ތުރުކީވިލާތުގެ ޖުމުހޫރީ ދުވަހުގެ ތަހުނިޔާ ރައީސް އެގައުމުގެ ރައީސަށް ފޮނުއްވައިފި

އަލީ ރާޒީ

29 އޮކްޓޫބަރ 2024 - 15:35

0 comments

ރައީސް ޑރ މުހައްމަދު މުއިއްޒު ތުރުކީވިލާތުގެ 101 ވަނަ ޖުމްހޫރީ ދުވަހުގެ މުނާސަބަތުގައި އެ ގައުމުގެ ރައީސް ރަޖަބް ތައްޔިބު އުރްދުގާނަށް ތަހުނިޔާ ފޮނުއްވައިފި އެވެ.

ރައީސް ތުރުކީވިލާތުގެ ރައީސަށް ތަހުނިޔާ ވިދާޅުވެ ފޮނުއްވި މެސެޖުގައި ވަނީ، ދިވެހިރާއްޖެ އާއި ތުރުކީވިލާތުގެ ގުޅުމަކީ އެއް ގައުމުން އަނެއްގައުމަށް ކުރާ އިތުބާރުގެ ބިންގާގެ މަތީގައި ބިނާކޮށްފައިވާ ވަރުގަދަ، ބަދަހި ގުޅުމެއްކަން ފާހަގަކުރައްވައި، ދެ ގައުމުގެ 45 އަހަރުވީ ހާރިޖީ ގުޅުމުގެ މައްޗަށް އަލިއަޅުއްވާލައްވާފަ އެވެ.

އަދި ޖޯގްރަފީ ގޮތުން ދެ ގައުމުގެ ދެމެދުގައިވާ ރާސްތާ ކިތަންމެ ދުރުކަމުގައިވިޔަސް، ބައިލެޓަރަލް އަދި މަލްޓިލެޓަރަލް މަންސަތަކުގައި ދެ ގައުމުގެ ދެމެދުގައިވާ ގުޅުން ފުރާފުރިހަމަވަމުން ދާނެކަމުގެ ޔަގީންކަން އެބައޮތްކަމަށްވެސް ރައީސް ވިދާޅުވެފައިވެ އެވެ.

އެމަނިކުފާނުގެ މެސެޖު ނިންމަވާލައްވާފައިވަނީ، ރައީސް އުރްދުގާނަށް ފުރިހަމަ ސިއްޙަތަކަށް އެދިވަޑައިގެން، ތުރުކީވިލާތުގައި އަމާންކަމާއި ފާގަތިކަން ދެމެހެއްޓުމަށް އެދިވަޑައިގަންނަވަމުންނެވެ.