އަކްރަމް، ކުރީގެ މެންބަރު މުސްތަފާއަށް މިލިއަނެއްހާ ރުފިޔާ ދައްކަން ހުކުމްކޮށްފި

އައިމިނަތު ޝިޔާޒާ

20 މެއި 2024 - 12:39

0 comments

ރައްޔިތުންގެ މަޖިލީހުގެ ތިމަރަފުށީ ދާއިރާގެ ކުރީގެ މެންބަރު މުޙައްމަދު މުސްތަފާއަށް އެއް މިލިއަނަށްވުރެ ގިނަ ރުފިޔާ ދައްކަން ސިވިލް ކޯޓުން ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު، އަކްރަމް ކަމާލުއްދީންގެ މައްޗަށް ހުކުމްކޮށްފި އެވެ.

ސިވިލް ކޯޓުން އިއްޔެ އަކްރަމްގެ މައްޗަށް އެ ހުކުމް އިއްވީ އަނބުރާ ދޭ ގޮތަށް މުސްތަފާ އަތުން އަކްރަމް ނަގާފައިވާ ފައިސާގެ މައްސަލައަކާ ގުޅިގެންނެވެ. އެގޮތުން އެ މައްސަލައިގައި މުސްތަފާ އަށް 400،000ރ. އާއި 50،000 ޑޮލަރު، އަންނަ ޖުލައި މަހުގެ 19 ވަނަ ދުވަހުގެ ކުރިން ދައްކަން ހުކުމްކޮށްފައިވެ އެވެ.

ފައިސާ ދައްކަން އަކްރަމްގެ މައްޗަށް ނެރުނު ހުކުމްގައިވާ ގޮތުން އަކްރަމް ވަނީ އެކި ފަހަރު މަތިން މުސްތަފާ އަތުން އެތައް މިލިއަން ރުފިޔާއެއް ނަގައިފަ އެވެ. އަދި އަކްރަމް އަތުން ނަގައި ދިނުމަށް ކޯޓުގެ ހުކުމްގައިވާ ފައިސާ އަކީ ދެ ފަރާތުގެ ވާހަކަތަކުންނާއި ލިޔެކިޔުންތަކުން ސާބިތުވާ ފައިސާ އެވެ.

އެ ފައިސާ ދިނުމަށް އިންކާރު ކުރައްވައި އަކްރަމް އެންމެ ކުރިން މަސައްކަތް ކުރައްވާފައިވަނީ އިޖުރާއީ ގޮތުން މައްސަލަ ބޭރު ކުރާށެވެ. އެއީ ދައުވާ ބިނާކޮށްފައިވާ މުއާމަލާތަކީ ބޭންކަކުން ނުވަތަ މާލީ އިދާރާއަކުން ލައިސެންސް ލިބިގެން ނޫނީ ކުރިއަށް ނުގެންދެވޭނެ މުއާމަލާތެއް ކަމަށް ކަނޑައަޅައިގެންނެވެ. ނަމަވެސް ކޯޓުން އެ އިޖުރާއީ ނުކުތާ ބަލައި ނުގަނެ، ނިންމީ މައްސަލަ ކުރިއަށް ގެންދާށެވެ.

ހުކުމުގައި އަންގާފައިވަނީ 19 ޖުލައިގެ ކުރިން އަކުރަމް މުސްތަފާއަށް 400،000ރ. އާއި 50،000 ޑޮލަރު (ޖުމްލަ ގާތްގަނޑަކަށް 1,173,000 ރ.) ދެއްކުމަށެވެ.