އަމްބާނީގެ ދަރިފުޅުގެ ކައިވެނީގެ ހަފްލާގައި ނަޝީދު ބައިވެރިވެވަޑައިގެންފި

އަލީ ރާޒީ

13 ޖުލައި 2024 - 23:28

0 comments

އިންޑިއާގެ މަހުޖަނެއް ކަމަށްވާ މުކޭޝް އަމްބާނީގެ ހަގު ދަރިފުޅު، އާނަންތު އަމްބާނީގެ އަގުބޮޑު ކައިވެނި ހަފްލާގައި ކުރީގެ ރައީސް، މުހައްމަދު ނަޝީދު ބައިވެރިވެވަޑައިގެންފި އެވެ.

ގައުމުތަކުގެ ބައެއް އިސް ވެރީންނާއި ސިޔާސީ ލީޑަރުންނާއި އެކި ދާއިރާތަކުން ފާހަގަކޮށްލެވޭ ބޭފުޅުންނާއި ދުނިޔޭގެ މަޝްހޫރު ފަންނާނުން ބައިވެރިވި ކައިވެނީގެ މި ހަފްލާ ގައި ދިވެއްސަކަށް ބައިވެރިވެޑައިގެންނެވީ ރައީސް ނަޝީދު އެކަނި ކަމަށް ވެ އެވެ.

އެެމަނިކުފާނު ގެންގުޅުއްވާ "އަނެއް ދިވެހިރާއްޖެ" އެކައުންޓުން ވަނީ ކައިވެނި ހަފްލާގެ މަންޒަރެއް ޕޯސްޓް ވެސް ކުރައްވާފަ އެވެ.

ނަޝީދުގެ އިތުރުން ދުނިޔޭގެ އެހެން ބައެއް ގައުމުތަކުގެ ލީޑަރުން ވެސް މި ހަފުލާއަށް ވަޑައިގެންނެވި އެވެ. އޭގެ ތެރޭގައި އިނގިރޭސިވިލާތުގެ ކުރީގެ ބޮޑުވަޒީރު ޓޯނީ ބްލެއާ އާއި ބޮރިސް ޖޯންސަންސް ވެސް ހިމެނެ އެވެ. އަދި އެމެރިކާގެ ކުރީގެ ސެކްރެޓަރީ އޮފް ސްޓޭޓް ޖޯން ކެރީ ވެސް ވަޑައިގަތެވެ.

މިއީ މި އަހަރުގެ ބޮޑު ކައިވެނީގެ ހަފްލާ އެވެ. މި ސަރަހައްދުގެ އެންމެ މުއްސަދި މީހަކީ މުކޭޝް އަމްބާނީ އެވެ. އޭނާގެ ހަގު ދަރިފުޅުގެ ކައިވެނީގެ ހަރަކާތްތައް ފެށިތާ އެތައް ދުވަހެއް ވެއްޖެ އެވެ. ކައިވެނީގެ އެކި ހަރަކާތްތަކަށް 600 މިލިއަން ޑޮލަރާ ގާތް ކުރާ އަދަދަކަށް ފައިސާ ހަރަދު ކުރި ކަަމަށް ރިޕޯޓްތައް ބުނެ އެވެ.