ޖިހާދުގެ މައްސަލަ، އަލުން ބަލަން އަމުރެއް!

އަލީ ރާޒީ

13 ޖެނުއަރީ 2025 - 18:44

0 comments

ކުރީގެ ނައިބު ރައީސް އަބްދުﷲ ޖިހާދުގެ މައްޗަށް ދައުލަތުން ކުރި ދައުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ކަނޑައެޅީ ގާނޫނާ ހިލާފަށް ކަމަށް ކަނޑައަޅައި، އަލުން އެ މައްސަލަ ބަލަން ހައިކޯޓުން އަމުރުކޮށްފި އެވެ.

މޯލްޑިވްސް އިންޓަނޭޝަނަލް ފައިނޭންޝަލް ސާވިސް އޮތޯރިޓީގެ ޗެއާމަންގެ މަގާމުގައި ހުންނެވި ޖިހާދުގެ މައްޗަށް ދައުލަތުން ދައުވާ ކުރަނީ 2013 ވަނަ އަހަރު އޭނާ ފިނޭންސް މިނިސްޓަރަކަށް ހުންނެވިއިރު ފުށިދިއްގަރުފަޅުގެ އެއްބަސްވުމުގައި ސަރުކާރުގެ ފަރާތުން ސޮއި ކުރެއްވުމުގައި ދައުލަތަށް ފައިދާނުވާ ގޮތަށް އަމަލުކުރެއްވި ކަމަށް ބުނެ އެވެ.

އެ މައްސަލާގައި ޖިހާދުގެ މައްޗަށް ކުރަނީ ދައުލަތަށް ފައިދާވާން އޮތް ކަމެއްގައި އެ ނޫން ގޮތަކަށް އަމަލު ކުރުމުގެ ދައުވާ އެވެ. އެ ދައުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމުމުން އެ މައްސަލަ ދައުލަތުން ވަނީ ހައި ކޯޓުގައި އިސްތިއުނާފްކޮށްފަ އެވެ.

ކްރިމިނަލް ކޯޓުން މައްސަލަ ބޭރުކޮށްލާފައިވަނީ އެ މައްސަލައިގެ ތަހުގީގު އަލުން ފެށި ސަބަބު ޖިހާދަށް އަންގާފައިނުވުމާއި ދައުވާގެ އޭގެ މައްޗަށް ބިނާވާ ކުރީގެ ނައިބު ރައީސް އަހުމަދު އަދީބުގެ ބަޔާނުގެ ސައްހަކަން ކަށަވަރު ކުރެވިފައިނުވާ ކަމަށް ބުނެ އެވެ. އެ ކޯޓުން ނިންމީ އެއީ ތަހުގީގުގެ އުނިކަމެއް ކަމަށެވެ.

އެ ނިންމުން ދައުލަތުން ހައިކޯޓުގައި އިސްތިއުނާފު ކުރުމުން ހައިކޯޓުން އެ މައްސަލަ ބެލި ތިން ފަނޑިޔާރުންގެ އިއްތިފާގުން އެ މައްސަލަ އަލުން ބަލަން އަމުރުކުރީ މިއަދު އެވެ.

މިދިޔަ ސަރުކާރުން އެކުލަވާލި އެސެޓް ރިކަވަރީ ކޮމިޝަނުން އެ މައްސަލަ ބެލީ ކުރިން އެންޓި ކޮރަޕްޝަން ކޮމިޝަން (އޭސީސީ) އިން އެ މައްސަލަ ބަލައި، ނިންމާފައި ވަނިކޮށް ކަމަށާއި އެކަމަކު އަލުން މައްސަލަ ބެލި ސަބަބެއް ބުނެދެވިފައި ނުވާ ،ކަމަށް ކްރިމިނަލް ކޯޓުގެ އެ ނިންމުމުގައިވެ އެވެ. އަދި އެ މައްސަލާގައި ކުރީގެ ނައިބު ރައީސް އަހުމަދު އަދީބުގެ ބަހަށް ތަހުގީގު މަރުހަލާގައި ބަލާފައިވާއިރު، އޭނާއަކީ ޝައްކުގެ މަހައްލުގައި ހުރި މީހެއް ކަމަށާއި އަދި އޭނާގެ ބަހުގެ ތެދުކަން ކަށަވަރު ކުރަން އެސެޓް ރިކަވަރީ ކޮމިޝަނުން މަސައްކަތް ކޮށްފައި ނުވާ ކަމަށް އެ ނިންމުމުގައިވެ އެވެ.

ގާޒީ ހުސައިން ފާއިޒް ރަޝާދު ނިންމެވި ނިންމުމުގައިވަނީ ތަހުގީގު ހިންގާފައިވަނީ އިންސާފުން ނޫން ކަމަށް ކަންތައްތަކެއް ފާހަގަ ކުރެވޭތީ، އެފަދަ ތަހުގީގެއްގެ މައްޗަށް ބިނާކޮށް ކުރާ ދައުވާއަށްވެސް އަސަރު ކުރާނެ ކަމަށެވެ. އެހެންވެ އެ މައްސަލަ ކުރިއަށް ނުގެންދެވޭނެ ކަމަށް ނިންމެވީ ކަމަށް އެ ނިންމުމުގައިވެ އެވެ. އެހެންނަމަވެސް ހައިކޯޓުގެ ފަނޑިޔާރު ހުސައިން މަޒީރު، މުހައްމަދު ނިޔާޒް އަދި މުހައްމަދު ފައިސަލް މިއަދު ނިންމެވީ ކްރިމިނަލް ކޯޓުގެ ނިންމުން ގާނޫނާ ހިލާފު ކަމަށެވެ.