އެސްޓީއޯ ރޭޓުގައި ތެޔޮ ވިއްކަން އިހަވަންދޫގައި މަޝްރޫއެއް ފަށައިފި

އިސްމާއިލް ރިޒާ

07 ނޮވެމްބަރ 2024 - 18:56

0 comments

ރާއްޖޭގެ ކޮންމެ އަތޮޅެއްގައި ތެޔޮ ރައްކާކުރެވޭނޭ ނިޒާމު ގާއިމުކުރުމުގެ މަޝްރޫއު ގެ ދަށުން ހއ. އިހަވަންދޫގައި އެސްޓީއޯ ރޭޓުގައި ތެޔޮ ވިއްކަން މަޝްރޫއެއް ފަށައިފި އެވެ.

ކޮންމެ އަތޮޅަކުން މަދުވެގެން އެއް ރަށުން އެސްޓީއޯގެ ރޭޓުގައި ޑީސަލް ގަންނަން ލިބޭނެ ގޮތް ހަމަޖެއްސުމަކީ ރައީސް ޑރ.މުހައްމަދު މުއިއްޒުގެ ރިޔާސީ ވައުދުފުޅެކެވެ. އަދި އެ އިންތިޒާމު ހަމަޖެއްސުމަށް ހާއްސަ މަޝްރޫއެއް އެސްޓީއޯއިން މިއަދުވަނީ ފަށާފަ އެވެ.

އަތޮޅު ތެރޭގައި އެސްޓީއޯގެ އަގުތަކުގައި ތެޔޮ ލިބޭނެ އިންތިޒާމު ހަމަޖެއްސުމުގެ މަޝްރޫއު އިފުތިތާހުކޮށްދެެއްވީ ރައީސް ޑރ.މުހައްމަދު މުއިއްޒެވެ.

މި މަޝްރޫއުގެ އަމާޒަކީ ފެބްރުއަރީ 2026 ގެ ކުރިން ރާއްޖޭގެ ހުރިހާ އަތޮޅެއްގައި ފިއުލް ސެޓަޕް ގާއިމުކޮށް މަސްވެރިންނާއި އާންމުންނަށް ތެޔޮ ލިބޭނޭ ނިޒާމު ގާއިމުކުރުން ކަމަށް ސްޓޭޓް ޓްރޭޑިންގް އޯގަނައިޒޭޝަން (އެސްޓީއޯ)ގެ މެނޭޖިން ޑިރެކްޓަރު ޝިމާދް އިބްރާހިމް ވިދާޅުވި އެވެ.

މި ރަށްތަކުގައ ހަދާ ސެޓްއަޕް ހަދާނީ ތާނގީ ބެހެއްޓުމުގެ ބަދަލުގައި ތެޔޮ ކޮންޓެއިނަރު ބަހައްޓައިގެން ތެޔޮ ވިއްކޭ ގޮތަށް ކަމުގައި ޝިމާދު ވިދާޅުވި އެވެ.

އެގޮތުން މިއަހަރުގެ ޖެނުއަރީ މަހު ވަނީ ހުޅުމާލޭގައި ސެޓަޕް ގާއިމުކޮށްފަ އެވެ. އަދި ޅ. ފެލިވަރާއި ގއ. ކޫއްޑޫގައި ހުންނަ އެފްއެސްއެމް ޝެޑުން ހެޔޮ އަގުގައި ދަނީ ތެޔޮ ފޯރުކޮށްދެމުންނެވެ. މީގެ އިތުރުން ފެބްރުއަރީ 2025 ގެ ނިޔަލަށް އައްޑޫ ސިޓީ ހުޅުމީދޫގައި ސެޓަޕް ގާއިމުކުރުމަށް ވަނީ ތާވަލުކޮށްފަ އެވެ.

އޮކްޓޫބަރު 2025 ގެ ނިޔަލަށް ހިދުމަތް ގާއިމުކުރާ ރަށްތައް

ހއ. އިހަވަންދޫ
ހދ. ހަނިމާދޫ
ފ. ނިލަންދޫ
ގދ. ފަރެސްމާތޮޑާ
ފުވައްމުލައް ސިޓީ

މީގެ އިތުރުން ށ. މިލަންދޫ، ނ. މަނަދޫ، ބ. ތުޅާދޫ، ވ. ފެލިދޫ، ތ. ހިރިލަންދޫ، ރ. ދުވާފަރު، އއ. މަތިވެރި، މ. މުލައް، ދ. ކުޑަހުވަދޫ އަދި ލ. ގަމުގައި ފެބްރުއަރީ 2026 ގެ ނިޔަލަށް މި ސެޓަޕް ގާއިމުކުރުމަށް ވަނީ ހަމަޖެހިފަ އެވެ.