ސިޔާސީންގެ މުސާރަ ކުޑަކުރުމުން އިދިކޮޅަށް ކަމަކު ނުދިޔަ..!

އަހުމަދު ނިހާން

24 އޮކްޓޫބަރ 2024 - 00:06

0 comments

އިގްތިސާދީ އިސްލާހީ އެޖެންޑާގެ ދަށުން، ދައުލަތުގެ ހަރަދުތައް ކުޑަކުރުމުގެ މަގްސަދުގައި ސަރުކާރުން މިއަދު އިއުލާން ކުރި މުސާރަތައް ކުޑަ ކުރުމުގެ ސިޔާސާތުތަކަށް އިދިކޮޅު އެމްޑީޕީން ފާޑު ކިޔަން ފަށައިފިއެވެ.

ކުރެއްވި ޓްވީޓެއްގައި ރައީސް ވިދާޅުވީ ބަޖެޓު ހުށަހަޅާއިރު، އިގުތިސާދީ އިސްލާހީ އެޖެންޑާގެ ދަށުން، ދައުލަތުގެ ހަރަދުތައް ކުޑަކުރުމުގެ މަގުސަދުގައި ގިނަ ފިޔަވަޅުތަކެއް އެޅުމަށް ނިންމާފައިވާ ކަމަށްވެ. މި ފިޔަވަޅުތައް އަޅަން ނިންމާފައިވަނީ ދެ އަހަރުގެ މުއްދަތަކަށެވެ.

ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައިން 10 ޕަސެންޓު އުނިކުރުން
ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން 10 ޕަސެންޓު އުނި
ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000ރ. ކަމަށް ކަނޑައެޅުން. (މިހާރު 100،000ރ. އަށްވުރެ ބޮޑު މުސާރަ ބައެއް ކުންފުނި ތަކުގެ މުސާރަ އޮނިގަނޑު އޮތްގޮތުން ލިބޭ)
މިނިވަން މުައައްސަސާތަކުގެ އިސްވެރިންގެ މުސާރައިން 10 ޕަސެންޓު އުނިކުރުމަށް ކަމާބެހޭ ފަރާތްތަކަށް ހުށަހެޅުން.
ޝަރުޢީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން 10 ޕަސެންޓު އުނިކުރުމަށް އެ ފަރާތްތަކުގައި އެދުން.

އެ ފިޔަވަޅުތައް އަޅާއިރު 12,000ރ. އިން ދަށުން މުސާރަ ލިބޭ މީހުން އިސްތިސްނާ ވާނެ ކަމަށް ރައީސް ވިދާޅުވި އެވެ.

އޭގެ އިތުރުން އެމަނިކުފާނުގެ މުސާރައިގެ 50 ޕަސެންޓު ވެސް ނުނަގާ ގޮތަށް ހަމަޖެއްސުމަށް ދަންނަވާނެ ކަމަށް ރައީސް ވަނީ ވިދާޅުވެފަ އެވެ.

ރައީސް މުއިއްޒުގެ ނިންމުންތަކަށް ފާޑު ވިދާޅުވެ އެކްސްގައި ކުރެއްވި ޕޯސްޓެއްގައި އިދިކޮޅު އިސްވެރިއެއް ކަމުގައިވާ ފައްޔާޒު ވިދާޅުވީ، ޓެކްސްތައް ބޮޑުކޮށްފައި، ސިޔާސީ ވަޒީފާތަކުގެ މުސާރައިން 10 އިންސައްތަ އުނިކުރަން ނިންމި ނިންމުމަކީ "ދެބޯގެރިދުއްވުމެއް" ކަމަށް ސިފަކުރައްވައިފަ އެވެ.

ރައްޔިތުންނަށް ވީ ވައުދާ އެއްގޮތަށް ސިޔާސީ މުވައްޒަފުންގެ އަދަދު 700 އަށް ކުޑަކޮށްފައި ނޫނީ ރައްޔިތުންގެ އަތުން ނަގާ ޓެކްސް ބޮޑުކުރާ ވާހަކަ ދެއްކުން ވެސް ލަދުވެތި ކަމަށް ފައްޔާޒް ވިދާޅުވި އެވެ.

ފައްޔާޒުގެ އިތުރުން އެމްޑީޕީގެ ރައީސް އަބްދުﷲ ޝާހިދު މިރޭ "އެކްސް"ގައި ވިދާޅުވީ މި ސަރުކާރުން ބޭކާރު އިސްރާފު ހަރަދުތައް ކުޑަ ނުކުރާ ކަމަށާއި އޭގެ ބަދަލުގައި ރައްޔިތުން އަތުން ނަގާ ޓެކްސް ބޮޑު ކުރަން ނިންމާފައިވާ ކަމަށެވެ. އެކަން އެމަގުން ކުރުމަށް ފަހު ރައްޔިތުންގެ މުސާރަ އިން ބައެއް ނެގުމަށް ނިންމި ނިންމުމަކީ ރައްޔިތުން ދޫކޮށް އަމިއްލަ ޖާހަތަށް ހުދުމުހްތާރު ވެރިކަމަކަށް ސަރުކާރު މިސްރާބުޖެހި ކަމުގެ ރަނގަބީލު ކަމަށްވެސް ވިދާޅުވި އެވެ.

