މާޒިޔާ އަށް ފަލަސްތީނުގެ ގައުމީ ޓީމު މިޑްފީލްޑަރެއް ސޮއިކޮށްފި

އައިމިނަތު ޝިޔާޒާ

28 ސެޕްޓެމްބަރ 2024 - 12:30

0 comments

ފަލަސްތީނުގެ ގައުމީ ޓީމަށް ކުޅެމުން އަންނަ މިޑްފީލްޑަރު، ޖޮނަތަން ކަންޓިއާނާ، ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން އަށް ސޮއިކޮށްފި އެވެ.

އެ ޓީމާ ގުޅުނު ކުޅުންތެރިޔަކީ ފަލަސްތީނުގެ ގައުމީ ޓީމުގެ މިޑްފީލްޑަރު ޖޮނަތަން ކެންޓިލާނާ އެވެ. ޗިލީ އަށް އުފަން 32 އަހަރުގެ ޖޮނަތަން ވަނީ ފަލަސްތީނާއި މެލޭޝިއާ އާއި މިސްރު އަދި އިންޑޮނޭޝިއާގެ ކުލަބުތަކަށް ކުޅެފަ އެވެ. އޭނަ އަކީ 2015 އިން އަހަރުން ފެށިގެން ފަލަސްތީނުގެ ގައުމީ ޓީމުގައި ކުޅުންތެރިއެކެވެ.

އޭނާ ފަލަސްތީނު ޓީމަށް ކުޅެދިން 30 މެޗުން 10 ލަނޑު ޖަހައިފަ އެވެ.

ސާބިއާ އަށް އުފަން، ޔުއެފާ ޕްރޯ ލައިސަންސް ހާސިލްކޮށްފައިވާ ކޯޗު، ޑްރަގަން ޑުކަނޯވިޗްގެ އިރުޝާދުގެ ދަށުން މާޒިޔާ އިން އަންނަނީ މި މަހުގެ ކުރީކޮޅުން ފެށިގެން އޭއެފްސީ ޗެލެންޖް ލީގަށް ފަރިތަކުރަމުންނެެވެ.

އަންނަ އޮކްޓޯބަރު މަހުގެ ފަހުކޮޅު ޗެލެންޖް ލީގު ބާއްވާއިރު، އެ ލީގުގައި ރާއްޖޭގެ ޗެމްޕިއަން މާޒިޔާއާ އެއް ގްރޫޕެއްގައި ހިމެނެނީ ކުވެއިތުގެ އަލް އަރަބީ ސްޕޯޓްސް ކުލަބާއި، ތުރުކުމެނިސްތާންގެ އެފްސީ އަކްރަޑަގް އަދި ކިރްގިސްތާން އެފްސީ އަބްދީޝް އާޓާއެވެ. ސެންޓްރަލައިޒްކޮށް މި މުބާރާތް ބޭއްވުމަށް ހަމަޖެހިފައިވަނީ ކުވެއިތުގަ އެވެ.