އެފްއެސްއެމްގެ މުވައްޒަފުންތަކެއް ތެލުން ވައްކަންކުރި ކަމަށް ބުނާ މައްސަލައެއް

މަރިޔަމް އަނާ

02 ޑިސެމްބަރ 2024 - 09:17

0 comments

ފިއުލް ސަޕްލައިސް މޯލްޑިވްސް (އެފްއެސްއެމް)ގެ މުވައްޒަފުންތަކެއް އެ ކުންފުނީގެ ތެލުން ވައްކަންކޮށް، އޭގެއިން ލިބޭ ފައިސާ ލޯންޑާ ކުރަމުންދާ ކަމަށް ބުނާ މައްސަލައެއް ފެންމަތިކޮށްފި އެވެ.

ހޯމް މިނިސްޓަރު އަލީ އިހުސާނު ރޭ އެކްސްގައި ކުރެއްވި ޕޯސްޓެއްގައި ވިދާޅުވީ އެފްއެސްއެމްގެ މުވައްޒަފުންތަކެއް ކުންފުނީގެ ތެލުން ވައްކަންކޮށް އެ ވައްކަމުން ހޯދާ ފައިސާ ލޯންޑާކުރަމުންދާ ކަމަށް ޝައްކުވާ މައްސަލައެއް ފުލުހުން ތަހުގީގުކުރަން ފަށާފައިވާ ކަމަށެވެ.

އެ މައްސަލައާ ގުޅިގެން ފުލުހުން މިހާތަނަށް 10 މީހަކާއި ދެ ގެއާއި ތެޔޮ އުފުލާ ދެ ބާޖު ބަލައިފާސްކޮށްފައިވާ ކަމަށާއި ފުލުހުންގެ މި އޮޕަރޭޝަންތަކުގައި މައްސަލައާ ގުޅުންހުރި އިލެކްޓްރޯނިކް ސާމާނާއި ލިޔެކިޔުން ހޯދާފައިވާ ކަމަށް އިހުސާން ވިދާޅުވި އެވެ.

އިހުސާން އިތުރަށް ވިދާޅުވީ މައްސަލައިގެ ތަހުގީގު ކުރިއަށްދާ މިންވަރަކުން އެ މައްސަލައާ ގުޅުންހުރި އިތުރު ތަފުސީލުތައް ހާމަކުރައްވާނެ ކަމަށެވެ.

"މިފަދަ މައްސަލަތައް ހޯދާ ފުރިހަމައަށް އަވަހަށް ތަހުގީގުކޮށް ވަކި މީހަކު އިސްތިސްނާނުކޮށް ގާނޫނީ ފިޔަވަޅު އެޅުމަކީ ރައީސް ޑރ. މުއިއްޒު ވަރަށް އިސްކަންދެއްވާ ކަމެއް،" އިހުސާން ވިދާޅުވި އެވެ.

އެފްއެސްއެމްގެ މުވައްޒަފުންތަކެއް އެ ކުންފުނީގެ ތެލުން ވައްކަންކޮށް، އޭގެއިން ލިބޭ ފައިސާ ލޯންޑާ ކުރަމުންދާ ކަމަށް ބުނާ މައްސަލައެއް ފެންމަތިކޮށްފައި މިވަނީ އެ ކުންފުނީގެ މެނޭޖިން ޑިރެކްޓަރު އިސްމާއީލް ސުހައިލްއަށް ބޮޑެތި ތުހުމަތުތަކެއް ކުރެވިފައި ވަނިކޮށް މިދިޔަ މަހުގެ 26 ވަނަ ދުވަހު އޭނާ މަގާމުން ވަކިވެވަޑައިގެންފައިވާ ވަގުތެއްގައެވެ.

މީގެ ކުރިން ވެސް މި ކަހަލަ މައްސަލައެއް ވަނީ ފެންމަތިވެފަ އެވެ. މިދިޔަ ޖެނުއަރީ މަހު ފުލުހުން ބުނި ގޮތުގައި، އެމްޕީއެލްއަށް ޑެލިވަރީ ނުކުރާ ތެޔޮތަކެއް އެމްޕީއެލްއަށް ލިބިފައިވާ ކަމަށް ބަޔާންކޮށް، 119 ޑެލިވަރީ އޯޑާއަކަށް އެމްޕީއެލްއިން އެފްއެސްއެމްއަށް ފައިސާ ދޫކޮށް އެ ފައިސާއަށް ހިޔާނާތްތެރިވެފައިވާ ކަމަށް ތުހުމަތުކުރެވޭ ހެކި ވަނީ ލިބިފަ އެވެ.

އޭރު ފުލުހުން ބުނި ގޮތުގައި، ޖުމްލަ 6.7 މިލިއަނަށް ވުރެ ގިނަ ރުފިޔާ އެމްޕީއެލްގައި މަސައްކަތްކުރާ މުވައްޒަފުންނާއި އެފްއެސްއެމްގައި މަސައްކަތްކުރާ މުވައްޒަފުން ގުޅިގެން ހިޔާނާތްތެރިވި ކަމަށް ތަހުގީގަށް ވަނީ ހޯދިފަ އެވެ.

އެ މައްސަލާގައި ޝާމިލުވަނީ އެއް ބިދޭސީއަކާއި ހަތަރު ދިވެއްސެކެވެ. އެއީ އެފްއެސްއެމްގައި މަސައްކަތްކުރާ ތިން މުވައްޒަފަކާއި އެމްޕީއެލްގައި މަސައްކަތްކުރާ ދެ މުވައްޒަފެކެވެ. އެ އެންމެންގެ މައްޗަށް ދައުވާކުރަން ވެސް ފޮނުވި އެވެ.