73 ޕަސެންޓު މަސައްކަތް ނިންމައި، މަޖިލިސް ޗުއްޓީ އަށް

އަލީ ރާޒީ

12 ޑިސެމްބަރ 2024 - 17:03

0 comments

ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރަށް ހުށަހެޅުނު ކަންކަމުގެ ތެރެއިން 73 ޕަސެންޓު މަސައްކަތް ނިންމުމަށްފަހު މަޖިލިސް މިއަދު ޗުއްޓީ އަށް ހިނގައްޖެއްޖެ އެވެ.

މިއަދުގެ ޖަލްސާ ނިންމާލައްވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ މި ދައުރު މަޖިލީހަށް ހުށަހެޅި މަސައްކަތްތަކުގެ ތެރެއިން 73.3 ޕަސެންޓް ނިންމާފައިވާ ކަމަށެވެ.

ފަހު ދައުރުގައި 27 ޖަލްސާއެއް ބޭއްވިއިރު، ކޮމިޓީތަކުން 165 ބައްދަލުވުމެއް ބޭއްވި އެވެ. ޖުމްލަ 20 ބިލެއް ހުށަހަޅައި، ހަތަރު ކުއްލި މައްސަލައަކަށް ބަހުސްކުރި އެވެ. އަދި 20 މައްސަލައެއް ވެސް މަޖިލީހަށް ހުށަހަޅައި، އޭގެ މަސައްކަތްތައް ކޮށްފައިވެ އެވެ.

އަބްދުއްރަހީމް ވިދާޅުވީ ދެން ފެށޭ ދައުރަކީ ވެސް މަޖިލީހުގައި އުފެއްދުންތެރި އަދި ބިނާކުރެވެނިވި މަސައްކަތްތަކެއް ކުރެވޭ ދައުރަކަށް ވާނެ ކަމަށް އުއްމީދު ކުރައްވާ ކަމަށެވެ. މަޖިލީހުގެ އާ ދައުރު ދެން ފަށާނީ އަންނަ ފެބުރުއަރީ މަހު އެވެ. އާ އަހަރަށް މަޖިލިސް ހުޅުވަން ބާއްވާ ޖަލްސާގައި ރައީސް ޑރ. މުހައްމަދު މުއިއްޒު ރިޔާސީ ބަޔާން އިއްވަވާނެ އެވެ.