ޕީޖީ ޝަމީމު ވަކިކުރަން ނަގާ ވޯޓު މިރޭގެ ޖަލްސާއަށް އެޖެންޑާކޮށްފި

ހަސަން ހަލީމް

22 އޯގަސްޓް 2024 - 15:36

0 comments

ޕްރޮސެކުއުޓާ ޖެނެރަލް ހުސައިން ޝަމީމް، ޕީޖީ ކަމުން ވަކިކުރަން މަޖިލީހުގެ ޖުޑީޝަރީ ކޮމިޓީން މިއަދު ނިންމާފައިވާ ނިންމުމާ މެދު ގޮތެއް ނިންމުމަށް މިރޭ މަޖިލީހުގެ ޖަލްސާއެއް ބޭއްވުމަށް ނިންމައިފި އެވެ.

މިދިޔަ ހަފްތާ އަންގާރަ ދުވަހު ޖުޑީޝަރީ ކޮމިޓީއަށް ވެރިކަން ކުރާ ޕީއެންސީގެ ފަރާތުން ހުށަހެޅި މި މައްސަލައަށް ޖަވާބުދާރީވުމަށް ޝަމީމު މިއަދު އެ ކޮމިޓީއަށް ހާޒިރުކޮށްފައިވެ އެވެ.

އެެ ބައްދަލުވުން ހުޅުވާލައިގެން ކުރިއަށް ގެންދިޔުމަށް ޝަމީމު އެދިފައި ވަނިކޮށް، ކޮމިޓީން މައްސަލަ ކުރިއަށް ގެންގޮސް އޭނާ ވަކިކުރަން ނިންމީ ސިއްރުކޮށްގެން މިއަދު ބޭއްވި ބައްދަލުވުމެއްގަ އެވެ.

އެ މައްސަލައިގައި ޕީޖީ ޝަމީމް ވަނީ އޭނާ މަގާމުން ވަކިކުރަން އުޅެނީ ކޮރަޕްޝަންގެ ތެރެއިން ޕީޖީ އޮފީހަށް ނުފޫޒު ނުފޯރުވޭތީ ކަމަށް ވިދާޅުވެފަ އެވެ. އޭނާ ތުހުމަތުކުރެއްވި ގޮތުގައި އޭނާއަށް 'ކުރިން ޖަވާބުދީ ބާވެފައި' ހުރި ތުހުމަތުތަކެއް ކޮށްގެން އުޅެނީ ނުރަނގަޅު ނިޔަތެއްގައި ކަމަށެވެ.

މިއަދު އޭނާ ބޭއްވި ނޫސްވެރިންގެ ބައްދަލުވުމުގައި ވިދާޅުވި ގޮތުގައި ވޭތުވެދިޔަ ހަތަރު އަހަރު އެ މަގާމުގައި ހުންނަވައިގެން މަސައްކަތް ކޮށްފައި ވަނީ، މިނިވަންކަމާއެކު ވަކި ފަރާތެއް ނުފޫޒަކަށް ބޯނުލަބައި، ގާނޫނީ އިމުގެ ތެރޭންނެވެ.

ޝަމީމް މަގާމުން ވަކިކުރަން ޝާހިދު ހުށަހެޅުއްވީ މައިގަނޑު ކަންތައްތަކެއް ފާހަގަކުރައްވައިފައެވެ. އެއީ:

ރޭޕުގެ ތުހުމަތުކުރެވުނު ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ ފައިލްކުރުން
ކުރީގެ ޔޫތު މިނިސްޓަރު އަހުމަދު މަހުލޫފުގެ މައްސަލަ ފައިލްކުރުން
ސަފާރީ ރޭޕް ކޭސް މައްސަލައިގައި ދަށު ކޯޓުން ނިންމި ނިންމުން އިސްތިއުނާފު ނުކުރަން ނިންމުން
މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ކްރިމިނަލް ކޯޓަށް ހުށަހެޅި ހިއުމަން ޓްރެފިކިން ދައުވާ އަނބުރާ ގެނައުން
ބަނގުރާ ބުއިމުގެ 77 މައްސަލައެއް އަނބުރާ ގެނައުން
އެއްޖިންސުން ގުޅުން ހިންގުމުގެ 13 މައްސަލައެއް އަނބުރާ ގެނައުން
ޕީޖީ އޮފީހުގެ ޕްރޮސިކިއުޓަރު އަދި ތަރުޖަމާނު އަހުމަދު ޝަފީއުއަށް ކުރެވޭ އެއް ޖިންސުން ގުޅުން ހިންގުމާއި، މަސްތުވާތަކެތި ބޭނުންކުރުމާއި، ރަސޫލާއަށް ފުރައްސާރަ ކުރުމުގެ ތުހުމަތުތަކުގެ މައްސަލަ ބަލަން ދެކޮޅު ހެދުން
ވެންޓިލޭޓަރު މައްސަލައިގައި ދައުވާ ނުކުރަން ނިންމުން