ހުޅުމާލޭގައި 15 ޕާކިން ބިލްޑިން އަޅަން އެއްބަސްވުމެއްގައި ސޮއިކޮށްފި

ހަސަން ހަލީމް

03 އޮކްޓޫބަރ 2024 - 12:40

0 comments

ހުޅުމާލޭގައި 15 ޕާކިން އިމާރާތް އެޅުމަށް ހައުސިން ޑިވެލޮޕްމެންޓު ކޯޕަރޭޝަނާއި މިނިސްޓްރީ އޮފް ޓްރާންސްޕޯޓުގެ މެދުގައި ފަހުމުނާމާއެއްގައި ސޮއިކޮށްފި އެވެ.

މިއަދު އޮތް ރަސްމިއްޔާތެއްގައި އެޗްޑީސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓާ އިބްރާހީމް ފަޒުލް ރަޝީދެވެ. އަދި ޓްރާންސްޕޯޓު މިނިސްޓްރީގެ ފަރާތުން ސޮއިކުރެއްވީ މިނިސްޓަރު މުހައްމަދު އަމީނެވެ.

މިއަދު ސޮއިކުރި އެއްބަސްވުމުގެ ދަށުން ހުޅުމާލޭގައި ގާއިމުކުރާ 15 އިމާރާތުގައި ޖުމްލަ 3،900 ޕާކިން ޔުނިޓު ހުންނާނެ އެވެ.

މިއިމާރާތްތަކުގެ މަސައްކަތް މިއަހަރު ފެށުމަށްފަހު ގިނަ ވެގެން އެއް އަހަރުގެ ތެރޭގައި ނިންމުމަކީ އަމާޒެއް ކަމަށް އެޗްޑީސީ އިން މައުލޫމާތު ދީފައިވެ އެވެ.

މި އިމާރާތްތައް ހެދުމަށް ނިންމާފައިވަނީ އިއާދަކުރަނިވި ހަކަތަ ބޭނުންކޮށްގެން އިމާރާތުގައި ހުންނަ ސިސްޓަމްތައް މަސައްކަތް ކުރާ ގޮތަށެވެ.

ޕާކިން އިމާރާތްތަކުގައި އިލެކްޓްރިކް ވެހިކަލް ޗާޖުކުރާ ސްޓޭޝަންތައް ހެދުމަށް ނިންމާފައިވާއިރު އިމާރާތްތަކުގެ ޓެރަސް ވިޔަފާރި ބޭނުންތަކަށް ކުއްޔަށް ދިނުމާއި، ކެފޭ ރެސްޓޯރަންޓަށް ޖާގަ ދިނުމާއި ސްޕޯޓްސް އެރީނާތައް ހިންގުންވެސް ހިމެނެ އެވެ.

މާލޭގެ ތޮއްޖެހުން ކުޑަކުރުމަށް މާލެއާއި ހުޅުމާލޭގައި ޕާކިން ބިލްޑިންތައް ގާއިމުކުރުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވައުދުފުޅެކެވެ.