ޕީއެންސީގެ އެތެރޭގެ އިންތިހާބު އަންނަ މަހު

ހަސަން ހަލީމް

11 ސެޕްޓެމްބަރ 2024 - 18:10

0 comments

މިއަދު ބޭއްވި ނޫސްވެރިންގެ ބައްދަލުވުމުގައި ފަލާހު ވާހަކަ ދައްކަވަނީ - ފޮޓޯ/ ޕީއެންސީ

ވެރިކަންކުރާ ޕީއެންސީގެ އެތެރޭގެ އިންތިހާބު އަންނަ އޮކްޓޯބަރު 19، ގައި ބާއްވައި، އެކި މަގާމުތަކަށް 2،095 މެންބަރުން އައްޔަނުކުރަން ނިންމައިފި އެވެ.

ޕީއެންސީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޕީޖީ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވީ ދާއިރާތަކަށް ދާއިރާގެ ރައީސުން، ދާއިރާގެ ނައިބު ރައީސުން، ޒުވާނުންގެ ހަރަކާތުގެ ރައީސުން، އަންހެނުންގެ ހަރަކާތުގެ ރައީސުން އަދި ސްޓިއަރިން ކޮމިޓީގެ މެންބަރުން އިންތިހާބުކުރާނެ ކަމަށެވެ.

"އިންތިހާބުގައި ރާއްޖޭގެ އެކި ކަންކޮޅުތަކުން ޖުމްލަ 2،095 މެންބަރު އެކިއެކި މަގާމުތަކަށް އައްޔަނުކުރާނެ. މިއީ ވަރަށް ބޮޑު އަދަދެއް. މިހާރު ވެސް އަޅުގަނޑުމެންނަކީ ބޮޑު ޕާޓީއެއް. 30،000 މެންބަރުން އެކުލެވޭ. ހުށަހަޅާ ފޯމުތަކަށް ބަލާއިރު 50،000 މެންބަރުން ހަމަވާ ވަރަށް ފޯމު އެބަހުރި،" ފަލާހް ވިދާޅުވި އެވެ.

އެ ނޫސްވެރިންގެ ބައްދަލުވުމުގައި ހެލްތް މިނިސްޓަރު ޑރ. އަބްދުﷲ ހަލީލު ވިދާޅުވި ގޮތުގައި ރައްޔިތުން މަޖިލީހުގައި ޕީޕީއެމްގެ މެންބަރުން ތިއްބެވި ކޮންމެ ދާއިރާއެއްގައި ވެސް އެ ދާއިރާއެއްގެ ރައީސަކަށް ވާނީ އެ މެންބަރެވެ. އެހެންވެ، ދާއިރާ ރައީސްގެ އިންތިހާބު ބާއްވާނީ ޕީއެންސީގެ މަޖިލިސް މެންބަރެއް ނެތް ދާއިރާތަކުގައި ކަމަށް އޭނާ ވިދާޅުވި އެވެ.

އެހެން ކަމުން 93 ދާއިރާގެ ތެރެއިން ދާއިރާގެ ރައީސުން ހޮވާނީ 18 ދާއިރާއަށެވެ.

އިންތިހާބުގެ ޓައިމްލައިން:

ސެޕްޓެމްބަރު 11: މަގާމުތަކަށް ކުރިމަތިލުމަށް ހުޅުވާލުން
ސެޕްޓެމްބަރު 30: ކުރިމަތިލުމަށް ހުޅުވާލި ފުރުސަތު ބަންދުކުރުން
އޮކްޓޯބަރު 4: ވޯޓުލެވޭ މީހުންގެ ލިސްޓު އާންމު ކޮށް، ޝަކުވާއަށް ހުޅުވާލުން
އޮކްޓޯބަރު 8: ވޯޓު ލެވޭ މީހުންގެ ފައިނަލް ލިސްޓު އާންމު ކުރުން
އޮކްޓޯބަރު 19: ވޯޓުލާ ދުވަސް
އޮކްޓޯބަރު 24: ރަސްމީ ނަތީޖާ އިއުލާން ކުރުން

އެ އިންތިހާބުގައި ވޯޓުލެވޭނީ އަދި ވާދަ ކުރެވޭނީ ވެސް މި މަހުގެ 30ގެ ނިޔަލަށް ޕާޓީގެ މެމްބަރުންގެ ގޮތުގައި ތިބި ފަރާތްތަކަށެވެ.

އެންމެ ފަހުން ބޭއްވި މަޖިލިސް އިންތިހާބުގައި ޕީޕީއެމް-ޕީއެންސީގެ ފަރާތުން ވާދަ ކުރި މެންބަރުން ކުރިމަތިލާފައި ވަނީ ޕީއެންސީގެ ޓިކެޓުގަ އެވެ. އެ ޕްރައިމަރީގައި ޕީޕީއެމް މެމްބަރުންނަށް ވެސް ވޯޓުލުމުގެ ފުރުސަތު ދިނެވެ.