މި އަހަރުގެ ގްލޯބަލް ސިޓިޒަން އެވޯޑު ކުރީގެ ރައީސް ނަޝީދަށް

އައިމިނަތު ޝިޔާޒާ

28 ނޮވެމްބަރ 2024 - 22:27

0 comments

ނަޝީދު، ގްލޯބަލް ސިޓިޒަން މެޑަލް އަޅުއްވައިގެން.-

އިންޓަނޭޝަނަލް ރެސިޑެންސް އެންޑް ސިޓިޒެންޝިޕް އެޑްވައިޒަރީ ފާމު ހެންލީ އެންޑް ޕާޓްނާޒް އިން ދޭ ގްލޯބަލް ސިޓިޒަން އެވޯޑު ކުރީގެ ރައީސް މުހައްމަދު ނަޝީދުއަށް ލިބިއްޖެ އެވެ.

ތިމާވެށި ހިމާޔަތްކުރުމާއި އިންސާނީ ހައްގުތަކަށް ވަކާލާތުކުރުމުގެ ރޮނގުން ނަޝީދު ކުރެއްވި މަސައްކަތުގެ އަގުވަޒަންކޮށް އެވޯޑު ދެއްވީ، ރެސިޑެންސް އެންޑް ސިޓިޒަންޝިޕްގެ ތަޖުރިބާކާރު ފާމް، ހެންލީ އެންޑް ޕާޓްނާސް އިން ސިންގަޕޫރުގައި ބާއްވާ 18 ވަނަ ކޮންފަރެންސްގަ އެވެ.

އެ އެވޯޑާ އެކު، އިޓަލީގެ މަޝްހޫރު އާޓިސްޓެއް ކަމަށްވާ އެންޓޯނިއޯ ނޯސެރާ ޑިޒައިންކޮށްފައިވާ މެޑަލަކާއި ގްލޯބަލް ސިޓިޒަން އެވޯޑް ކޮމިޓީގެ ޗެއާމަން ސޮއިކުރެއްވި ސެޓްފިކެޓު އަދި 20،000 ޑޮލަރު ލިބިވަޑައިގަންނަވާނެ އެވެ.

ރާއްޖޭގެ ސިޔާސީ ދާއިރާއިން ދުރަށް ވަޑައިގެން ނަޝީދު މިހާރު ދިރިއުޅުއްވަނީ ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްގެ މަސްއޫލިއްޔަތުތައް އަދާކުރެއްވުމަށް ގާނާގަ އެވެ.

މި އެވޯޑާއެކު ގިނަ ބަޔަކު ނަޝީދަށް މަރުހަބާ ދަންނަވަމުން ދާއިރު، އެމަނިކުފާނުގެ ސިޔާސީ ޕާޓީ ދަ ޑިމޮކްރެޓްސް އިން ވެސް ވަނީ މަރުހަބާގެ ބަޔާނެއް ނެރެފަ އެވެ. އެ ބަޔާނުގައި ނަޝީދު ރާއްޖެއަށް އަދި ބައިނަލްއަގުވާމީ މުޖުތަމަށް ކުރައްވަމުން ގެންދަވާ ހިދުމަތާއި ހޯއްދަވަމުން ގެންދަވާ ގިނަގުނަ ކާމީޔާބީތަކަށް ވަނީ މަރުހަބާއާއި ޝުކުރު އަދާކޮށްފަ އެވެ.