މާލޭގެ މިސްކިތްތައް ސާފުކުރުމުގެ މަސައްކަތް ކައުންސިލުގެ ދަށަށް

އައިމިނަތު ޝިޔާޒާ

14 ފެބުރުއަރީ 2024 - 19:35

0 comments

މާލޭ ސިޓީ ކައުންސިލުގެ މިއަދުގެ ބައްދަލުވުން ފޮޓޯ/މާލޭ ސިޓީ ކައުންސިލް

މާލޭ ސަރަޙައްދުގެ މިސްކިތްތައް ފޮޅާ ސާފުކުރުމުގެ ކަންކަން ސީދާ ކައުންސިލުން ކުރިއަށް ގެންދަން ސިޓީ ކައުންސިލުން މިއަދު ނިންމައިފި އެވެ.

މާލޭ ސިޓީ ކައުންސިލުން މިއަދު ބޭއްވި ބައްދަލުވުމުގައި އިދާރީ ގޮތުން ހުށަހަޅާ މައްސަލައެއްގެ ގޮތުގައި މޭޔަރު އާދަމް އާޒިމް ހުށަހެޅުއްވީ މިހާރު ކައުންސިލުގެ ބޭރުން އެހެން ކުންފުނިތަކާ މީހުންނަށް ހަވާލުކޮށްގެން ކުރާ މަސައްކަތްތަކުގެ ނަތީޖާ ވަރަށް ދަށް ކަމަށެވެ.

އެހެންކަމުން ކައުންސިލުގެ ބެލުމުގެ ދަށުން އެކަމަށް ހާއްސަ މުވައްޒަފުން ކައުންސިލަށް ނަގައިގެން ކުރިއަށް ގެންދިއުމަށް އޭނާ ހުށަހެޅުއްވި އެވެ.

"އަޅުގަނޑު ހުށަހަޅަނީ ވީހާ ވެސް އަވަހަކަށް ކައުންސިލުން މުވައްޒަފުން ނަގައިގެން އެކަން ކުރަން. އަދި މުސްތަގުބަލުގައި މި މުވައްޒަފުންނަކީ ސިވިލް މުވައްޒަފުންނަށް ބަދަލުކޮށް އަޅުގަނޑުމެން މަސައްކަތް ކުރަމުން ދިއުމަށް." އާޒިމް ވިދާޅުވި އެވެ.

މި ޖަލްސާގައި ވާހަކަދައްކަމުން މާލޭ ސިޓީ ކައުންސިލްގެ ޑެޕިއުޓީ މޭޔަރ އަހުމަދު ނަރީޝް ވިދާޅުވީ، މިހާރު މިސްކިތްތައް ސާފުކުރުމުގެ ކަންކަން ކުރަނީ ކޮންމެ 5 ނުވަތަ 6 މިސްކިތެއް އެއްކޮށްލައިގެން ބަޔަކާ ޙަވާލުކޮށްގެން ކަމަށެވެ. މިހެން މަސައްކަތް ކުރާއިރު މިސްކިތްތަކުގެ ފާޚާނާތައް ސާފުތާހިރުކަން ކުޑަކަމުން މީހުން ޝަކުވާ ކުރާކަމަށެވެ.

މީގެ އިތުރުން ކުންފުނިތަކާއި ހަވާލުކޮށްގެން ކުރިއަތް ގެންދާއިރު އެ ކުންފުނިން ކަނޑައަޅާފައި ތިބީ ބަރާބަރަށް މޮނިޓާކޮށް ބެލަހައްޓާ ދުވަހުން ދުވަހަށް ޖަވާބުދާރީވެ، ރިޕޯޓުކުރާ މުވައްޒަފުންތަކެއް ނޫންކަމަށް ނަރީޝް ވިދާޅުވި އެވެ.

ނަރީޝް ވިދާޅުވީ ކުންފުނިތަކާއި އެ މަސައްކަތް ހަވާލު ކުރަން ޖެހުނީ ސިވިލް މުވައްޒަފުން ނެގުމުގައި ކުރީގެ ސަރުކާރުގައި ސިވިލް ސަރވިސް ކޮމިޝަނުން ކުރިމަތިކުރި ދަތިތަކުގެ ސަބަބުންކަމަށެވެ.

މިއަދުގެ ޖަލްސާގައި ވަނީ ކައުންސިލަށް ކޮންމެ އަހަރަކު ބާއްވަން ލާޒިމުކުރާ ރައްޔިތުންގެ ބައްދަލުވުން މި މަހުގެ 29 ގައި ބާއްވަން ވެސް ފާސްކޮށްފަ އެވެ.