ފަސް އަހަރުގެ ތެރޭގައި މަސް ރައްކާކުރެވޭ ކެޕޭސިޓީ 25،000 ޓަނަށް އިތުރުކުރަނީ

އަހުމަދު ނިހާން

30 އޮކްޓޫބަރ 2024 - 12:22

0 comments

މި ސަރުކާރުގެ ފަސް އަހަރުގެ ދައުރު ނިމޭއިރު، މަހުގެ ސްޓޯރޭޖް ކެޕޭސިޓީ 25،000 ޓަނަށް ވުރެ އިތުރުކުރާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ޝިޔާމް ވިދާޅުވީ މަސްވެރިކަމުގެ ސިނާއަތަށް އޮތް އެންމެ ބޮޑު ގޮންޖެހުމަކީ މަސް ރައްކާކުރުމުގެ ކެޕޭސިޓީ ނެތުން ކަމަށެވެ.

ފެލިވަރު އޮޕަރޭޝަނަށް އައިފަހުން 47 އަހަރުވެފައިވާއިރު ފެސިލިޓީ ފެށުނު ގޮތާއި މިއަދާއި މާ ބޮޑު ތަފާތެއް ނެތް ކަމަށް ޝިޔާމް ވިދާޅުވި އެވެ.

ޝިޔާމް ވަނީ އައްޑޫ ސިޓީ ފިޝަރީޒް ކޮމްޕްލެކްސް ތަރައްގީކުރުމުގެ މަސައްކަތް އަންނަ އަހަރު ކުރީކޮޅު ފެށޭނެ ކަމަށްވެސް ވިދާޅުވެފަ އެވެ.

އެ މަޝްރޫއަށް ފައިސާ ހަމަޖެހިފައިވާ ކަމަށާއި ކޮމްޕްލެކްސް ތަރައްގީ ކުރުމުގެ މަސައްކަތް އަންނަ އަހަރު ފަހުކޮޅު ނުވަތަ 2026 ވަނަ އަހަރުގެ ކުރީކޮޅު ނިންމާލެވޭނެ ކަމަށް މިނިސްޓަރު ވިދާޅުވި އެވެ.

"މިއަދު ދިވެހިރާއްޖޭގެ ކެޕޭސިޓީ ސްޓޯރޭޖަކީ 8،500 ޓަނު،" ޝިޔާމް ވިދާޅުވި އެވެ.

މިދިޔަ ރިޔާސީ އިންތިޚާބުގެ ކެމްޕެއިންގެ ތެރޭގައި ރައީސް އިބްރާހިމް މުހައްމަދު ސޯލިހުގެ ސަރުކާރުން ވަނީ މަހުގެ އަގު 17ރ. އިން 25ރ. އަށް ބޮޑު ކޮށްފައެވެ. ނަމަވެސް ދައުލަތުން މާލީ ގޮތުން އުފުލަން ޖެހޭ ބުރަ ބޮޑުވުމުގެ ސަބަބުން މަހުގެ އަގު މި ސަރުކާރުން ވަނީ ކުޑަކޮށްފައިވެއެވެ.

އެކަން ފާހަގަކުރައްވާ ޝިޔާމް ވިދާޅުވީ މިދިޔަ ސަރުކާރުން މަހުގެ އަގަށް ބަދަލު ގެނައީ އިންތިޚާބުތެރޭ އެއްވެސް ކަހަލަ ދިރާސާއެއް ކުރުމެއް ނެތި ކަމަށެވެ. އަދި މި ސަރުކާރުން ވެރިކަމާ ހަވާލުވީއިރު މަސްވެރިންނަށް ނުދީ ބެކްލޮގްގައި 250 މިލިއަން ރުފިޔާގެ ފައިސާ ހުރި ކަަމަށް ވިދާޅުވި އެވެ.