ބަލި ގަބޫލު ނުކުރާތީ ނަޝީދުގެ ފާޑު ވިދާޅުވުން ޕީއެންސީގެ ލީޑާޝިޕަށް

ޔޫނުސް އިބްރާހިމް

07 ޖޫން 2026 - 11:59

0 comments

ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި ބަލިވިކަން ގަބޫލުކުރަން ޕީއެންސީގެ ލީޑާޝިޕުން ދެކޮޅު ހަދާތީ ކުރީގެ ރައީސް މުހައްމަދު ނަޝީދު ވަރަށް ބޮޑަށް ފާޑު ވިދާޅުވެއްޖެ އެވެ.

އިއްޔެގެ އިންތިހާބު އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ކެންޑިޑޭޓު އަބްދުﷲ ސޯދިގު (ސޯބެ) ކާމިޔާބު ކުރެއްވީ 62 ވޯޓުގެ ތަފާތަކުންނެވެ. ސޯބެ ވަނީ 1375 ވޯޓު ހޯއްދަވައިފަ އެވެ. ޕީއެންސީގެ ކެންޑިޑޭޓު އަހުމަދު ސައީދު (ސޮޑާ) އަށް ލިބިވަޑައިގަތީ 1313 ވޯޓެވެ.

ޕީއެންސީގެ ލީޑާޝިޕުން އެ ބަލި ސިފަ ކުރަމުންދަނީ އެ ޕާޓީއަށް ލިބުނު ކާމިޔާބީއެއްގެ ގޮތުގަ އެވެ. އަދި އެއީ އިދިކޮޅު އެމްޑީޕީއަށް ލިބުނު ބޮޑު ނާކާމިޔާބީއެއް ކަމަށް ވެސް ބުނަމުންދެ އެވެ. އިންތިހާބުން މޮޅުވި ކެންޑިޑޭޓު ސޯބެއަށް މަރުހަބާ ކިޔާފައި ވަނީ ވެސް ޕީއެންސީގެ މަދު ބަޔެކެވެ.

މިކަމާއި ގުޅިގެން ރައީސް ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ތަޅާފޮޅާއިރު އަނގައިން ބަލިނުވާ މީހުން އުޅޭ ކަމަށެވެ.

"ބައެއް ފަހަރު ތަޅާ ފޮޅާއިރުވާ ގޮތެއް އޮވޭ. ގަދަ މީހާ ޖަހާއިރަށް، އަނގައިން ބަލި ނުވާ މީހާ ބުނާނެ ދެން ޖަހާބަލަ. އެންމެ ފަހުން ހެސް ކިޔާފަ ކަންކަށީގައި ޖަހާ ވެއްޓުނީމަ ބުނާނެ. އަށްދެ ކިރިޔާ ޖެހުނުކަމޭ،" ނަޝީދު ވިދާޅުވި އެވެ.

ނަޝީދު ވިދާޅުވީ މަޖިލީހުގެ ހިތަދޫ އުތުރު ގޮނޑިއަކީ ޕީއެންސީ އަތުގައި ބޮޑު އަގުލަބިއްޔަތަކުން ލިބިފަ ހުރި ގޮނޑިއެއް ކަމަށާއި އެމްޑީޕީން އެ ގޮނޑި ހޯދާފައިވާ ކަމަށެވެ. އަދި ރައީސް ޑރ. މުހައްމަދު މުއިއްޒު ރަނގަޅަށް ބަލިވެފައިވާ ކަމަށްވެސް ނަޝީދު ވިދާޅުވި އެވެ.

ޑިމޮކްރަސީގެ ރޫހާއި ރީތި އާދަޔާ ހިލާފަށް ބަލި ގަބޫލު ނުކުރައްވާ ފަދަ މޭރުމަކުން ޕީއެންސީގެ ލީޑަރުން ވާހަކަ ދައްކަވާއިރު، އިންތިހާބު ނިމުނު ފަހުން ރައީސް މުއިއްޒު އަދި އެއްޗެއް ވިދާޅެއް ނުވެ އެވެ. މި އިންތިހާބުގައި ކެމްޕެއިން ކުރައްވަން އެމަނިކުފާނު އައްޑޫއަށް ވަޑައިގެންފައެއް ވެސް ނުވެ އެވެ.

އިއްޔެ ނެގި ވޯޓުން ވެސް ސަރުކާރު ހިންގާ ޕީއެންސީ ބަލިވިއިރު އެންމެ ފަހުން ބޭއްވި ސިޓީތަކާއި ކައުންސިލް އިންތިހާބުގައި ވެސް އައްޑޫއިން ވަނީ ބޮޑުކޮށް ސަރުކާރަށް "ނޫނެކޭ" ބުނެފަ އެވެ. އަދި ދެ އިންތިހާބު އެއްކޮށްލުމާ ގުޅޭ ގޮތުން ނެގި ހިޔާލު ހޯދުމުގެ ވޯޓުގައި ވެސް އައްޑޫއިން ރައީސް މުއިއްޒު އަށް ކުރިމަތިވީ ބޮޑު ނާކާމިޔާބީ އެކެވެ.