ދުނިޔޭގެ މުވާސަލާތާއި މައުލޫމާތުގެ ދާއިރާގެ ދުވަސް ދިރާގުން ފާހަގަކޮށްފި

ހަސަން ހަލީމް

17 މެއި 2024 - 16:00

0 comments

ދިރާގުން ދުނިޔޭގެ ޓެލެކޮމިއުނިކޭޝަން ދުވަސް ކުލަ ގަދަކޮށް ދިރާގުން ފާހަގަކުރުން

ދުނިޔޭގެ ޓެލެކޮމިއުނިކޭޝަން އެންޑް އިންފޮމޭޝަން ސޮސައިޓީ ދުވަސް ފާހަގަ ކުރުމުގެ ގޮތުން ދިރާގުން ހާއްސަ ހަރަކާތެއް ބާއްވައިފި އެވެ.

ދިރާގުން މި ދުވަސް ފާހަގަކޮށްފައިވަނީ މިއަދު މޯލްޑިވްސް ނެޝަނަލް ޔުނިވާސިޓީގައި ބޭއްވި ހާއްސަ ހަފްލާއެއްގައެވެ. އެ ހަފްލާފައި ކޮމިއުނިކޭޝަން އޮތޯރިޓީގެ ޗީފް އެކްޒެކިއުޓުވް އިލްޔާސް އަހުމަދާއި ދިރާގުގެ ސީއީއޯ އިސްމާއީލް ރަޝީދު ބައިވެރިވެވަޑައިގެންނެވިއެވެ. އަދި ދިރާގު މެނޭޖްމެންޓްގެ އެކި ބޭފުޅުންނާއި އެމްއެންޔޫގެ ދަރިވަރުން ވެސް ބައިވެރިވެވަޑައިގެންނެވި އެވެ.

އެ ރަސްމިއްޔާތުގައި ވާހަކަދައްކަވަމުން ދިރާގުގެ ސީއީއޯ އިސްމާއީލް ރަޝީދު ވިދާޅުވީ ޑިޖިޓަލް ހަކަތަ ބޭނުންކޮށްގެން މުޖްތަމައަށާއި ތިމާވެށްޓަށް ފަހިގޮތްތައް ހޯދައިދިނުމަށް މަސައްކަތް ކުރައްވާނެ ކަމަށެވެ.

ކޭމްގެ ޗީފް އެގްޒެކެޓިވް އިލްޔާސް ވަނީ އެ ދާއިރާއިން އީޖާދީ ހިޔާލުތަކަށް ޒުވާނުންނަށް ބާރު އަޅައިފަ އެވެ.

"ޑިޖިޓަލް އިނޮވޭޝަން ފޯ ސަސްޓެއިނަބަލް ޑިވެލޮޕްމަންޓް" އާ ގުޅޭ ގޮތުން ބޭއްވި އެ ޕެނަލް ޑިސްކަޝަންގައި ވަނީ ދާއިރާ ކުރިއަށް ގެންދިއުމުގައި ދެމެހެއްޓެނިވި ގޮތްތައް ބޭނުން ކުރުމުގެ މުހިއްމުކަން ފާހަގަ ކޮށްފަ އެވެ.

ޕެނަލް ޑިސްކަޝަންގައި ވަނީ ދެމެހެއްޓެނިވި ތަރައްގީ ކަށަވަރު ކުރުމުގައި ޑިޖިޓަލް އިނޮވޭޝަންގެ މުހިއްމު ކަމާއި އީޖާދީ ގޮތްތައް ބޭނުންކޮށްގެން ސަރުކާރާއި ވިޔަފާރިތަކާއި މުޅި މުޖުތަމައަށް އަންނާނެ ހެޔޮ ބަދަލުތަކުގެ ވާހަކަތައް ހިއްސާކޮށްފަ އެވެ.

މިއަދަކީ ދުނިޔޭގެ "ޓެލެކޮމިއުނިކޭޝަން އެންޑް އިންފޮމޭޝަން ސޮސައިޓީ ޑޭ" ނުވަތަ މުވާސަލާތީ ދުވަހެވެ. އިންޓަނޭޝަނަލް ޓެލެކޮމިއުނިކޭޝަން ޔޫނިއަންއިން ކޮންމެ އަހަރެއްގެ މޭމަހުގެ 17 ވަނަ ދުވަސް ފާހަގަކުރަނީ ދުނިޔޭގެ މުވާސަލާތީ ދުވަހުގެ ގޮތުގައެވެ. މި ދުވަސް ފާހަގަކުރަން ނިންމާފައިވަނީ 2006 ވަނަ އަހަރުގަ އެވެ.