ގުރައިދޫ މަރުކަޒުގައި އުފާވެރި ރާސްތާ ޕްރޮގްރާމް ފަށައިފި

މަރިޔަމް އަނާ

18 ޖޫން 2024 - 23:21

0 comments

ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒުގައި ތިބި އުމުރުން ދުވަސްވީ މީހުން، މުޖުތަމައުއަށް ނެރުމަށް އަހުލުވެރިކުރުމަށް ހާއްސަ ޕްރޮގްރާމެއް ފަށައިފި އެވެ.

"އުފާވެރި ރާސްތާ" ގެ ނަމުގައި ފެށި ޕްރޮގްރާމްގައި ދައުލަތުގެ ބެލުމުގެ ދަށުގައި ތުބި 60 އިސްރައްވެހިން ބައިވެރިވެ އެވެ.

މި ކަމާއި ގުޅުވައި މައުލޫމާތު ދެމުން އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ބުނީ، މި ޕްރޮގްރާމަކީ އުމުރުން ދުވަސްވީ މީހުންގެ ތެރެއިން މަރުކަޒު ކުރެވިފައިވާ ފަރާތްތަކަށް އިޖުތިމާއީ ހަރަކާތްތައް ހިމެނޭހެން ފޯރުކޮށްދޭ މައުލޫމާތު ސެޝަންތަކެއް ކަމަށެވެ.

އެގޮތުން، މި ޕްރޮގްރާމްގެ ތެރެއިން އެކި ދާއިރާތަކުގައި މަސައްކަތްކުރައްވާ ފަންނީ ބޭފުޅުން މައުލޫމާތު ދެއްވާއިރު، ޕްރޮގްރާމް ހިންގުމުގެ މަގްސަދަކީ ގުރައިދޫ މަރުކަޒުގައި ފަރުވާ ހޯދާ އިސްރަށްވެހިން މުޖުތަމައުއަށް ނެރުމަށް އަހުލުވެރި ކުރުވުމާއި ދުޅަހެޔޮ ސިއްހަތެއްގައި ދެމިތިބުމަށް އެހީތެރިވުން ކަމަށް އެ ވުޒާރާއިން ބުނެއެވެ.

މި ޕްރޮގްރާމްގައި މަޢުލޫމާތު ދެނީ އެކި ދާއިރާ ތަކުގައި މަސައްކަތްކުރައްވާ ފަންނީ ބޭފުޅުންނެވެ. އެގޮތުން ސެޝަންތަކުގައި މަޢުލޫމާތު ދިނުމަށް، ނަރުހުންނާއި ސޯޝަލް ވޯކަރުން ބައިވެރިވެ އެވެ.

ދައުލަތުގެ ބެލުމުގެދަށުގައި ތިބި މީހުން އާއިލާތަކާ ގުޅުވައިދީ، އާއިލީ ލޯބި ހޯދައިދިނުމަށް މުހިންމު ޕްރޮގްރާމްތަކެއް އިޖުތިމާއީ އަދި އާއިލީ ތަރައްގީއާއި ބެހޭ ވުޒާރާއިން ވަނީ ފައްޓަވާފަ އެވެ. އެގޮތުން އާއިލާތަކާ ވާހަކަދައްކާ، އާއިލާތަކަށް ބޭނުންވާ އެހީތެރިކަން ދަޢުލަތުން ލިބޭގޮތަށް، ދައުލަތުގެ ބެލުމުގެ ދަށުގައި ތިބި އުމުރުން ދުވަސްވީ މީހުން އާއިލާގެ ބެލުމުގެ ދަށަށް ބަދަލުކުރުމުގެ ޕްރޮގްރާމް ދަނީ ކުރިއަށްގެންދަމުންނެވެ.

މީގެއިތުރުން އިސްރަށްވެހިންގެ ހަރަކާތްތެރިކަން މުޖުތަމަޢުގައި އިތުރުމަށް "އިސްރަށްވެހިންގެ މަރުކަޒު"ތައް ރާއްޖޭގެ އެކި ހިސާބުތަކުގައި ތަރައްގީކުރުމުގެ މަސައްކަތްވެސް ސަރުކާރުން ދަނީ ކުރަމުންނެވެ.