނަތީޖާ ފެންނަކަން ހާމަވި ކަމެއްކަމަށް ވެސް ފާހަގަކޮށްފައެވެ.

ޑަބްލިއުއެޗްއޯ އާ ގުޅިގެން ރާއްޖޭން ކުރި އެ މަސައްކަތަކީ ތައުރީފު ހައްގު މަސައްކަތެއް ކަމަށް ވެސް އެ ބަޔާނުގައި ބުންޏެވެ.