ޝަހީދުންގެ އާއިލާތަކަށް އެލަވެންސްދީ، ހައުސިން ޕްރޮގްރާމެއް ފަށަނީ

ހަސަން ހަލީމް

03 ނޮވެމްބަރ 2024 - 23:25

0 comments

ނަސްރު ދަވުހަގެ ހާއްސަ މައުރަޒު ރައީސް މިއަދު ބައްލަވާ ލައްވަނީ

ސިފައިންނާއި ފުލުހުންގެ ތެރެއިން ޝަހީދުވި މީހުންގެ އާއިލާތަކަށް އެލަވަންސެއް ހަމަޖައްސައި އެ އާއިލާތަކަށް ހާއްސަކޮށްގެން ބޯހިޔާވަހިކަމުގެ މަޝްރޫއެއް ފަށަން ނިންމައިފި އެވެ.

ޝަހީދުވާ ފަރާތަކަށް މިފަހުން ސަރުކާރުތަކުން މާ ބޮޑު ކަންތައްތަކެއް އަގުވަޒަން ކުރުމުގެ ގޮތުން ނުކޮށްދޭ ކަމުގެ ކަންބޮޑުވުން ފާޅުކުރައްވައި ރައީސް އެ ވައުދުވެވަޑައިގެންނެވީ ނަސްރުގެ ދުވަހުގެ މުނާސަބަތުގައި މިރޭ ދަރުބާރުގޭގައި ބޭއްވި ހާއްސަ ރަސްމިއްޔާތުގަ އެވެ.

އެ ޖަލްސާގައި ވާހަކަ ދައްކަވަމުން ރައީސް ވިދާޅުވީ، 3 ނޮވެމްބަރު 1988ގައި ރާއްޖެއަށް ދިން އުދުވާނީ ހަމަލާގައި އަށް ސިފައިން އާއި 11 އާންމު ރައްޔިތުން ހިމެނޭހެން ޖުމްލަ 19 ދިވެއްސަކު ޝަހީދުވެފައިވާކަމަށެވެ. އޭގެ އިތުރުން، މިދިޔަ 40 އަކަށް އަހަރު އެކި ހާދިސާތަކުގައި 29 ސިފައިންނާއި ދެ ފުލުހުން ވެސް ޝަހީދުވެފައިވާކަން ރައީސް ފާހަގަ ކުރެއްވި އެވެ.

"އެހެން ނަމަވެސް އެއްވެސް ކަމެއް [އެ އާއިލާތަކަށް] ސަރުކާރުން ނުކޮށްދެވޭ، އަމުދުން ފަހަކަށް އައިސް މި ފަރާތްތަކުގެ އަގުވަޒަން ކުރުމަށް އެއްވެސް ކަމެއް ނުކުރޭ. ކުރީގައި ޝަހީދުވި އާއިލާތަކަށް ކޮންމެވެސް ވަރެއްގެ ފައިސާގެ އެހީ ދޭ. އެހެން ނަމަވެސް ފަހަކަށް އައިސް އެއްވެސް ކަމެއް ނުކުރޭ،" ރައީސް ވިދާޅުވި އެވެ.

"އަންނަ އަހަރުން ފެށިގެން، ޝަހީދުވި އާއިލާތަކާއި 3 ނޮވެމްބަރުގެ މެޑަލް ފޯ އެކްސެޕްޝަނަލް ބްރޭވަރީ މެޑަލް ލިބުނު ފަސް ފަރާތާއި މެޑަލް ފޯ ބްރޭވަރީ ލިބިފައިވާ 10 ފަރާތް ހިމެނޭހެން، މި ހުރިހާ ފަރާތަކަށް ކަނޑައެޅޭ، ގެޒެޓުކުރެވޭ އުސޫލެއްގެ މަތިން ސަރުކާރުން ދެމެހެއްޓެނިވި ގޮތެއްގައި ހާއްސަ އެލަވަންސެއް ދޭނެ ވާހަކަ އަޅުގަނޑު ދަންނަވަން،" ރައީސް ވިދާޅުވި އެވެ.

"ޝަހީދުވި އާއިލާތަކަށް ހާއްސަކޮށް، ޝަހީދުވި ފަރާތްތަކަށް ހާއްސަކުރެވިގެން ހައުސިން ޕްރޮގްރާމެއް، 'ޝަހީދުންގެ ހިޔާ'ގެ ނަމުގައި 50 ހައުސިން ޔުނިޓު ހިމެނޭ ހައުސިން އިމާރާތެއް ކުރިއަށް އޮތް އަހަރުތަކުގައި، މި ދައުރުގެ ތެރޭގައި އަޅައި ނިންމާ މި އާއިލާތަކާ ހަވާލުކުރާނަން."

ދައުލަތުން މިފަދަ ކޮންމެ ކަމެއް ކޮށްދިން ނަމަވެސް ޝަހީދުވި ބޭފުޅުންގެ އާއިލާތަކުން ކަޑައްތު ކުރާ ހިތާމައެއް އަނބުރާ ނުދެވޭނެ ކަމަށާއި އަދި ޝަހީދުވި އަބްތާލުންގެ މަތިވެރި ޖިހާދުގެ އަގު ނުދެއްކޭނެކަން ރައީސް ފާހަގަކުރެއްވި އެވެ.

ނަސްރުގެ ދުވަސް ފާހަގަކުރަނީ ނަވާރަސަތޭކަ އަށްޑިހަ އަށްވަނަ އަހަރުގެ ނޮވެމްބަރު މަހުގެ ތިންވަނަ ދުވަހު ގައި އަވަށްޓެރި ސްރީލަންކާގެ ތަމަޅަ ހަނގުރާމަވެރިންގެ ބަޔަކު ގޮވައިގެން ދިވެހީންގެ ބަޔަކު ރާއްޖޭގެ ވެރިރަށް މާލެއަށް ހަމަލާދިން ދުވަހާ ގުޅުވައިގެންނެވެ. އެ ހާދިސާއަށް މިއަދު 36 އަހަރު ވަނީ ފުރިފަ އެވެ. އެ ދުވަހު، ދިން ނުރައްކާތެރި އުދުވާނީ ހަމަލާގައި ސިފައިންގެ 8 ބޭކަލަކާއި އާންމުންގެ 11 މީހުން ހިމެނޭހެން 19 ދިވެއްސަކު ޝަހީދުވި އެވެ.