ޓްރަމްޕަށް ރައީސް މަރުހަބާ ވިދާޅުވެއްޖެ

މަރިޔަމް އަނާ

06 ނޮވެމްބަރ 2024 - 15:05

0 comments

އެމެރިކާގެ ރިޔާސީ އިންތިހާބު ކާމިޔާބު ކުރެއްވި ޑޮނަލްޑް ޓްރަމްޕަށް، ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.

ސޯޝަލްމީޑިއާގައި ރައީސް ކުރެއްވި ޕޯސްޓެއްގައި ވިދާޅުވީ ރާއްޖެއާއި އެމެރިކާގެ ގުޅުމަކީ އެއް ގައުމުން އަނެއް ގައުމަށް ކުރާ އިހްތިރާމާއި ހެޔޮނިޔަތާއި އަމިއްލަ ވިސްނުމެއްގެ މައްޗަށް ބިނާވެފައިވާ ހަރުދަނާ ގުޅުމެއް ކަމަށެވެ.

ދެ ގައުމުގެ ދެމެދުގައި އޮތް ގުޅުން އިތުރަށް ހަރުދަނާކޮށް، ގޮންޖެހުންތަކަށް ހައްލު ހޯދައި، ދުނިޔޭގެ ސުލްހައާއި ހަމަޖެހުމަށް މަސައްކަތް ކުރުމަށް ތައްޔާރަށް ހުންނެވި ކަމަށްވެސް ރައީސް ވިދާޅުވެފައިވެ އެވެ.

އެމެރިކާގެ ރިޔާސީ އިންތިހާބު ޓްރަމްޕް ކާމިޔާބު ކުރެއްވި ނަމަވެސް އަދިވެސް ވޯޓު ގުނަމުންދާތީ ވާދަވެރި ޑިމޮކްރެޓިކް ޕާޓީގެ ރިޔާސީ ކެންޑިޑޭޓް އަދި އެމެރިކާގެ ނައިބް ރައީސް ކަމަލާ ހެރިސް އަދި ބަލިގަބޫލެއް ނުކުރައްވަ އެވެ.

ކަމަލާ އަށް ލިބިފައި ވަނީ 214 އިލެކްޓަރުންގެ ވޯޓެވެ. އެހެންކަމުން މި އިންތިހާބު ކާމިޔާބު ކުރުމުގެ ފުރުސަތު ކަމަލާ އަށް މިހާރު ވަނީ ބަންދުވެފަ އެވެ.

މިއީ ޓްރަމްޕްް އެމެރިކާގެ ރިޔާސީ އިންތިހާބު ކާމިޔާބު ކުރެއްވި ދެވަނަ ފަހަރެވެ. އޭނަ އެމެރިކާގެ ރައީސްކަން ފުރަތަމަ ކުރެއްވ 2016-2020 އަށެވެ. އަދި 2020 ގައި ދެވަނަ ދައުރަކަށް ވާދަކުރައްވައި ބަލިވެވަޑައިގަތީ މިހާރުގެ ރައީސް ޖޯ ބައިޑެންއާ ވާދަކޮށެވެ. ފާހަގަކޮށްލަން ޖެހޭ ކަމަކީ އެ ފަހަރު ވެސް އޭނަ އިންތިހާބު ކާމިޔާބު ކުރެއްވީ އަންހެން ކެންޑިޑޭޓަކާ ވާދަކުރައްވައިކަމެވެ.

ދެހާސް ސޯޅައިގައި ޓްރަމްޕާ ވާދަކުރެއްވީ ކުރީގެ ރައީސް ބިލް ކްލިންޓަންޓަންގެ އަނބިކަނބަލުން ހިލަރީ ކްލިންޓަނެވެ.