ދިވެހި ސަފީރު، އަފްޣާނު މަންދޫބާ ބައްދަލުކުރީ ހުއްދަ ނުހޯދާ؛ ފިޔަވަޅު އަޅައިފި

މަރިޔަމް އަނާ

03 ނޮވެމްބަރ 2024 - 21:37

0 comments

ދިވެހިރާއްޖެއިން ޕާކިސްތާނަށް ކަނޑައަޅުއްވާފައި ހުންނަވާ ސަފީރު މުހައްމަދު ތޯހާ، ޕާކިސްތާނަށް އަފްޣާނިސްތާނުން ކަނޑައަޅުއްވާފައި ހުންނަވާ މަންދޫބު ސަރުދާރު އަހުމަދު ޝަކީބާ ބައްދަލުކުރެއްވީ ދިވެހި ސަރުކާރުން ހުއްދަ ނުހޯދައި ކަމަށް ބުނެ، ފިޔަވަޅު އަޅައިފި އެވެ.

ޕާކިސްތާންގެ ވެރިރަށް އިސްލާމް އާބާދުގައި މި ދެ ބޭފުޅުން ބައްދަލުކުރެއްވީ މިދިޔަ ހުކުރު ދުވަހު އެވެ.

މިބައްދަލުކުރެއްވުމުގެ ފޮޓޯއެއް ސޯޝަލްމީޑިއާގައި އާންމުވުމާ ގުޅިގެން ދިވެހި ސަރުކާރުން އަފްޣާނިސްތާން ސަރުކާރު ބަލައިގަތީތޯ ބައެއް މީހުން ވަނީ ސުވާލު އުފައްދާފަ އެވެ.

އާންމުންގެ ސުވާލުތަކާ ގުޅިގެން ރާއްޖޭގެ ފޮރިން މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ މި ބައްދަލުކުރެއްވުމަކީ ދިވެހި ސަރުކާރުގެ ހުއްދައާއެކު ކުރިއަށް ގެންދިޔަ ބައްދަލުވުމެއް ނޫން ކަމަށެވެ. އަދި އެކަމާ ގުޅިގެން ދިވެހި ސަރުކާރުގެ ފަރާތުން އަޅަންޖެހޭ ފިޔަވަޅުތައް އަޅާފައިވާ ކަމަށްވެސް ބުންޏެވެ.

ފޮރިން މިނިސްޓްރީން ބުނި ގޮތުގައި ދިވެހިރާއްޖެ އިން ގައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއްގައި އަބަދުވެސް ބަލަނީ އދ އިން ކަނޑައަޅާފައިވާ މިންގަޑުތަކާއި އުސޫލުތަކަށެވެ.

އޮގަސްޓް 2021 އިން ފެށިގެން ތާލިބާނުން އަފްޣާނިސްތާނުގައި ވެރިކަން ކުރި ނަމަވެސް އދ. އިން ތާލިބާނުންގެ ވެރިކަން ބަލައިގެންފައެއް ނުވެއެވެ. ތިން ފަހަރެއްގެ މަތިން އދ. ގައި ބައިވެރިވާން އެދުމުން ވެސް ތާލިބާނުންނަށް އެ ފުރުސަތު ދީފައެއް ނުވެ އެވެ.

އެހެންވެ، އދ. ގައި އަފްޣާނިސްތާނު ތަމުސީލުކުރަން އަދިވެސް ހުންނަވަނީ ކުރީގެ ސަރުކާރުން އައްޔަންކުރި ބޭފުޅެކެވެ.