ޔުނައިޓެޑުގެ ކޯޗުގެ މަގާމަށް އަމޮރިމް ހަމަޖައްސައިފި

ހަސަން ހަލީމް

01 ނޮވެމްބަރ 2024 - 23:10

0 comments

އިންގްލިޝް ޕްރިމިއާ ލީގުގެ މެންޗެސްޓާ ޔުނައިޓެޑްގެ އާ ކޯޗަކަށް ޕޯޗުގަލްގެ ރުބެން އަމޮރިމް ހަމަޖައްސައިފި އެވެ.

އުމުރުން 39 އަހަރުގެ އަމޮރިމް، ޔުނައިޓެޑްގެ ކޯޗުގެ ޒިންމާތަކާ ހަވާލުވާނީ މި މަހުގެ 11 ގައެވެ. އެއީ، އޭނާގެ މިހާރުގެ ޓީމު ކަމަށްވާ، ޕޯޗުގަލްގެ ސްޕޯޓިންގ ލިޒްބަންގެ ކޮންޓްރެކްޓްގައިވާ ނޯޓިސްގެ މުއްދަތު ހަމަކުރުމަށްފަހު މިވަގުތަށް އަދާކުރަންޖެހޭ ޒިންމާތައް އަދާކުރުމަށްފަހު އެވެ.

ޔުނައިޓެޑުން އާންމު ކުރި ބަޔާނެއްގައި ހާމަކުރިގޮތުގައި އަމޮރިމްއަކީ މިވަގުތު ޔޫރަޕްގެ ފުޓްބޯޅައިގާ އެންމެ ފާހަގަ ކޮށްލެވޭ ޒުވާން ކޯޗުންގެ ތެރެއިން އެއް ކޯޗު ކަމަށެވެ. ޔުނައިޓެޑުން މިކަން ހާމަކުރުމުގެ ކުރިން ސްޕޯޓިންއިން ވަނީ ޔުނައިޓެޑުން އެ ޓީމުގެ ކޯޗު އަމޮރިމް ގެންދިއުމުގެ ޝައުގުވެރިކަން ފާޅުކޮށް އޭނާގެ ރިލީސް ކްލައުސްގައި ހިމެނޭ 11 މިލިއަން ޔޫރޯ ދައްކަންވެސް ތައްޔާރަށް ތިބިކަން ހާމަކޮށްފައެވެ.

މިހާރު ހަމަޖެހިފައިވާގޮތުން އަމޮރިމް ޔުނައިޓެޑާއި މިހާރުވަނީ މިމަހުގެ އިންޓާނޭޝަނަލް ބްރޭކް އާއި ދިމާކޮށެވެ. އެހެން ކަމުން އޭނާގެ ކޯޗުކަމުގެ ދަށުން ޔުނައިޓެޑްގެ ކުޅޭ ފުރަތަމަ މެޗަށް ވެގެންދާނީ މިމަހުގެ 24 ވަނަ ދުވަހު ލީގުގައި ރަށުން ބޭރުގައި އަލަށް ޕްރޮމޯޓްވި އިޕްސްވިޗް ޓައުން އާއި ދެކޮޅަށް ކުޅޭ މެޗެވެ.

އަދި އޭނާ ޔުނައިޓެޑްގެ އޯލްޑް ޓްރެފަޑް ސްޓޭޑިއަމްގައި ކުޅޭ ފުރަތަމަ މެޗަށް ވެގެންދާނީ މި މަހުގެ 28ވަނަ ދުވަހު ޔޫރޮޕާ ލީގުގައި ނޯވޭގެ ބޯޑޯ/ގްލިމްޓް އާއި ދެކޮޅަށް ކުޅޭ މެޗެވެ. އަމޮރިމްގެ ކޯޗިން ޓީމަށް އިތުރު ވެގެންދާނެ އެހެން ކޯޗުންގެ ތަފްސީލް ޔުނައިޓެޑުން ފަހުން ހާމަކުރާނެކަމުގައި އެ ފަރާތުން ހާމަކުރެއެވެ.

"ކޮންމެވެސް ކަމެއް (ޔުނައިޓެޑްގައި) އެބަ އުނިވޭ. އަހަރެމެން ބޭނުން ކޮންމެވެސް ކަމެއް ސާބިތުކޮށް ދޭން. ކުރިއަށް ފިޔަވަޅެއް އަޅަން އެބަޖެހޭ،" އޭނާ ބުންޏެވެ.

ޔުނައިޓެޑްގެ ކުރީގެ ކޯޗު، އެރިކް ޓެން ހާގްގެ މަގާމުން ދުރުކުރީ، ލީގުގައި އެންމެ ފަހުން ވެސްޓް ހޭމް ޔުނައިޓެޑް އަތުން 2-1 އިން ބަލިވި މެޗަށްފަހު އެވެ. މި ފަހަރުގެ ސީޒަނުގައި އެ ޓީމުން ދަށް ނަތީޖާތަކެއް ނެރެފައިވާއިރު، މިވަގުތު އޮތީ ލީގުގެ 14 ވަނައިގައެވެ.

ޓެން ހާގް މަގާމުން ވަކިކުރުމަށްފަހު، ނިސްޓެލްރޫއީގެ ކޯޗުކަމުގައި ކުޅުނު ފުރަތަމަ މެޗުގައި އިނގިރޭސި ލީގު ކަޕްގައި ލެސްޓާ ސިޓީ އަތުން 5-2 ގެ ނަތީޖާއަކުން ވަނީ މޮޅުވެފަ އެވެ.

އަމޮރިމް އަކީ 2013 ވަނަ އަހަރުގައި ޔުނައިޓެޑްގެ ކޯޗުގެ މަގާމުން ސާރ އެލެކްސް ފާގަސަން ވަކިވިފަހުން، އެ ޓީމާ ހަވާލުވާނެ 10 ވަނަ ކޯޗެވެ.

ޔުނައިޓެޑްގެ ކޯޗުކަމުން އެރިކް ޓެން ހަގް މިދިޔަ މަހު ވަކިކުރުމުން އެ ޓީމުގެ ވަގުތީ ކޯޗުކަން ކުރަނީ ކުރީގެ ފޯވާޑް ރޫޑް ވަން ނިސްޓެލްރޯއީ އެވެ.