މުސްލިމުންގެ ގިނަ ބަޔަކަށް ގުދުސްގެ ނަން މެނުވީ ނެނގޭ ކަހަލަ: ހުތުބާ

އިބްރާހިމް އާދަމް

16 އޯގަސްޓް 2024 - 14:08

0 comments

ގުދުސް އަކީ ޔަހޫދީންގެ ބިމެއްކަން ސާބިތުކޮށްދޭން ކިތަންމެ ވަރަކަށް އުޅުނަސް އެއީ ފަލަސްތީނުގެ ބިމެއް ކަމަށާއި މުސްލިމުންގެ ގިނަ ބަޔަކަށް ވެސް ގުދުސްގެ ނަން މެނުވީ ނެނގޭ ކަހަލަ ކަމަށް މިއަދުގެ ހުކުރު ހުތުބާގައި ބުނެފި އެވެ.

ހުކުރު ހުތުބާގައި ބުނީ ފަލަސްޠީނުގެ މައްސަލައަކީ ހަމައެކަނި ފަލަސްޠީނު މީހުންގެ މައްސަލައެއް ނޫން ކަމަށާއި އެއީ ހަމަ އެކަނި ޢަރަބީންގެ މައްސަލައެއް ވެސް ނޫން ކަމަށެވެ. އެއީ ހުރިހައި މުސްލިމުންގެ މައްސަލައެއް ކަމަށެވެ.

މި ބިމުގައި ދާއޫދުގެފާނާއި ސުލައިމާނުގެފާނު ބިނާކުރެއްވި ހައިކަލު ހޯދުމުގެ ނަމުގައި މިއަދު ޒަޔަނިސްޓުން މަސްޖިދުލްއަޤްޞާގެ ވަށައިގެން ކޮންނަމުން ދާ ދިޔުމަކީ، މި މާތް މިސްކިތްކޮޅު ނައްތައިލުމުގެ ނުބައި މަޤްޞަދުގައި ހިންގަމުންދާ ޖަރީމާއެއް ކަމަށާއި އެއީ ބައިނަލްއަޤްވާމީ ހުރިހައި ޤާނޫނުތަކާއި ގަރާރުތަކަށް ގޮންޖަހަމުން ކުރިއަށް ގެންދާ ޢުދުވާނެއް ކަމަށް ބުނެފައިވެ އެވެ.

ގުދުސުގެ މައްސަލައަކީ އިސްލާމްދީނާ ވަކިނުކުރެވޭނެ މައްސަލައެއް ކަމަށާއި އެއީ މުސްލިމުންގެ ބިމެއް ކަމަށް ހުކުރު ހުތުބާގައި ބުންޏެވެ.

"މިއަދު މުސްލިމުންގެ ގިނަ ބަޔަކަށް ޤުދުސްގެ ނަން މެނުވީ ނެނގޭ ކަހަލަ އެވެ. ޒަޔަނިސްޓުންގެ އަޑުގަދަ ދުންމާރިއާއި މީޑިޔާގެ ޒަރީޢާއިން އެއީ ޔަހޫދީންގެ ބިމެއްކަމުގައި ސާބިތުކޮށްދެވޭތޯ މަސައްކަތްކުރިޔަސް އެއީ ހަމަ މުސްލިމުންގެ ބިމެކެވެ. ފަލަސްޠީނު މީހުންގެ ބިމެކެވެ،" ހުތުބާގައި ބުންޏެވެ.

ހުތުބާގައި ބުނީ ޔަހޫދީންނާއި އެބައިމީހުންގެ ބައިވެރީންގެ ހީލަތްތެރި ރޭވުމުގެ ދަށުން، ފުރަތަމަ ބޮޑު ހަނގުރާމައަށް ފަހު، އިސްލާމީ ހިލާފަތު ވައްޓައިލައި، ފަލަސްތީނު އިނގިރޭސި ވެރިކަމުގެ ދަށަށް ގެންދިޔަ ކަމަށެވެ.

ޔަހޫދީންގެ މަކަރާއި ޙީލަތާއި އޮޅުވައިލުމުގެ ތެރެއިން، ފަލަސްޠީނުގައި އެ މީހުންނަށް ވަޒަނެއް ހަދައިދިނުމުގައި އެހީތެރިވުމުގެ ވަޢުދެއް އިނގިރޭސީންގެ އަތުން، ޔަހޫދީން ހޯދީ ކަމަށް ހުތުބާގައި ވަނީ ބުނެފަ އެވެ.

ފަލަސްޠީނުގެ ގާޒާގައި ޒަޔަނިސްޓުން ހިންގަމުންދާ ނަސްލު ނައްތާލުމުގެ އަނިޔާވެރި ޢަމަލުތަކަކީ މި ފަހުގެ ތާރީޚުގައި ދުނިޔެ ދެކެފައިނުވާ ފަދަ އަނިޔާވެރި ކަމެއް ކަމަށާއި މަތިން އަޅަމުންދާ ބޮންތަކުންނާއި ތިރިން ދޭ ޙަމަލާތަކުން ކޮންމެ ދުވަހަކު އެތައް މުސްލިމުންނެއް ޝަހީދުވަމުންދާކަން ހުތުބާގައި ފާހަގަކޮށްފައިވެ އެވެ.