ބައްޝާރާއި އާއިލާ ތިބީ ރަޝިއާގައި: މޮސްކޯ

ހުމާ ނަސީމް

09 ޑިސެމްބަރ 2024 - 10:59

0 comments

ސީރިއާގެ ކުރީގެ ރައީސް ބައްޝާރުލް އަސަދު ގައުމު ދޫކުރައްވައި ފިއްލެވީ ކަމަށް މީޑީއާގައި ވާހަކަދެވެމުން ދަނިކޮށް -- އަސަދާއި އޭނާގެ އާއިލާ ރަޝިއާގެ ވެރިރަށް މޮސްކޯގައި ތިއްބެވިކަން އެ ގައުމުން އިއުލާންކޮށްފި އެވެ.

ނަން ހާމަނުކުރާ ފަރާތާ ހަވާލާދީ އިންޓަފެކްސް ނިއުސް އެޖެންސީން ބުނެފައިވަނީ ސީރިއާގެ ރައީސް އަލްއަސަދު މޮސްކޯއަށް ވަޑައިގެންފައިވާކަމަށެވެ. އަދި ރަޝިޔާއިން ބައްޝާރަށާއި އޭނާގެ އާއިލާއަށް ހިމާޔަތް ދީފައިވަނީ އިންސާނީ ސަބަބުތަކާހުރެ ކަމަށް ވެސް އެ ނޫހުން ބުނެފައިވެއެވެ.

ރަޝިއާގެ ގައުމީ ޓީވީން ވެސް ވަނީ ބައްޝާރު ރަޝިއާގައި ހުންނެވިކަން ރިޕޯޓުކޮށްފަ އެވެ.

"ސޫރިޔާގެ ރައީސް އަސަދާއި އޭނާގެ ޢާއިލާ ވަނީ މޮސްކޯއަށް ދަތުރު ކޮށްފައި. އިންސާނިއްޔަތު ކަން އިސްކޮށް ރަޝިޔާއިން ވަނީ އެ ބޭފުޅުންނަށް ޙިމާޔަތް ދީފައި،" ރަޝިޔާގެ އިންޓަރފެކްސް ނޫސް އޭޖެންސީއަށް މައުލޫމާތު ދެމުން ރަޝިޔާ ރިޔާސީ ގަނޑުވަރު، ކްރެމްލިންގެ މަސްދަރުތަކުން ބުންޏެވެ.

ބައްޝާރު ގައުމު ދޫކުރައްވައި ވަޑައިގެން މިހާރު ވަނީ ވެރިކަން ދޫކޮށްލައްވާފަ އެވެ. އޭނާއަށް މިހާލަތު ޖެހިވަޑައިގަތީ ރައްޔިތުންގެ ނުގަބޫލުގައި ވެރިކަމުގައި ދެމިހުންނަަވަން ހަދައިގެންނެވެ.

ސީރިއާ ތެރެއިން ސަރުކާރާ ދެކޮޅަށް ނުކުތް ހަތިޔާރުއެޅި ޖަމާއަތްތަކާ ދެކޮޅަށް އަސަދުގެ ސަރުކާރުގެ އަސްކަރިއްޔާ އިން 2011 ގައި ދިން ހަމަލާތަކުގެ ސަބަބުން މުޅި ގައުމުގައި އަހުލީ ހަނގުރާމައެއް ފެށިގަތެވެ.

ސޫރިއާގެ ސަރުކާރާއި އިދިކޮޅު ފަރާތްތަކާ ދެމެދު ހަނގުރާމަ ކުރާތާ މިހާރު 13 އަހަރަށް ވުރެ ދިގު މުއްދަތެއް ވެފައިވާއިރު، މީގެ 10 ވަރަކަށް ދުވަސް ކުރިން ހަނގުރާމަވެރިން ވަނީ ކުއްލި ގޮތަކަށް ހަމަލާތައް ވަރުގަދަކޮށްފައެވެ.

އެގޮތުން ސޫރިއާގެ އިދިކޮޅު ހަނގުރާމަވެރިން ރޭ ދިމިޝްގަށް ވަދެގަތުމާއެކު ބައްޝާރު، އާއިލާއާއެކު ފިއްލަވައިފައިވާ ކަމަށް ރިޕޯޓުތަކުގައިވެ އެވެ. ސޫރިޔާގެ ހާލަތު ބަދަލުވި ގޮތާ މެދު ރަޝިޔާއިން ވަނީ ކަންބޮޑުވުން ފާޅުކޮށްފައެވެ.