އިންޑިއާ ސަފީރަކަށް އަޒީމާ، ސައުދީ ސަފީރަކަށް ސަރީރު އައްޔަންކޮށްފި

މަރިޔަމް އަނާ

30 އޮކްޓޫބަރ 2024 - 13:13

0 comments

ރާއްޖެ އިން އިންޑިއާ އާއި ސައުދީ އަރަބިއްޔާ އަށް ކަނޑައަޅާ އާ ސަފީރުން މިއަދު އައްޔަން ކޮށްފި އެވެ.

އިންޑިއާގައި ހުންނަވާ ދިވެހި ސަފީރަކަށް އައްޔަން ކުރެއްވީ އާއިޝަތު އަޒީމާ އެވެ. ސައުދީ ސަފީރަކަށް އައްޔަން ކުރެއްވީ އަހުމަދު ސަރީރެވެ. އެއީ ހާރިޖީ ދާއިރާގައި ގިނަ ދުވަސްތަކެއް ވަންދެން ހިދުމަތް ކުރައްވާފައިވާ އެ ދާއިރާގެ ތަޖުރިބާކާރު ދެ ބޭފުޅުންނެވެ.

އަޒީމާ އާއި ސަރީރާ މަގާމުގެ ފަތްކޮޅު ހަވާލު ކޮށްދެއްވީ ރައީސް އޮފީހުގައި މިއަދު ބޭއްވި ރަސްމިއްޔާތެއްގައި ރައީސް ޑރ. މުހައްމަދު މުއިއްޒެވެ.

އަޒީމާއަކީ 1988ވަނަ އަހަރުން ފެށިގެން ފޮރިން މިނިސްޓްރީގައި މަސައްކަތް ކުރައްވަމުން ގެންދަވާ ޚާރިޖީ ދާއިރާގެ ތަޖުރިބާކާރެކެވެ. އޭނާގެ މީގެ ކުރިން ވަނީ ރާއްޖޭން ޗައިނާއަށް ކަނޑައަޅުއްވާފައި ހުންނަވާ ސަފީރުކަމުގެ އިތުރުން ޚާރިޖީ ދާއިރާގެ އެހެން އިސް މަގާމުތައް ވެސް ފުރުއްވައިފައެވެ.

މީގެއިތުރުން، ސަރީރު މީގެ ކުރިން ވަނީ ރާއްޖޭގެ ޚާރިޖީ ދާއިރާގެ އެކި މަގާމުތައް ފުރުއްވާފައެވެ. ރާއްޖޭގެ ޑިޕްލޮމެޓިކް މިޝަންތަކުގެ އެކި ފެންވަރުގެ މަގާމުތައް ވެސް އަދާކުރެއްވިއެވެ.