4،000 ފްލެޓު ލިބޭ މީހުންގެ ވަގުތީ ލިސްޓު އަންނަ ހަފްތާގައި އިއުލާން ކުރަނީ

އައިމިނަތު ޝިޔާޒާ

10 ނޮވެމްބަރ 2024 - 15:04

0 comments

ގެދޮރުވެރިޔާ ސްކީމްގެ ދަށުން ހުޅުމާލޭގައި އިމާރާތްކުރާ 4،000 ފްލެޓް ލިބޭ މީހުންގެ ވަގުތީ ލިސްޓް އަންނަ ހަފުތާގައި އާންމުކުރާނެ ކަމަށް ހައުސިން މިނިސްޓަރު ޑރ. އަލީ ހައިދަރު އަހުމަދު ވިދާޅުވެއްޖެ އެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމުގައި ރޭ ވާހަކަދައްކަވަމުން މިނިސްޓަރު ހައިދަރު ވިދާޅުވީ މިހާރު މަސައްކަތް ކުރަމުން އަންނަނީ ފްލެޓު ލިބޭ މީހުންގެ ލިސްޓު އިވެލިއުއޭޓު ކުރުމުގެ މަސައްކަތް ކަމަށެވެ. އަލުން އިއުލާނު ކުރާ ލިސްޓު ނެރުމަށްފަހު އެ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާނެ ކަމަށް ވެސް މިނިސްޓަރު ފާހަގަކުރެއްވިއެވެ.

"އިރާދަކުރެއްވިއްޔާ ފުލެޓްތައް ހަވާލުކުރާނަން މިއަހަރު ނިމުމުގެ ކުރިން،" މިނިސްޓަރު ހައިދަރު ވިދާޅުވިއެވެ.

ހައުސިން މިނިސްޓްރީން މީގެ ކުރިން ބުނެފައިވަނީ ފްލެޓް ލިބޭ މީހުންގެ ލިސްޓް އޮކްޓޫބަރު މަހު އާންމުކުރާނެ ކަމަށެވެ. ނަމަވެސް ލިސްޓް ނެރުން ލަސްކުރީ ހުރިހާ ފޯމުތަކެއް ބެލުމަށް އިތުރު ވަގުތު ބޭނުންވާތީ ކަމަށް އެ މިނިސްޓްރީން ބުންޏެވެ.

ނިމިދިޔަ ސަރުކާރުން ހުޅުމާލޭގައި އިމާރާތްކުރަން ފެށި ފްލެޓުތަކަށް އެދި 20،697 މީހަކު ފޯމު ހުށަހަޅާފައިވެއެވެ. އެގޮތުން ތިން ކޮޓަރީގެ ފްލެޓަށް 14،489 ފޯމަކާއި ދެ ކޮޓަރީގެ ފްލެޓަށް އެދި 6،208 ފޯމު ހުށަހަޅާފައިވެއެވެ.

ކުރީގެ ސަރުކާރުން އެކުލަވާލި ފްލެޓް ލިސްޓަށް އަމަލު ކުރުން ހުއްޓާލީ ފްލެޓް ލިބުނު ކަމަށް ކަނޑައެޅި މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ ބައެއް ކަމަށް އޭސީސީން ބުނުމުންނެވެ.