މީގެއިތުރުން ފެންނަމުން ދަނީ މި ސަރުކާރުން އިތުރުކުރި ސިޔާސީ މަގާމްތަކަށް މުސާރަ ދޭން ވެގެން ދައުލަތުގެ އެހެން ހުރިހާ މުވައްޒަފުން ގުރުބާންވާން ޖެހޭތަން ކަމަށް އެމްޑީޕީ ސަރުކާރުގެ ފިނޭންސް މިނިސްޓަރު އިބްރާހިމް އަމީރު ވެސް މިރޭ ވަނީވިދާޅުވެއްޖެ އެވެ.

އަމީރު "އެކްސް" ގައި ކުރެއްވި ޕޯސްޓެއްގައި ވިދާޅުވީ ސަރުކާރުން އިތުރަށް ނެގި ސިޔާސީ މީހުންނަށް އެކަނި ވެސް މަހަކު 50 މިލިއަން ރުފިޔާ ބަޖެޓުން ހަރަދު ކުރާ ކަމަށާއި 10 ޕަސަންޓް ކަނޑާލިއަސް 45 މިލިއަން ރުފިޔާ ދައްކާނީ ދައުލަތުގެ ބަޖެޓުން ކަމަށެވެ.

"ވައުދުވި ގޮތާއި ދިމާ އިދިކޮޅަށް ސިޔާސީ މީހުން ހާހުން އިތުރުކޮށް، ހަރަދުތައް ބޮޑުކޮށް، ސަރުކާރުގެ ފައިނޭންސިން ސްޓްރެޓެޖީ ފެއިލްވެ، މާލީ ކަންތައްތައް މެނޭޖް ނުކުރެވި، އޭގެ ނޭދެވޭ އަސަރު މިހާރު އިގްތިސާދަށް ވެސް ކުރާ ތަން. ސަރުކާރުން ހަރަދު ކުޑަކުރަންޖެހޭ،" އަމީރު ވިދާޅުވި އެވެ.

ދުނިޔޭގެ އިގްތިސާދީ ބޮޑު ކާރިސާއަށް ގައުމަށް ދިމާ ނުވާކަން ފާހަގަކުރައްވާ އަމީރު ވިދާޅުވީ ފެންނަމުން މިދަނީ ސަރުކާރުގައި ތިބި މީހުންގެ ނާގާބިލުކަމުން އަމިއްލައަށް ނެތް ހާލަތެއް އުފައްދައިގެން އޭގެއިން އަރައިގަނެވިގެން ނޫޅެވޭތަން ކަމަށެވެ.

އެގޮތުން އަމީރު ވިދާޅުވީ ދައުލަތަށް ކޮންމެ މަހަކު ވެސް ދައުލަތަށް ހަރަދު ހަމަޖެއްސޭ ވަރަށް ފައިސާ ވަންނަ ކަމަށާއި ދައްކަން ހުރި ލޯނުތަކަށް ފައިސާ ހޯދޭނެ ގޮތްތައް ފަހިވެ ހުރިކަމަށް ބުނެ ސަރުކާރުން ދެއްކި ވާހަކަ ދިމާނުވި ކަމަށެވެ.

"ދުނިޔެ އޮތީ އިގްތިސާދީ ބޮޑު ކާރިސާ އެއްގައެއް ނޫން. ކޮވިޑް-19 ފަދަ އާލަމީ ވަބާއެއް އޮތީކީ ނޫން. ބާޒާރުގައި ތެލުގެ އަގު ހުރީ އެވްރެޖްކޮށް ހުންނަ ވަރަށް. މި އަދު މި ފެންނީ ބައެއްގެ ނާގާބިލްކަމުން އަމިއްލައަށް ނެތް ހާލަތެއް އުފައްދައިގެން އޭގެއިން އަރައިނުގަނެވިގެން އުޅޭތަން،" އަމީރު ވިދާޅުވި އެވެ.

ރާއްޖޭގެ ބޭރު ފައިސާގެ ރިޒާވު ދަށްވެ، 2026 ވަނަ އަހަރު 500 މިލިއަން ޑޮލަރުގެ ސުކޫކް ދައްކަން ޖެހި، އިސްލާމީ ސޮވެރިން ދަރަނި ނުދައްކާ ފުރަތަމަ ގައުމަކަށް ރާއްޖެ ވެދާނެ ކަމުގެ ކަންބޮޑުވުން މިފަހަކަށް އައިސް ވަނީ އިތުރުވެފަ އެވެ.