މަދަދުގާރަކަސް ޖަވާބުދާރީ ކުރެވެން ޖެހޭނެ!

ޢަބްދުﷲ ޖުނައިދު

24 ފެބުރުއަރީ 2024 - 13:59

0 comments

ޑިމޮކްރެޓިކް ކޮންމެ ނިޒާމެއްގައިވެސް ސަރުކާރު ޖަވާބުދާރީ ކުރުވުމުގައި މަޖިލީހުގެ ދައުރަކީ އެންމެ އިސް އެއް ދައުރެވެ. ނަމަވެސް މި މެކޭނިޒަމްގެ ފައިދާ ގިނަ ފަހަރަށް ބިނާވެފައިވަނީ ސަރުކާރުގެ މެމްބަރުން އަމިއްލަ ވެރިކަމުގެ އަމަލުތަކަށް ދޫނުދޭ، ފާރަވެރިވުމުގެ ޝައުގުވެރިކަމުގެ މައްޗަށެވެ. މަޖިލިސް މެމްބަރުންނަކީ އެމީހުންގެ އަހުލުބައިތުންނަށް މަދަދުގާރުން ކަމަށްވިޔަސް ގައުމުގެ ފައިދާއަށް ވިސްނާނަމަ ބިނާކުރަނިވި ޝާމިލުވުމާއި އެއްބާރުލުން ދިނުމުގެ މުހިންމުކަން ދެނެގަންނަންވެސް ޖެހެ އެވެ. މާނައަކީ ތިމާގެ އަމިއްލަ ޟަމީރާ ދޭތެރޭ ވިސްނާ ފަދައިން ޤައުމާއި ދޭތެރޭ ވިސްނުމެވެ.

ފާއިތުވި އަހަރުތަކުގައި ސަރުކާރުގެ މެންބަރުން ހިތްވަރާއި ނަޒާހަތްތެރިކަން ދައްކައި، އަމިއްލަ ވެރިކަމުގެ އަމަލުތަކާ މެދު ޖަވާބުދާރީ ކުރުވާ ހާލަތްތައް ވެސް ހިނގާފައިވެ އެވެ.

މިސާލަކަށް ސަރުކާރަކުން ހުށަހަޅާ މަޝްރޫޢަކީ، މޫނުމަތިން ފައިދާހުރި ކަމެއް ކަމުގައި ހީވިޔަސް، ފޮރުވިފައިވާ އުނިކަންތައްތަކެއް ހުރެދާނެ ނުވަތަ އެކަށީގެންވާ ފީސިބިލިޓީ ދިރާސާތަކެއް ނެތް މަޝްރޫޢެއް ހުށަހެޅި ޙާލަތްތައް ފެނިފައި ވެއެވެ. މިފަދަ މަންޒަރުތަކުގައި މިފަދަ މަޝްރޫއުތައް އެންޑޯސް ކުރުމުގެ ނުވަތަ ހިންގުމުގެ ކުރިން ތަހުގީގު ސުވާލުތައް ކުރުމާއި، ހެކިތަކަށް ބިނާކޮށް ޖަސްޓިފިކޭޝަން ހޯދުމަށް ޑިމާންޑް ކުރުމާއި، ޑިއު ޑިލިޖެންސް އަށް ވަކާލާތު ކުރުމަކީ ޟަމީރު ޕާލަމެންޓްރީންގެ ޒިންމާއެކެވެ.

ނަމަވެސް ސަރުކާރުން ކުރިއަށް ގެންދާ ހުރިހާ މަޝްރޫއުތަކަކީ އޭގެ ޒާތުގައި އުނިކަމެއް ނުވަތަ ވިސްނުން ގޯސް މަޝްރޫއުތަކެއް ނޫންކަން ގަބޫލުކުރުން ވެސް ހަމަ އެހާމެ މުހިންމެވެ.

އާންމު މަސްލަހަތަށް ހަގީގަތުގައި ހިދުމަތްކޮށް، ގައުމުގެ އަވަސް ބޭނުންތަކަށް ހައްލެއް ހޯދައިދޭ އިސްނެގުމެއް ސަރުކާރުން ހުށަހަޅާ ހާލަތްތައް ވެސް މެދުވެރިވެދާނެ އެވެ. މިފަދަ ހާލަތްތަކުގައި މަޖިލީހުގެ މެންބަރުންގެ ފަރާތުން ރިޔާސަތާއި ހަނގުތާމަކޮށް ތަޅާފޮޅައި އިންސާނީ ހުދޫދުން ބޭރު ވައްތަރުތައް ޖައްސައި ސަރުކާރަށް ހުރަސްއެޅުމަކީ ގައުމުގެ ކުރިއެރުމަށް އެޅޭ ހުރަހެކެވެ.

"އެކަމަކު އެމީހުންނަކީ ކޮންމެހެން ސަރުކާރަށް އުނދަގޫކޮށް ދުއްޕާން ކުރާ ބަޔަކަށް ވާކަށް ނުޖެހޭ، ގައުމުގެ ހައްގުގައި މަސައްކަތް ކުރާނެ ވަކި މިންގަނޑުތަކެއް ހުންނާނެ، އެހެންވީމަ ސަރުކާރުން ގެންނަ ރަނގަޅު މަޝްރޫއުތަކަށް ނޫނެކޭ ބުނުމަކީ އޭގެ ޒާތުގެ ރަނގަޅު ކަމެއް ނޫން” ރައީސް ޔާމީން ވިދާޅުވި އެވެ.

