ޓޫރިސްޓުންގެ އަދަދު 100،000 އިން މައްޗަށް

އަލީ ރާޒީ

19 ޖެނުއަރީ 2025 - 23:01

0 comments

އިއްޔެގެ ނިޔަލަށް މި އަހަރުގެ މިހާތަނަށް ލައްކައަކަށް ވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ.

ޓޫރިޒަމް މިނިސްޓްރީގެ އެންމެ ފަހުގެ ޓޫރިސްޓް އެރައިވަލްސްގެ ތަފާސްހިސާބުތައް ދައްކާ ގޮތުން އިއްޔެއާ ހަމައަށް 117،532 ޓޫރިސްޓުން އައިސްފައިވެ އެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައި ވަނީ 106،936 ޓޫރިސްޓުންނެވެ. އެހެންވެ މިއީ 9.9 ޕަސެންޓްގެ ކުރިއެރުމެކެވެ.

މި އަހަރުގެ މިހާތަނަށް އެންމެ ގިނަ ޓޫރިސްޓުން އައި ގައުމުތަކަށް ބަލާ އިރު، މިދިޔަ އަހަރު ދެވަނައިގައި އޮތް ރަޝިއާ އިން 15،077 ޓޫރިސްޓުން އައިސްފައިވާ އިރު، އިޓަލީން 12،560 ޓޫރިސްޓުން އަދި އިނގިރޭސިވިލާތުން 10،621 ޓޫރިސްޓުން އައިސްފައިވެ އެވެ.

މިދިޔަ އަހަރު އެންމެ ގިނަ ޓޫރިސްޓުން އައި ޗައިނާ މިހާރު ގަދަ 10 ގެ ލިސްޓްގެ ހަ ވަނައިފަ އެވެ.

ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމުގެ މަސައްކަތް ސަރުކާރުން އަންނަނީ ފުޅާ ދާއިރާއެއްގައި ކުރަމުންނެވެ. ފަތުރުވެރިން ރާއްޖެ އައިސް ހޭދަކުރާ ދުވަސް އިތުރުކުރުމަށްޓަކައި ވެސް މަސައްކަތްތަކެއް އަންނަނީ ކުރަމުންނެވެ.

މި އަހަރު ރާއްޖޭގެ ޓާގެޓަކީ 2.2 މިލިއަން ޓޫރިސްޓުން ގެނައުމެވެ.