މަސްވެރިންނަށް ނުދެވި ހުރި ފައިސާ ދިނުމަށް މިފްކޯއާ ހަވާލުކޮށްފިން: ރައީސް

އަލީ ރާޒީ

30 އޮކްޓޫބަރ 2024 - 12:58

0 comments

މިއަދާ ހަމައަށް މަސްވެރިންނަށް ނުދެވި ހުރި ހުރިހާ ފައިސާއެއް މަސްވެރިންނަށް ދޭން ސަރުކާރުގެ މަސް ކުންފުނި، މިފްކޯއާ ހަވާލުކޮށްފައިވާ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.

ރައީސް ކުރެއްވި ޕޯސްޓެއްގައި ވިދާޅުވީ ‏މިއަދާ ހަމައަށް މަސްވެރިންނަށް ނުދެވިހުރި ފައިސާގެ ޖުމުލަ އަދަދު މިހާރު ވަނީ އެ ފަރާތްތަކަށް ރައްދުކުރުމަށް މިފްކޯއަށް ހަވާލުކޮށްފައި ކަމަށެވެ.

"މެނިފެސްޓޯގައިވާ ފަދައިން 48 ގަޑިއިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ގާއިމު ކުރުމުގެ މަސައްކަތް ދަނީ ކުރެވެމުން." ރައީސް ވިދާޅުވިއެވެ.

މީގެ އިތުރުން، މެނިފެސްޓޯގައިވާ ގޮތަށް 48 ގަޑިއިރު ތެރޭ ފައިސާ ދެވޭނެ ނިޒާމު ގާއިމުކުރުމުގެ މަސައްކަތް ކުރަމުން އަންނަ ކަމަށް ރައީސް ވިދާޅުވިއެވެ.

މިފްކޯގެ ތަފާސްހިސާބުތަކުން ދައްކާ ގޮތުން މިދިޔަ އަހަރުގެ ނޮވެމްބަރު 17 އިން މި އަހަރުގެ ސެޕްޓެމްބަރު މަހާ ހަމައަށް ދިޔައިރު ކުންފުނިން ވަނީ މަސްވެރިންނަށް ނުދެވި ހުރި ފައިސާގެ ތެރެއިން 862.3 މިލިއަން ރުފިޔާ ދައްކައިފައެވެ.

ނުދެވި ހުރި ފައިސާ ޖުމްލަ އަދަދުގެ ތެރެއިން 3.5 މިލިއަން ރުފިޔާއަކީ ފެލިވަރަށް ކިރި މަހުން ދައްކަންޖެހޭ ފައިސާއެވެ. އަދި، 5.4 މިލިއަން ރުފިޔާއަކީ ކޫއްޑޫއަށް މަސް ކިރައި، މިފްކޯއިން ދޭން ޖެހިފައިވާ އަދަދެވެ. އަދި، 113،171.90 ރުފިޔާއަކީ އައްޑުއަށް މަސް ކިރުމުން ދޭންހުރި ފައިސާއެވެ.

މިފްކޯއިން އޭރު ބުނީ، ދުވަސްވަރަކީ މަސްވެރިކަން ދަށް ދުވަސްވަރެއް ކަމަށްވުމާ އެކު ކުންފުނީގެ މާލީ ހާލަތު ވެސް އޮތީ ވަރަށް ދަށްކޮށް ކަމަށެވެ. އަދި، އެ ކަމަށް ސަރުކާރާ އެކު މަޝްވަރާކޮށް ގޮތެއް ހޯދުމަށް މަސައްކަތްކުރަމުން އަންނަ ކަމަށް ބުނެފައިވެއެވެ.