އެފްޑީސީން 13،000 ހައުސިން ޔުނިޓް އަޅަން ފަށަނީ

އަލީ ރާޒީ

01 ޑިސެމްބަރ 2024 - 13:33

0 comments

މާލެ ސަރަހައްދުގައި އިތުރު 13،000 ހައުސިން ޔުނިޓް ތަރައްގީ ކުރަން ފަހި ދިރިއުޅުން ކޯޕަރޭޝަން އެފްޑީސީ) އިން ނިންމައިފި އެވެ.

ބޯހިޔާވަހިކަމުގެ އެ މަޝްރޫއުތައް ކުރިއަށް ގެންދަން އެފްޑީސީން މިހާރު ވަނީ ބޭރުގެ ތިން ކުންފުންޏަކާ އެކު ފްރޭމްވޯކް އެއްބަސްވުންތަކެއްގައި ސޮއިކޮށްފަ އެވެ. އޭގެ ތޭރެއިން 3،000 ޔުނިޓް އަޅަން ފްރޭމްވޯކް އެއްބަސްވުމުގައި ސޮއިކުރީ ސްރީ ލަންކާގެ ކުންފުންޏަކާ އެކު އެވެ.

ހަމްދާން ވިދާޅުވީ ބޭރުގެ އިތުރު ދެ ކުންފުންޏަކާ އެކު ޖުމުލަ 10،000 ހައުސިން ޔުނިޓް ތަރައްޤީކުރުމުގެ ފްރޭމް ވޯކް އެއްބަސްވުމެއްގައި ވެސް ސޮއިކޮށްފައިވާ ކަމަށެވެ. އަދި އެ މަޝްރޫޢުތައް ކުރިއަށް ގެންދާނީ ބޭރުގެ އެކި ފައިނޭންސް އެޖެންސީތަކުން ލޯނު ނަގައިގެން ކަމަށް ވެސް ވިދާޅުވި އެވެ.

"ދެ މަސްދުވަހުގެ ތެރޭގައި އެ މަޝްރޫޢުތައް ކުރިއަށް ގެންދިޔުމުގެ ހުއްދަ ހޯދުމަށް ސަރުކާރަށް ހުށައަޅާނެ. ކުރިއަށް އޮތް ހަތަރު މަސް ދުވަހުގެ ތެރޭގައި މަޝްރޫޢުތައް އިފްތިތާހު ކުރާނެ،" ހަމްދާން ވިދާޅުވި އެވެ. "ސޯޝަލް ހައުސިން ބޭނުންވާ ކޮންމެ ރަށެއްގައި އެފަދަ މަޝްރޫޢުތައް ކުރިއަށް ގެންދިޔުމަށް އަޅުގަނޑުމެން މި ތިބީ ތައްޔާރަށް."

އެފްޑީސީން 13،000 ހައުސިން ޔުނިޓްގެ މަޝްރޫއަކަށް ތައްޔާރީޔައްވާ އިރު، އެ ކުންފުނީގެ ދަށުން މިހާރު ކުރިއަށް ގެންދާ މަޝްރޫއަކީ ހުޅުމާލެ ދެވަނަ ފިޔަވަހީގެ 4000 ފްލެޓް މަަޝްރޫއު އެވެ.

އެފްޑީސީއަކީ ސޯޝަލް ހައުސިން މަޝްރޫއުތައް ހިންގަން 2019 ގައި އުފެއްދި ކުންފުންޏެކެވެ. އެ ކުންފުނިން މިހާރު އަންނަނީ ހުޅުމާލޭގެ ދެވަނަ ފިޔަވަހީގައި 4،000 ފްލެޓް އެޅުމުގެ މަސައްކަތް ކުރަމުންނެވެ.

އެ ފްލެޓްތަކުގެ މަސައްކަތް އެއްކޮށް ނިންމައި އަންނަ އަހަރު އެތަނުގައި މީހުންނަށް އުޅެވޭނެ ކަމަށް ސަރުކާރުން ބުނެފައިވެ އެވެ.