މަސްވެރިންގެ ފައިސާ އަންނަ ހަފުތާގެ ނިޔަލަށް ދައްކާ ހާލާސްކުރެވޭނެ: މިފްކޯ

އަލީ ރާޒީ

27 ސެޕްޓެމްބަރ 2024 - 10:13

0 comments

މަހަށް ނިކުމެ އުޅޭ އޮނޑިއެއް

ސަރުކާރުގެ އަމާޒަކީ މަސްވެރިންނަށް ނުދެވި ބާކީ ހުރި ފައިސާ އަންނަ ހަފްތާގެ ނިޔަލަށް ދައްކާ ޚަލާސްކުރުން ކަމަށް ސަރުކާރުގެ މަސް ކުންފުނި، މިފްކޯއިން މިއަދު ބުނެފި އެވެ.

މިފްކޯއިން މީޑިއާތަކާ ހިއްސާ ކުރި މެސެޖެއްގައި ވިދާޅުވީ މިމަހުގެ ކުރީ ކޮޅުން ފެށިގެން މަސްވެރިންނަށް ނުދެވި ހުރި ފައިސާއާ ގުޅޭގޮތުން މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާ އާއި މާލީ ވުޒާރާ އަދި މިފްކޯ ގުޅިގެން މަޝްވަރާ ކޮށްފައިވާ ކަމަށެވެ. މި މަޝްވަރާތަކުގައި މިވަގުތަށް ހައްލު ހޯދިފައިވާ ކަމަށްވެސް އެ ކުންފުނިން ބުންޏެވެ.

ސަރުކާރުން ކެނޑިނޭޅި މިފްކޯއަށް ދޭންޖެހޭ އެއްބާރުލުން ލިބެމުން އަންނަކަން ފާހަގަކުރަމުން މިފްކޯއިން ވިދާޅުވީ ސަރުކާރުގެ އަމާޒަކީ މިހާތަނަށް ނުދެއްކި ހުރި ފައިސާ އަންނަ ހަފުތާގެ ނިޔަލަށް އެއްކޮށް ދައްކައި ޚަލާސްކުރުން ކަމަށެވެ.

މިފްކޯއިން މައުލޫމާތުދޭގޮތުގައި މިހާރު މަސްވެރިންްނަށް ނުދެވި ހުރީ 17 މިލިއަން ރުފިޔާއެވެ.

މަސްވެރިން ބާނާ މަހަށް މަދުވެގެން 48 ގަޑިއިރު ތެރޭގައި ފައިސާ ދޫކުރުމަކީ މި ސަރުކާރުގެ ރިޔާސީ ވައުދެކެވެ. އެކަމަކު، އެކަން އެ ގޮތަށް ނުކުރެވެނީ އިގުތިސާދީ ދަތިތަކުގެ ސަބަބުން ކަމަށް މަސްވެރިކަމާ ބެހޭ ވަޒީރު އަހުމަދު ޝިޔާމް މީގެ ކުރިން ވަނީ ވިދާޅުވެފަ އެވެ.