ސެޕްޓެމްބަރުގައި މުދަލު ޒަކާތުގެ ގޮތުގައި ލިބުނީ 8.7 މިލިޔަން ރުފިޔާ

އިސްމާއިލް ރިޒާ

13 އޮކްޓޫބަރ 2024 - 14:09

0 comments

މިދިޔަ މަހު މީރާއަށް މުދަލު ޒަކާތުގެ ގޮތުގައި ލިބުނު އާމްދަނީ މިދިޔަ އަހަރުގެ ސެޕްޓެމްބަރުމަހާ އަޅާ ބަލާއިރު 4 ގުނަ އިތުރުވެއްޖެއެވެ.

މޯލްޑިވްސް އިންލޭންޑު ރެވެނިއު އޮތޯރިޓީ، މީރާއިން ނެރެފައިވާ ސެޕްޓެމްބަރުމަހުގެ އާމްދަނީ ރިޕޯޓުގައިވާގޮތުން އެމަހުގެތެރޭ މުދަލު ޒަކާތުގެގޮތުގައިވަނީ 8.7 މިލިޔަން ރުފިޔާ ލިބިފައެވެ.

މިދިޔަ މަހާ ހަމައަށް މުދަލު ޒަކާތަށް ޖުމްލަ 82.5 މިލިއަން ރުފިޔާ ލިބިފައިވެ އެވެ. މިދިޔަ އަހަރުގެ ފުރަތަމަ ނުވަ މަހުގެ ތެރޭގައި މުދަލުގެ ޒަކާތަށް ލިބުނީ 70 މިލިއަން ރުފިޔާ އެވެ.

މިހާރު މުދަލު ޒަކާތުގެ ނިސާބަކީ 9،353.40ރ. އެވެ. މުދަލު ޒަކާތުގެ ނިސާބަށް އެންމެ ފަހުން ބަދަލު ގެނައީ މެއި މަހު އެވެ.

މުދަލު ޒަކާތް ނެރެން ޖެހެނީމުދަލުގައި ނިސާބު ހަމަވެ އަދި އެ މީހެއްގެ މިލްކިއްޔާތުގައި އެ މުދަލެއް ހުރެ ހިޖުރީ ގޮތުން އެއް އަހަރު ހަމަވުމުންނެވެ.

ނަމަވެސް މުދަލުގެ ޒަކާތް ދައްކާ މީހުންގެ ނިސްބަތް މަދުކަން ޒަކާތު ހައުސް އިން ފާހަގަކުރެ އެވެ. އެހެންވެ ޒަކާތަށް ހޭލުންތެރި ކުރުވަން ގިނަ ޕްރޮގްރާމްތަކެއް ވެސް އަންނަނީ ހިންގަމުންނެވެ.

ރާއްޖޭގައި މުދަލު ޒަކާތް ނެރުން ވާޖިބުވާ ނިޞާބު ކަނޑައަޅަނީ އިސްލާމީ ކަންތައްތަކާބެހޭ ވުޒާރާއިންނެވެ. އެ ވުޒާރާއިން އެންމެފަހުން މުދަލު ޒަކާތުގެ ނިޞާބަށް ބަދަލުގެންނަވާފައިވަނީ މިދިޔަ މެއިމަހުގެތެރޭގައެވެ. މިވަގުތު މުދަލު ޒަކާތް ވާޖިބުވާ ނިޞާބުގެ އަދަދަކީ 9353.40 ރުފިޔާއެވެ.

މުދަލުގެ ޒަކާތް ނެރުން ވާޖިބުވާ ނިޞާބު ކަނޑައެޅުމުގައި ރާއްޖޭގައި ބަލަނީ ރަންރިހީގެ އަގުންނެވެ. އެހެންކަމުން ދުނިޔޭގެ ބާޒާރުގައި ރަނާއި ރިހީގެ އަގަށް އަންނަ ބަދަލާއި ގުޅިގެން މުދަލުގެ ޒަކާތް ވާޖިބުވާ ނިޞާބަށް ދަނީ ބަދަލު ގެންނަމުންދެއެވެ.

އެމީހެއްގެ މިލްކިއްޔާތުގައި ނިޞާބު ހަމަވާ ޢަދަދަށް އަތުގައި ނުވަތަ ބޭންކްގައި ފައިސާ ހުރިނަމަ ހިޖުރީގޮތުން އަހަރެއްވުމުން އޭގެ 2.5 އިންސައްތަ މުދަލު ޒަކާތުގެ ގޮތުގައި ނެރުން ވާޖިބުވާނެއެވެ. 2016 ވަނަ އަހަރުން ފެށިގެން މުދަލު ޒަކާތް ބަލައިގަތުން ވަނީ މީރާއަށް ބަދަލު ކޮށްފައެވެ.