ނުފޫޒަކަށް ފުރުސަތެއް ނުދޭނަން: މިފްކޯގެ ސީއީއޯ

ހަސަން ހަލީމް

19 ޑިސެމްބަރ 2024 - 13:37

0 comments

މިފްކޯގެ އާ ސީއީއޯ ޑރ. ވިޓާލީ ލުބިމޮވް

މިފްކޯ އަށް ސިޔާސީ ނުފޫޒު ފޯރުވަން ފުރުސަތު ނުދޭނެ ކަމަށާއި އެފަދަ ކަމެއް ކުރާ ބައެއްގެ ނަން ވެސް ހާމަކުރާނެ ކަމަށްކުންފުނޫގެ ފުރަތަމަ ބޭރުގެ ސީއީއޯ ޑރ. ވިޓާލީ ލްޔުބިމޯވް ވިދާޅުވެއްޖެ އެވެ.

މިފްކޯގެ ހިންގުން ހަރުދަނާ ކުރުމަށްޓަކައި އަޅުއްވާ ފިޔަވަޅުތަކުގެ ދަށުން އޭނާ މިހާރު ވަނީ އެ ކުންފުންޏަށް އާ ޖެނެރަލް މެނޭޖަރެއްވެސް އައްޔަންކުރައްވާފަ އެވެ.

ޑރ. ވިޓާލީ މިމަހުގެ 10 ދުވަހު މަގާމާ ހަވާލުވެވަޑައިގަތުމަށްފަހު ފުރަތަމަ ފަހަރަށް ނެރުއްވި ބަޔާނުގައި ވިދާޅުވީ މިފްކޯގެ ހިންގުން ހަރުދަނާކޮށް ދެމެހެއްޓެނިވި ގޮތެއްގައި ހިންގުމަށްޓަކައި ކުރެވޭނެ ކަންކަމަކީ ކޮބައިތޯ ބަލައި އެކަންކަމުގެ މައުލޫމާތު ސަރުކާރުގެ ކަމާ ގުޅޭ ފަރާތްތަކަށް ހުށަހެޅުއްވުމަށް ތައްޔާރުވަމުންދާ ކަމަށެވެ.

ކުރިއަށް އޮތް ދުވަސްތަކުގައި މިފްކޯ ހިންގާނީ ދެފުށް ފެންނަ ސިޔާސަތެއްގެ ތެރެއިން ޒިންމާދާރު ގޮތެއްގައި ކަން ޑރ. ވިޓާލީ ވަނީ ޔަގީންކޮށްދެއްވާފަ އެވެ. އެހެންވެ އެއްވެސް ނުފޫޒެއް އޭނާގެ މައްޗަށް ނުހިނގާނެ ކަމަށާއި ނުފޫޒު ފޯރުވަން އުޅޭނަމަ އެފަރާތެއްގެ މައުލޫމާތު ހާމަކުރާނެ ކަމަށްވެސް ވިދާޅުވި އެވެ.

ސީއީއޯ ވިދާޅުވީ އޭނަގެ ލީޑާޝިޕްގައި މިފްކޯއަށް އޮތް އިތުބާރު ބޮޑުކޮށް، ކުންފުނީގެ އަމާޒުތައް ހާސިލުކުރުމަށް މަސައްކަތް ކުރައްވާނެ ކަމަށެވެ.