އިލެކްޝަން ކޮމިޝަންގެ މެންބަރު ކަމަށް އައްޔަން ކުރަން ދެ ބޭފުޅެއްގެ ނަން ފޮނުވައިފި

އިސްމާއިލް ރިޒާ

12 ޑިސެމްބަރ 2024 - 17:01

0 comments

އިލެކްޝަންސް ކޮމިޝަން (އީސީ) އަށް އައްޔަންކުރަން ދެ ބޭފުޅެއްގެ ނަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހަޅުއްވައިފި އެވެ.

އީސީގެ މެންބަރުކަމުގެ ދެ މަގާމު ހުސްވީ އެ ކޮމިޝަންގެ ނައިބުރައީސްގެ މަގާމުގައި ހުންނެވި އަލީ ނަޝާތު އާއި މެންބަރު މުހައްމަދު އާސިފް މަގާމުން ވަކިކުރަން ރައްޔިތުންގެ މަޖިލީހުން މިދިޔަ މަހުގެ 25 ވަނަ ދުވަހު ފާސްކުރުމުންނެވެ.

ރައީސް މުއިއްޒު މަޖިލީހަށް ފޮނުއްވި ސިޓީގައި ވަނީ އީސީގެ މެންބަރު ކަމަށް ކުރިމަތިލުމަށް އާންމުކޮށް އިއުލާނުކުރުމުން އެކަމަށް އިޖާބަ ދެއްވި ބޭފުޅުންގެ ތެރެއިން ރައީސަށް ފެނިވަޑައިގަންނަވާ ދެ ބޭފުޅެއްގެ ނަމާއި މައުލޫމާތު ހުށަހަޅުއްވާފަ އެވެ.

އެ ގޮތުން ރައީސް ހުށަހެޅުއްވީ މުހައްމަދު ޒާހިދު، ދަފްތަރު ނަންބަރު ރސ. 1548 އާއި އަބްދުއްރަހްމާން ސޮލާހް ރަޝީދު، ރޯޒް، ކ. ހުރާ އީސީއަށް އައްޔަން ކުރެއްވުމަށެވެ.

މުހައްމަދު ޒާހިދު ވަނީ މީގެ ކުރިން އެޗްއާރްސީއެމްގެ ނައިބު ރައީސްކަން ކުރައްވާފަ އެވެ. އަދި ޖެންޑާ މިނިސްޓްރީގެ ޑެޕިއުޓީ މިނިސްޓަރުކަންވެސް ކުރައްވާފަ އެވެ.

ސޮލާހް ރަޝީދު ވަނީ އީސީގެ ސެކެރެޓްރީ ޖެނެރަލްގެ މަގާމާއި ހޯމް މިނިސްޓްރީގެ ޕާމަނަންޓް ސެކެރެޓްރީގެ މަގާމު އަދާކުރައްވާފަ އެވެ.

އެ ދެ ބޭފުޅުންގެ ނަން ދިރާސާ ކުރަން މިނިވަން މުއައްސަސާތަކުގެ ކޮމިޓީއަށް ވަނީ ފޮނުވައިފަ އެވެ. އިލެކްޝަން ކޮމިޝަންގެ ތިން މަގާމެއް ހުސްކޮށް އޮތުމުން އެ ކޮމިޝަން މި ވަގުތު އޮތީ ހުއްޓިފަ އެވެ. ކޮމިޝަންގެ ބައްދަލުވުންތައް ބޭއްވޭނީ ދެބައިކުޅަ އެއްބަޔަކަށް ވުރެ ގިނަ މެންބަރުން ހާޒިރުވެގެން ކަމަށް ވާއިރު، ކޮމިޝަންގެ ރައީސްގެ މަގާމުގައި ހުންނެވި ފުއާދު ތައުފީގުގެ ދައުރު ހަމަވެ އަދި އެހެން ދެ މެމްބަރަކު މަގާމުން ވަކި ކުރުމުން އެ ދެ މަގާމު ވެސް މި ވަގުތު އޮތީ ހުސްވެފަ އެވެ. ކޮމިޝަންގައި ޖުމްލަ ފަސް މެންބަރުން ތިބޭއިރު، މި ވަގުތު މަގާމުގައި ތިއްބެވީ ދެ މެންބަރުންނެވެ.