ޗުއްޓީއާ ދިމާކޮށް މޯލްޑިވިއަންގެ ދަތުރުތައް އިތުރުކޮށްފި

މަރިޔަމް އަނާ

15 ޑިސެމްބަރ 2024 - 16:58

0 comments

ކުރިއަށް އޮތް ސްކޫލު ޗުއްޓީއާ ދިމާކޮށް، ގައުމީ އެއާލައިން، މޯލްޑިވިއަނުން ރާއްޖޭގެ އެކި ސަރަހައްދުތަކަށް ކުރާ ދަތުރުތައް އިތުރުކޮށްފި އެވެ.

މޯލްޑިވިއަނުން ބުނީ ޗުއްޓީއާ ދިމާކޮށް އެ އެއާލައިންގެ ދަތުރުތައް އިތުރުކޮށްފައިވާ ކަމަށާއި ޓިކެޓް ބުކް ކުރުމުގެ ފުރުސަތު މިހާރު ހުޅުވާލާފައިވާ ކަމަށެވެ.

އެގޮތުން ދަތުރުތައް އިތުރުކޮށްފައިވާ ގޮތަށް ބަލާއިރު ފުވައްމުލަކަށް މި މަހުގެ 16، 17 އަދި 19 ވަނަ ދުވަހު އިތުރު ދަތުރުތައް ބޭއްވުމަށް ވަނީ ހަމަޖެހިފަ އެވެ. އަދި ހއ. ހޯރަފުއްޓަށް މި މަހުގެ 16 އަދި 18 ވަނަ ދުވަހު އިތުރު ދަތުރެއް ބޭއްވުމަށް ހަމަޖެހިފައިވާއިރު، އައްޑޫ ސިޓީ ގަމަށް މި މަހުގެ 16 ގައި އިތުރު ދަތުރެއް ބާއްވާއިރު، މި މަހުގެ 18 އަދި 19 ގައި ކޮންމެ ދުހަކު އިތުރު ދެ ދަތުރު ބޭއްވުމަށް ވަނީ ހަމަޖެހިފަ އެވެ.

ޗުއްޓީއާ ދިމާކޮށް މޯލްޑިވިއަންގެ ދަތުރުތައް އަބަދު ވެސް އިތުރު ކުރެ އެވެ. ރާއްޖޭން ބޭރުން، އިންޑިއާގެ ކޮޗިން އާއި ޓްރެވިންޑްރަމްއަށް އަދި ރާއްޖޭގެ އެތެރޭގެ ޑިމާންޑު ބޮޑު އެހެން މަންޒިލުތަކަށް ޗުއްޓީ ތެރޭ އެ އެއާލައިނުން ކުރާ ދަތުރުތައް އިތުރު ކުރެ އެވެ.