މީގެ އިތުރުން ސަރުކާރާއި މަޖިލީހާއި ދެމެދު ބިނާކުރަނިވި ގުޅުމެއްގެ ސަބަބުން ހުށަހަޅާ މަޝްރޫއުތައް ރަނގަޅުކޮށް ރީފައިންކޮށް، ގައުމީ އިސްކަންދޭ ކަންކަމާ އެއްގޮތްވުމާއި، މާލީ ޒިންމާއަށް ތަބާވުމާއި، އަޚްލާޤީ މިންގަނޑުތައް ދަމަހައްޓައިދެވޭނެ އެވެ. ފާޅުކަން ބޮޑު ގޮތެއްގައި މަޝްވަރާކުރުމާއި އެއްބާރުލުން ދިނުމުގެ ސަގާފަތެއް އާލާކޮށްގެން، ވެރިކަން ހިންގުމުގެ ފެންވަރާއި ފައިދާ އިތުރުކުރުމުގައި މަޖިލީހުގެ މެންބަރުންނަށް މުހިންމު ދައުރެއް އަދާކުރެވިދާނެ އެވެ.

ނަމަވެސް ސަރުކާރު ޖަވާބުދާރީ ކުރުވުމާއި، ކޮންމެހެން ބޭނުން ނުވާ އުނދަގުލެއް ނުވަތަ ސިޔާސީ ބަދަލު ހިފުމުގައި ބައިވެރިވުމާ ދެމެދު ސާފު ތަފާތެއް ހެދުމަކީ ކޮންމެހެން ބޭނުންތެރި ކަމެކެވެ. މަޖިލީހުގެ މެންބަރުން އެމީހުންގެ އޯވަރސައިޓް ޒިންމާތައް އަދާކުރަންވާނީ ޕްރޮފެޝަނަލިޒަމްއާއި، ނަޒާހަތްތެރިކަމާއި، އެމީހުން ތަމްސީލުކުރާ ރައްޔިތުންގެ މަސްލަހަތަށް ޚިދުމަތް ކުރުމަށް އަސްލު ވަޢުދުވުމަކާއެކުގަ އެވެ. ޕާޓީގެ ފައިދާއަށްޓަކައި ސާބިތު ނުހިފޭ ހަމަލާތަކެއް ނުވަތަ ސަރުކާރު ފުނޑުފުނޑު ކުރަން ކުރާ މަސައްކަތްތަކަކީ ހަމައެކަނި ޑިމޮކްރެޓިކް ޕްރޮސެސްއަށް އާންމުންގެ އިތުބާރު ގެއްލި، މާނަހުރި ކުރިއެރުމަށް ހުރަސްއެޅޭ ކަންކަމެވެ.

ރައްޔިތުންގެ މެދުގައި އިކޮނޮމިސްޓުގެ ނަމުން ލަގަބު ލިބިފައިވާ މިހާރު ބަންދުގައި ހުންނެވި ކުރީގެ ރައީސް ޔާމީން ވިދާޅުވީ ގައުމަށް ފައިދާވާނީ ވެރިކަންކުރާ ޕާޓީގެ މެޖޯރިޓީ މަޖިލީހުގައި ނެތުމުންނެވެ. ސަބަބެއްކަމަށް ދެއްކެވީ ސަރުކާރު ޖަވާބުދާރީ ކުރުވުމެވެ. ނަމަވެސް ރައީސް ޔާމީނުގެ ވެރިކަމުގައި އެއްއިރެއްގައި ފެނުނީ ހުރިހާ ބާރެއް އެކުއެކީގައި އަތްޖަހަން އުޅުނު މަންޒަރެވެ. ވަކި ބޭފުޅެއް އެއީ މަދަދުގާރު ކަމުގެ ލޭބަލް ވެފައިވި މަންޒަރެވެ. ތޮށިގަނޑު ފަޅާލާފައި ނުކުތް ބަޔަކު ނުކުތީ ކާން ނުލިބިގެނެއް ނޫނެވެ. ތަރައްގީ ނުވެގެނެއްވެސް ނޫނެވެ.

ސަރުކާރު ޖަވާބުދާރީ ކުރުވުމުގައި މަޖިލީހުގެ ދައުރަކީ ކޮންމެހެން ބޭނުންތެރި ދައުރެއް ކަމުގައި ވިޔަސް، އެކަން ކުރަން ޖެހޭނީ ވިސްނުންތެރިކަމާއި ޒިންމާދާރުކަމާއެކުގަ އެވެ. ރައްޔިތުންގެ މަސްލަހަތު ކުރިއެރުވުމުގެ އާންމު އަމާޒަށް ގުޅިގެން މަސައްކަތް ކުރުމާއެކު، ހާމަކަން ބޮޑުކަމާއި ޖަވާބުދާރީވުމުގެ މިންގަނޑުތައް ދަމަހައްޓައި، ބެލުމާއި އެއްބާރުލުމާ ދެމެދު ނާޒުކު ބެލެންސެއް ގާއިމް ކުރުމަށް ރައްޔިތުންގެ މަޖިލީހުގެ މެމްބަރުން މަސައްކަތް ކުރަން ޖެހެ އެވެ. އެގޮތަށް ކަންތައް ކުރުމުން، އިންތިޚާބުކުރާ ފަރާތްތަކަށް ވާޖިބު އަދާކޮށް، ހެޔޮވެރިކަމާއި ދެމެހެއްޓެނިވި ތަރައްޤީ ކުރިއެރުވުމަށް ޙިއްޞާ ކުރެވޭނެ އެވެ.