ޕީޖީގެ މަގާމުން ޝަމީމް އިސްތިއުފާ ދެއްވައިފި

ހަސަން ހަލީމް

22 އޯގަސްޓް 2024 - 21:26

0 comments

ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމް މަގާމުން އިސްތިއުފާ ދެއްވައިފި އެވެ.

އޭނާ އިސްތިއުފާ ދެއްވީ މަގާމުން ވަކި ކުރަން ރައްޔިތުންގެ މަޖިލީހުގައި މިރޭ ވޯޓަށް އަހަން ޖަލްސާ ކުރިއަށްދަނިކޮށެވެ.

"އަޅުގަނޑުގެ މައްޗަށް ތުހުމަތުކުރެވޭ ކަންކަން އާންމުކޮށް އިއުލާނު ކުރައްވާފައި، އެ ކަންކަމަށް އަޅުގަނޑު ދޭން އޮތް ޖަވާބު، އާންމުންނަށް ނުއިވޭގޮތަށް ސިއްރުކުރުމަކީ، އަދުލް އިންސާފުގެ ހަމަތަކާއި ނެޗުރަލް ޖަސްޓިސްގެ އުސޫލުތަކާވެސް ހިލާފު ކަމަކަށްވާތީ، މިކަންކަމާ އިހުތިޖާޖުކުރުމުގެ ގޮތުން، ގާނޫނުއަސާސީގެ 226 ވަނަ މާއްދާގައިވާ ގޮތުގެ މަތިން، ޕްރޮސިކިއުޓާ ޖެނެރަލްގެ މަޤާމުން އަޅުގަނޑު އިސްތިއުފާ ދީފިން،"

ޝަމީމް މަގާމުން ވަކި ކުރުމަށް ހުޅުދޫ ދާއިރާގެ ޕީއެންސީ މެންބަރު، މުހައްމަދު ޝާހިދު ހުށަހެޅި މައްސަލަ މަޖިލީހުގެ ޖުޑީޝަރީ ކޮމިޓީން ފާސްކޮށް ތަޅުމަށް ފޮނުވީ މިއަދު އެވެ. އޭނާ މަގާމުން ވަކިކުރަން މައްސަލަ މިރޭ ކުރިއަށް ގެންދިޔައީ މަޖިލިސް ދައުރު ނިމުމުގެ ކުރިން އެކަން ނިންމުމަށެވެ.

ޝަމީމް ވިދާޅުވީ ސަރުކާރު ބަދަލުވުމުން ބައެއް މިނިސްޓަރުންނާ ބައްދަލުވުމުން އޭނާގެ މަސައްކަތާ ބެހޭ ޝަކުވާއެއް އޮތްތޯ ކުރިން ބައްލަވާފައިވާ ކަމަށެވެ. އެގޮތަށް ބައްދަލު ކުރެއްވި ހަތް މިނިސްޓަރަކާއި އެ ފެންވަރުގެ އެހެން ބޭފުޅުން ވެސް ޝަމީމް މަގާމުގައި ދެމި ހުރުމަށް ލަފާ ދެއްވާފައިވާ ކަމަށް ޝަމީމް ވިދާޅުވި އެވެ.

އޭގެ އިތުރުން އެންމެ ފަހުން ބޭއްވި މަޖިލީހުގެ ކޮމިޓީ ބައްދަލުވުމުގައި ވެސް އެއްވެސް މެންބަރަކު އެފަދަ ތުހުމަތެއް ކުރައްވާފައި ނުވާ ކަމަށާއި އެފަދަ ޝަކުވާއެއް ވެސް ފާހަގަކޮށްފައި ނުވާ ކަމަށް ޝަމީމް ވިދާޅުވި އެވެ. ޕީޖީއަށް ތުހުމަތު ކޮށްފައިވާ މައްސަލަތައް:

- ކުރީގެ ޓޫރިޒަމް މިނިސްޓަރު އަލީ ވަހީދަށް ކޮށްފައިވާ ޖިންސީ ކުށުގެ ދައުވާތައް ފައިލް ކުރުން.

- މަގާމުގައި ދެމި ހުރުމަށް ކުރީގެ ޔޫތު މިނިސްޓަރު އަހުމަދު މަހުލޫފްގެ މައްސަލަ ފައިލް ކުރުން.

- ސަފާރީ ރޭޕް ކޭސްގެ މައްސަލާގައި އެމްޑީޕީ އާ ގުޅުން އޮންނަ ފަރާތެއް ހިމެނޭތީ އިސްތިއުނާފް ނުކުރުން.

- ނިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ކުރި ހިއުމަން ޓްރެފިކިންގެ ދައުވާ އަނބުރާ ގެންދިޔުން.

- ޝަމީމް ވަނީ ބަނގުރާ އާ ގުޅޭ 77 މައްސަލައެއް އަނބުރާ ގެންދިޔުން.

- އެއް ޖިންސުން ގުޅުން ހިންގުމާ ގުޅޭ 13 މައްސަލައެއް އަނބުރާ ގެންދިޔުން.

- ވެންޓިލޭޓަރު މައްސަލާގައި ދައުވާ ނުކުރަން ނިންމުން.

- ޕީޖީ އޮފީހުގެ މުއައްޒަފުންނާ މެދުގައި ތަފާތު ކުރުންތައް ގެންގުޅުން.

ޕީޖީ ކަމުން ޝަމީމް ވަކިކުރަން މަޖިލީހުގެ ކޮމިޓީން ފާސްކޮށްފައި މިވަނީ އޭނާ ވަކިކުރަން ޖެހޭ ކަމަށް ބުނެ މަޖިލީހުގެ ތަޅުމުގައި ސަރުކާރަށް ތާއީދުކުރާ އެތައް މެންބަރުންނެއް ވާހަކަ ދެއްކި ފަހުންނެވެ.