ފުވައްމުލަކުން ގެއްލުނު ފިރިހެން ކުއްޖާ ފެނިއްޖެ

އައިމިނަތު ޝިޔާޒާ

10 ނޮވެމްބަރ 2024 - 20:00

0 comments

ފުވައްމުލައް ސިޓީން ގެއްލިގެން ހޯދި ހަތަރު އަހަރުގެ ކުޑަ ފިރިހެން ކުއްޖާ މިހާރު ފެނިފައިވާކަަމަށާއި ކުއްޖާގެ ހާލު ރަނގަޅުކަމަށް ފުލުހުން ބުނެފި އެވެ.

ކުޑަކުއްޖާ ހޯދުމަށް އާއްމުންގެ އެހީތެރިކަމަށް އެދި، އެ ކުއްޖާގެ އާއިލާއިން މިއަދު އިރުއޮއްސުނު އިރު ވަނީ ފޭސްބުކްގައި ޕޯސްޓެއް އާއްމުކޮށްފަ އެވެ. އޭގައި ބުނެފައިވާ ގޮތުގައި ކުއްޖާ ގެއްލުނީ ދިގުވާޑު އަވަށު ފްލެޓްތައް ކައިރިންނެވެ.

ފުވައްމުލަކު ކައުންސިލުން ބުނި ގޮތުގައި އެ ކުއްޖާ ދިރިއުޅެނީ އެއިން ފްލެޓެއްގަ އެވެ. ގެއްލުނީ ހަވީރު ފަހެއް ޖަހާކަންހާއިރު އެވެ.

ނަމަވެސް، އޭނާ ހޯދަމުން ދަނިކޮށް ވަނީ ފެނިފަ އެވެ. ފުލުހުން ބުނީ އެ ކުއްޖާގެ ހާލު ރަނގަޅު ކަމަށެވެ.

ފުވައްމުލަކުން މައުލޫމާތު ދިން މީހަކު ބުނި ގޮތުގައި އެ ކުއްޖާ ފެނުނީ ކުއްޖާގެ އާއިލާ ދިރިއުޅޭ ފުލެޓާއި އެއް ފުލެޓު ދޫކޮށް ހުންނަ ފުލެޓަކުން ކަމަށެވެ. އަދި އެ ކުއްޖާ ހޯދުމުގައި ފުލުހުންގެ އިތުރުން ރަށުގެ ގިނަ ބަޔަކު ބައިވެރިވި ކަމަށް ވެސް އޭނާ ބުންޏެވެ.