3 ޓެކްސްއެއް ބޮޑުކުރާ ބިލުތައް ރައީސް ތަސްދީގުކުރައްވައިފި

އައިމިނަތު ޝިޔާޒާ

06 ނޮވެމްބަރ 2024 - 00:07

0 comments

ޓެކްސްތައް ބޮޑުކުރަން ސަރުކާރުން ހުށަހެޅި ބިލުތައް ރައީސް ޑރ. މުޙައްމަދު މުއިއްޒު މިއަދު ތަސްދީގު ކުރައްވައިފި އެވެ.

ޓީޖީއެސްޓީ، ގްރީން ޓެކްސް، އަދި އެއާޕޯޓު ފީތައް ބޮޑުކުރަން މަޖިލީހުން މިދިޔަ ބުރާސްފަތީގައި ފާސްކުރި ބިލުތައް މިއަދު ރައީސް ވަނީ ތަސްދީގު ކުރައްވާފަ އެވެ. މިއަދު އެ ގާނޫނުތައް ގެޒެޓު ކޮށްފައިވާއިރު ގާނޫނުތަކުގެ ދަށުން ހުރި ގަވާއިދުތަކަށް އިސްލާހު ގެނެސް 30 ދުވަހުގެ ތެރޭގައި ގެޒެޓު ކުރަން ޖެހޭ ކަމަށް ވަނީ ކަނޑައަޅާފަ އެވެ.

އެ އިސްލާހުތަކާ އެއްކޮށް އަންނަ އަހަރުގެ ޖުލައި މަހުން ފެށިގެން ޓީޖީއެސްޓީ 16 އިންސައްތައިން 17 އިންސައްތައަށް ބޮޑުވާނެ އެވެ.

ޓޫރިޒަމް ގާނޫނުގެ އިސްލާހާއެކު ޖެނުއަރީ، 2025ފެށިގެން، ކުރިން ހަ ޑޮލަރު ދައްކަމުން އައި ތަންތަނުން 12 ޑޮލަރު ދައްކަން ޖެހޭނެ އެވެ. އަދި ތިން ޑޮލަރު ދައްކަމުން އައި ތަންތަނުން ހަ ޑޮލަރު ދައްކަން ޖެހޭނެ އެވެ. މިއީ ކުރިން ދައްކަމުން އައި އަދަދަށް ވުރެ 100 ޕަސެންޓު އިތުރު އަދަދެކެެވެ.

އެއާޕޯޓް ޓެކްސް ވެސް ބޮޑުކުރަން ފާސްކުރީ އަންނަ މަހުގެ އެއްވަނަ ދުވަހުން ފެށިގެނެވެ. އެގޮތުން، އަންނާނެ ބަދަލުތަކަކީ؛

އިކޮނޮމީ ކްލާހުގައި ރާއްޖެއިން ބޭރަށް ދަތުރުކުރާ ދިވެހިންގެ އަތުން ނަގާ ޓެކްސްއަށް ބަދަލެއް ނަޔަސް، ބިދޭސީންގެ އަތުން ނަގަމުން އައި 30 ޑޮލަރުގެ ބަދަލުގައި 50 ޑޮލަރަށް ބޮޑުވާނެ އެވެ. އަދި ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން ނަގާ ފީ ވެސް 120 ޑޮލަރަށް ބޮޑުވާއިރު، ފަސްޓް ކްލާހުގައި ދަތުރުކުރާ މީހުންގެ އަތުން ނަގާ ފީ 240 ޑޮލަރަށް ބޮޑުވާނެ އެވެ.