ކުރީގެ ރައީސް ނާސިރުގެ ބޮޑުބޭބޭފުޅު، އަބްދުލްމަޖީދު މާހިރު އަވަހާރަވެއްޖެ

އަލީ ރާޒީ

03 އޮކްޓޫބަރ 2024 - 16:52

0 comments

މަރުހޫމް އަބްދުލްމަޖީދު މާހިރު: އޭނާއަކީ ހަކީމެއް، މުއައްރިހެއް، މުދައްބިރެއް -- ފޮޓޯ: ސޯޝަލް މީޑިއާ

ސަރުކާރުގެ އެކި އިދާރާތަކުގައި އިސް މަގާމުތަކެއް ފުރުއްވި އަބްދުލްމަޖީދު މާހިރު އަވަހާރަވެއްޖެ އެވެ.

އަބްދުލްމަޖީދު މާހިރު އަކީ ކުރީގެ ޑިފެންސް މިނިސްޓަރު، އަމީން ފައިސަލް އާއި އިނގިރޭސިވިލާތަށް ކުރިން ކަނޑައަޅުއްވާފައި ހުންނެވި ސަފީރު، ފަރަހަނާޒް ފައިސަލްގެ ބައްޕާފުޅެވެ.

އަބްދުލްމަޖީދު މާހިރު އަކީ ދިވެހި ބޭސްވެރިކަމުގެ ފަންނުގައި އަރައި ހުންނެވި ހަކީމެކެވެ. އެ ރޮނގުން ބައެއް ފޮތްތައް ވެސް އެނާ ލިޔުއްވާފައިވެ އެވެ.

އަދި، އަބްދުލްމަޖީދު މާހިރު އަކީ ތާރީހު ދިރާސާ ކުރައްވާ މުއައްރިހެއް ވެސްމެ އެވެ. އޭނާ އަކީ ޒުވާނުންނަށް ތާރީހު އުނގަންނައިދެއްވުމުގައި ވަރަށް ބުރަކޮށް އުޅުއްވި މުދައްރިބެކެވެ.

އަބްދުލްމަޖީދު އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ވެސް ވަނީ ތައުޒިޔާ ވިދާޅުވެފަ އެވެ. ސޯޝަލްމީޑިއާ، އެކްސްގައި ރައީސް ކުރެއްވި ޕޯސްޓެއްގައި ވިދާޅުވީ އަބްދުލްމަޖީދު މާހިރު އަކީ ރާއްޖެގެ އިސް ރަށްވެހީންގެ ތެރެއިން ފާހަގަ ކޮށްލެވެ ގަދަރުވެރި، ހިދުމަތްތެރި، ތަޖުރިބާކާރު ހަރުދަނާ ޝަހުސިއްޔަތެއް ކަމަށެވެ.

"ޢަބްދުލްމަޖީދު މާހިރު އަވަހާރަވި ޚަބަރު އަޅުގަނޑު އަޑު އެހީ ފުން ހިތާމައާއެކުގައެވެ. މަރުޙޫމް ޢަބްދުލްމަޖީދު މާހިރަކީ، މާލޭ މުނިސިޕަލް ކައުންސިލްގެ ރައީސްކަމުގެ އިތުރަށް، ސަރުކާރުގެ އެކި އިދާރާތަކުގައި އިސް މަޤާމުތަކެއް ފުރުއްވާފައިވާ ބޭފުޅެކެވެ. މަރްޙޫމު މާހިރަކީ ދިވެހި ބޭސްވެރި ޙަކީމެކެވެ. ދިވެހި ތާރީޚާއި އާދަކާދައިގެ އެތައް މަޢުލޫމާތެއް މިއަދުގެ ޖީލަށް އޮޅުންފިލުއްވައިދެއްވި އުސްތާޛެކެވެ. ޤައުމަށް ޚިދުމަތްތެރި ޢިލްމީ ޤާބިލް ދަރީންތަކެއް ތަރުބިއްޔަތުކުރެއްވި އަގުހުރި ބައްޕައެކެވެ." ރައީސް ކުރެއްވި ޕޯސްޓުގައި ވިދާޅުވި އެވެ.