ރައީސް މުއިއްޒު އއ. އާއި ކ. އަތޮޅަށް

އަލީ ރާޒީ

08 ޑިސެމްބަރ 2024 - 10:03

0 comments

ރައީސް ޑރ. މުޙައްމަދު މުއިއްޒު އއ. އަތޮޅާއި ކ. އަތޮޅުގެ ބައެއް ރަށްތަކަށް ކުރައްވާ ދަތުރުފުޅެއްގައި މިއަދު ހެނދުނު ފުރާވަޑައިގެންފި އެވެ.

ދެ ދުވަހުގެ މުއްދަތަކަށް ކުރައްވާ މި ދަތުރުފުޅުގައި އެ މަނިކުފާނު މިއަދު ވަޑައިގަންނަވާނީ އއ. އަތޮޅުގެ ބައެއް ރަށްތަކަށެވެ. އެއީ ތޮއްޑު އާއި ރަސްދު އާއި މަތިވެރިއަށެވެ.

އެންމެ ފުރަތަމަ ވަޑައިގަންނަވަނީ ތޮއްޑުއަށެވެ. އެ ރަށު އަންހެނުންގެ ތަރައްގީއަށް މަސައްކަތް ކުރާ ކޮމެޓީއާ ބައްދަލު ކުރެެއްވުމަށް ފަހު ރައްޔިތުންނާ ވެސް ރައީސް މިއަދު ބައްދަލު ކުރައްވާނެ އެވެ.

އެ އަށް ފަހު، ރަސްދު އަށް ވަޑައިގެން އެ ރަށު ކައުންސިލާ ބައްދަލު ކުރައްވައި، އުކުޅަހު ކައުންސިލާ ވެސް އެ އިދާރާގައި ބައްދަލު ކުރައްވާނެ އެވެ.

ހަވީރު މަތިވެރިއަށް ވަޑައިގެން އެ ރަށު ކައުންސިލްގެ އިތުރުން ހިމަންދު އާއި މާޅޮހާއި ފެރިދޫ އަދި ބޮޑުފޮޅުދޫގެ އަންހެނުންގެ ތަރައްގީއަށް މަސައްކަތް ކުރާ ކޮމެޓީއާ ވެސް ބައްދަލު ކުރައްވާނެ އެވެ.

ރައީސް މުއިއްޒުގެ މި ދަތުރުފުޅުގައި މާދަމާ ކ. އަތޮޅުން ވަޑައިގަންނަވާނީ ގާފަރާއި ހުރާ އަދި ހިންމަފުއްޓަށް ކަމަށް ރައީސް އޮފީހުން ބުންޏެވެ.

މީގެ ކުރިން، ރައީސް ވިދާޅުވެފައިވަނީ، އަމާޒަކީ މި ފަސް އަހަރުގެ ތެރޭގައި ރާއްޖޭގެ ކޮންމެ ރަށަކަށް ވެސް މަދުވެގެން ދެ ފަހަރު ޒިޔާރަތްކުރެއްވުމަށް މަސައްކަތްޕުޅު ކުރެއްވުން ކަމަށެވެ.